Mihilimo 17

Yehoshafati Atendwa Seuta ywa Yuda

1Yehoshafati niyo atendaga seuta hantu ha tati yakwe Asa na kwetogeza mo useuta wakwe chani anasekuhudwa ni Waizulaeli. 2Niyo aika wagomba nkondo mwe imizi yose ya Yuda izengelwe ngome na mwe imizi imituhu ya Yuda na mwemizi ya Efulaimu itahigwe ni Asa tati yakwe. 3Zumbe Chohile niyo amjimbika Yehoshafati kwaviya katimila isila ya babakwe Daudi mo wikazi wakwe naho hamvikile mnungu Baali. 4Kamsankanila Zumbe Chohile ywa tati yakwe, na kutimila malagizo ya Zumbe Chohile, naho hadamanye yehiye saviya maseuta wa Izulaeli wadamanye. 5Zumbe Chohile katogeza useuta wa Yehoshefati utende na nguvu mwe isi ya Yuda, wantu wose wa wamwigaila majeleko niyo atenda mgoli na kutunyiswa. 6Kaungisa kumsankanila Zumbe Chohile na kubalanga ntendele zose zinukile zo kuvikila milungu na matukulu ya Ashela mlungu mvyele mweisi ya Yuda. 7Mo mhilimo wa katatu wo useuta wakwe, niyo egala masekulu wakwe kwe imizi ya Yuda chani wakahinye wantu, masekulu awo ni Beni haili na Obadiya na Zekaliya na Nasaneli na Mikaya.

8Waitaga hamwenga na Walawi chenda na walavyantambiko waidi. Walawi awo wendaga Shemaya na Netaniya na Zebadiya na Asaheli na Shemilamosi na Yehonasani na Adoniya na Tob adoniya, na walavyantambiko wendaga ni Elishama na Yeholamu. 9Waguhaga ichitabu che isigilizi cha Zumbe Chohile na kuzunguluka mwe imizi yose ya Yuda, wakahinya wantu.

Ukulu wa Yehoshafati

10Zumbe Chohile niyo kazitenda iziseuta zose zizunguluke Yuda nkama zohohe kutowana na seuta Yehoshafati. 11Wantu wasiku wa Filisiti wamwigaila Yehoshafati mayuwe yalozize ya chumbu na Zahabu ilozize na majeleko matuhu, na Walabu wasiku wamwigaila ngoto elufu mfungate na magana mfungate na mbuzi elufu mfungate na magana mfungate. 12Ivyo Yehoshafati kajendeleza kukula na kutenda na nguvu. Azengaga ngome na mizi na hazina uko Yuda, 13uko kwendaga na hazina za kwikiya vintu vilozize vyesimile.

Naho uko Yelusalemu aikaga masekulu wa wagomba nkondo wakankalu wa kugomba nkondo, 14kulawana ne izinkolo za watati zawo, mazina yawo yawandikwe ni Adina endaga nuyo mkulu ywa wagomba nkondo laki ntatu we dikabila dya Yuda, hasi hakwe endaga na wagomba nkondo laki ntatu. 15Ywa kaidi akutimila mo usekulu endaga Yehohanani, endaga na wagomba nkondo laki mbili na milongo mnane elufu, 16ywa katatu endaga Amasiya mwana ywa Zikili, akatenda na wagomba nkondo laki mbili. Amasiya mwenye elavyaga kumsankanila Zumbe Chohile. 17Sekulu ywa wagomba nkondo we idikabila dya Benjamini endaga Eliyada, mntu mkankalu, endaga na wagomba nkondo laki mbili wata viziha vya mita na nchinga. 18Akutimila endaga Yehozabadi endaga na wagomba nkondo laki imwenga na milongo mnane elufu, wemalanye kwa nkondo. 19Wagomba nkondo wose awo wakamsankanila seuta uko Yelusalemu, ukaleka ayo seuta aikaga wagomba nkondo watuhu mwe imizi idya imituhu izengelwe ngome mweisi ya Yuda.