Mihilimo 18

Muwoni Mikaya amfunda Ahabu

1Maseuta 22:1-28

1Umo Seuta Yehoshafati ywa Yuda eze atende mgoli na kumanyikisa, niyo amalanya mwalo chani watu we ikaya yakwe wasolane na wantu we ikaya ya seuta Ahabu ywa Izulaeli. 2Mihilimo misiku itimile Yehoshafati niyo aita komzi wa Samaliya kumtalamkila Ahabu. Ahabu kamchinjiza Yehoshefati ngoto na ng'ombe zilozize, kwa kumtunya uyo hamwenga na awantu endile nawo, vikaheza niyo amluvya Yehoshafati walungane wawebunge umzi wa Lamoti gileadi. 3Niyo amuza, “Nachitanye chikawebunge umzi wa Lamosi Gileadi?” Yehoshafati amhitula, “Heye, suwe chihamwenga na weye, na awagomba nkondo wangu nawelunge na weye.” 4Mna Yehoshafati niyo ongezeza, “Mna ndakumuza Zumbe Chohile agaze.” 5Ivyo Ahabu kawetanga waoni, mwa waoni magana mane awauza, “Togolani hawebunge umzi wa Lamosi Gileadi, hegu bule?” Wamhitula, “Hita kawebunge,” “Chohile nakwinke uhuda.” 6Mna Yehoshafati niyo auza, “Hahana muoni mtuhu ywa Zumbe Chohile chikudaha kumuza?” 7Ahabu niyo amhitula Yehoshafati, “Kuchei na yumwenga chikudaha kumuza mbuli ya Zumbe Chohile, Mikaya mwana ywa Imla. Mna namwihiwa kwaviya hakunionela mbuli yoyose ichumile mna mbuli zihiye izodu.” Yehoshafati niyo amgamba, “Usekulonga ivyo.” 8Ivyo seuta Ahabu ketanga sekulu yumwenga na kumgamba asunguze aite akamguhe Mikaya mwana ywa Imla. 9Maseuta awo wakatenda wavala izisuche zawo ze chiseuta, niyo wekala mwe vigoda vyawo vye chiseuta hechiwasa cho kusagila ingano chikuse ko mwingilo wa Samaliya waoni wose nendile wakalavya uoni wawo kulongozi kwawo. 10Vikaheza, Sedekiya mwana ywa Kenaana, niyo edamanyiza mahembe ya chuma na kumgamba Ahabu, “Vino nivyo Zumbe Chohile akulonga, ‘Kwa mahembe yano nivyo nowatowe Wasiliya na kuwahuda vitendese.’” 11Waoni awatuhu wose walonga seivyo. “Kawebunge Lamosi Gileadi naho nohude,” wamgamba, “Zumbe Chohile nakwinke uhuda.” 12Chipindi icho, yudya sekulu alagizwe akamguhe Mikaya niyo amgamba, “Awaoni wose wadya awatuhu wamlaviza seuta uwoni wa uhuda, seivyo weye ulonge yedi mwa seuta.” 13Mna Mikaya niyo amhitula, “Kwa udahi wa Zumbe Chohile, miye nanilonge du chiya Chohile ywangu nanigambile nilonge!” 14Mikaya eze abule kulongozi kwa seuta Ahabu, seuta amuza, “Mikaya, miye na seuta Yehoshafati chite chikawebunga umzi wa Lamosi, hegu bule?” Mikaya niyo amhitula, “Hita ukawebunge!” “Chindedi nohude. Zumbe Chohile nakwinke uhuda.” 15Mna Ahabu niyo amhitula, “Hugambile nkanana nyingahi umo ukalonga na miye kwa zina dya Zumbe Chohile, walonga chindedi?” 16Mikaya niyo amhitula, “Nawona wagomba nkondo wa Izulaeli wazagala mwa magulu saviya ngoto hezina mdimi. Naho Zumbe Chohile agamba, ‘Wantu wano hawana chilongozi, walekeni wauye kaya chila mntu kwe ikaya yakwe kwa utondowazi.’ ” 17Seuta Ahabu ywa Izulaeli niyo amgamba Yehoshafati, “Sikugambila uyo hakunionela mbuli zedi chila chipindi ni mbuli zihiye izodu!” 18Mikaya ajendeleza kulonga, “Haluse tegeleza viya Zumbe Chohile akulonga! ‘Simwona Zumbe Chohile kekala mwe chigoda chakwe kwembingu, hamwenga na wandima wakwe wa kwembingu wachimala mnkanda mwakwe.’ 19Zumbe Chohile niyo auza, ‘Niyuhi akudaha kumdanta Ahabu aite akayebunge Lamosi Gileadi na kukomelwa uko?’ Wamwenga mwa awandima wa kwembingu walonga vino, watuhu walonga vituhu, 20vikaheza mpepo niyo yelaviza kulongozi kwa Zumbe Chohile, na kumgamba, ‘Miye nanimdante.’ Zumbe Chohile niyo auza, ‘Vivihi?’ 21Mpepo yamhitula, ‘Nanite na kuwatenda awaoni wakwe wose walavye uoni wo udanti.’ Zumbe Chohile niyo amgamba, ‘Hita ukamdante. Nochumilwe.’” 22Ivyo Mikaya kabindiliza akagamba, “Vino nivyo vilaile. Zumbe Chohile kawatenda wano waoni wako walavye uwoni wo udanti. Mna mwenye kalonga mbuli za file mwako!” 23Vikaheza muoni Sedekiya mwana ywa Kenaana kambasa mikaya, na kumtowa ihi mwefunda, na kumuza, “Kukongela ini Muye wa Zumbe Chohile ukanileka miye na kwiza kulonga na weye?” 24Mikaya niyo amhitula, “Nobunkule idyo umo nowite kwefisa mwe chumba cha mndani,” 25Vikaheza seuta Ahabu amlagiza yumwenga mwa amasekulu wakwe, “Mgwileni Mikaya mumvuze kwa Amoni, sekulu yo mzi, na kwa mlavyantambiko Yoashi. 26Mgambeni amdule mwe chifungo na kumnkonya imikate na mazi kubula hadya huwiya kwa utondowazi.” 27Mikaya niyo agamba, “Unauya mpeho kulawa kwe nkondo nomanye kugamba Zumbe Chohile halongile na miye!” Niyo ongezeza, “Tegelezani nyuwe wantu msekujala yadya nilongile!”

