Mihilimo 20

Yehoshafati awahuda Waedomu

1Yeze yajinke mazuwa yalozize wagomba nkondo wa Moabu na Waamoni hamwenga na Wameuni wasiku wayebungaga isi ya Yuda. 2Wantu wasiku wezaga wamgamba seuta Yehoshafati, nakumgamba, “Kuna bunga kulu dya wankondo kulawa Edomu, ntendele ya kaidi ye ibahali yo Munyu. Wataha kale Hasasoni Tamali.” (Zina tuhu dya Engedi) 3Yehoshafati niyo engilwa ni nkama na kukonga kumlombeza Zumbe Chohile amlongoze. Vikaheza niyo alagiza awantu wose mwe isi ya Yuda wafunge. 4Wantu wose kulawa mwe imizi yose ya Yuda wechisanya Yelusalemu kumlombeza Zumbe Chohile awalongoze. 5Yehoshafati niyo achimala kulongozi kwe idibunga dya awantu wa Yuda na Yelusalemu kulongozi ko uwa mhya we Inyumba ya Zumbe Chohile, 6niyo alombeza kwa izwi kulu, “Hoi Zumbe Chohile, