Mihilimo 19

Muoni Yehu amkwahila Yehoshafati

1Seuta Yehoshafati niyo auya mpeho kwe inyumbakwe ye chiseuta uko Yelusalemu. 2Muwoni, Yehu mwana ywa Hanani, niyo aita akumsingila seuta na kumgamba, “Togola, wafanyanya kugamba ni vyedi kuwambiza wadya wehiye na kuwaunga wadya wakumwihiwa Zumbe Chohile? Viya udamanye vikwigaila maya ya Zumbe Chohile. 3Mna hataivyo kuna yedi mwako. Kuyausa amatukulu yose ye milungu ya Ashela mlungu ywa chivyele yadya awantu nendile wakayavikila, naho kuhikiliza kumlonda Zumbe Chohile kwa moyo wako wose.”

Yehoshefati asagula walamuzi

4Hatahegu seuta Yehoshafati nendile akekala uko Yelusalemu, mna nakawatalamkila awantu nkanana kwa nkanana, kulawa Beeli sheba kwamwenyemzi kubula kwa magulu ya Efulaimu mwe ntendele ya chenya. Kadamanya ivyo chani awavuze awantu wamuwiye Zumbe Chohile, Chohile ywa wababa zawo. 5Aikaga walamuzi mwe isi yose ya Yuda yendaga na ngome, 6kawalagiza kugamba, “Msinyise hadya mkulaviza nkanto, nyuwe hamkukantila wantu kwa udahi wenyu, mna kwa udahi mkwinkwa ni Zumbe Chohile, naye ehamwenga na nyuwe hadya kulaviza izi nkanto. 7Nyanyahalani kwa Zumbe Chohile mkaulise kwaviya Zumbe Chohile, Chohile ywetu hajijimize kubunyanya hegu kumhingiza kuhingiza hegu fumbaso.” 8Uko Yelusalemu Yehoshafati kasagula Walawi wasiku na walavyantambiko na vilongozi wasiku mgati mwa Izulaeli, watende walamuzi mwe nkumbizi na ubanasi wa sigilizi za Zumbe Chohile hegu mgati mwa wekazi wo mzi. 9Niyo awenka amalagizo yano yakutimila, “Damanyani yadya yakungwa kwa kumogoha Zumbe Chohile kwa ukanuni na kwa moyo wose. 10Mwa chila mbuli ikwigalwa kwenyu ni walukolo wenyu kulongozi kwenyu kulawa mwe mzi wowose, ikatenda ni ukomi hegu mbuli yoyose ya kubalanga sigilizi hegu lagizo hegu nkanto, mwaungwa muwafunde kugamba wasekukola masa kwa Zumbe Chohile msekwizilwa ni maya ya Zumbe Chohile nyuwe na walukolo wenyu. Mna mnadamanya izindima zenyu vyedi, hamtende na mlema. 11Mlavyantambiko mkulu Amaliya nachimaile izimbuli zose zikumlanga Zumbe Chohile na Zebadiya mwana ywa Ishimaeli, chilongozi ywe idikabila dya Yuda natende na udahi wa kulamula malaho ya mazwela. Walawi nawatende masekulu wa kukaula kugamba nkanto za walamuzi zajeswa. Mdamanye kwa ukankalu amalagizo yano Zumbe Chohile atende ntendele ya wadya wakudamanya yedi!”