File ya Ahabu

1Maseuta 22:29-35

28Vikaheza seuta Ahabu ywa Izulaeli na seuta Yehoshafati ywa Yuda waita kuwebunga umzi wa Lamosi Gileadi. 29Ahabu niyo amgamba Yehoshafati, “Miye nanivale suche sizo za chiseuta kwita kwe nkondo, mna weye novale izisuche zako ze chiseuta.” Ivyo seuta ywa Izulaeli kaita kwe inkondo kuno kehitula. 30Seuta ywa Siliya nendile kawalagiza amasekulu wakwe wakuchimaila amalingisha yakwe wase kumwebunga mgomba nkondo yoyose hegu sekulu ywa wagomba nkondo, mna seuta ywa Izulaeli uyodu. 31Weze wamwone seuta Yehoshafati niyo wafanyanya kugamba ni seuta ywa Izulaeli, niyo wamhitukila na kumwebunga. Mna Yehoshafati niyo amwilila, Zumbe Chohile vyaleka amwambiza. Chohile awahitwila awagomba nkondo ntendele ntuhu. 32Amasekulu wa malingisha niyo wawona kugamba suyo seuta ywa Izulaeli, ivyo waleka kumwebunga, 33mgomba nkondo yumwenga ywa Siliya niyo akunta mfulo kwa kuvuiza na kumlasa seuta Ahabu he luhenyo lo kudugana isuche yakwe ye chuma. Aho Ahabu niyo amgamba deleva ywe idilingisha dyakwe, “Silumizwa vihiye! Hitula idilingisha unuse mwe nkondo.” 34Kuno inkondo ikajendeleza, seuta Ahabu nakasigaila mwe idilingisha dyakwe kuno kegamiza kubula chisingi niyo abanika.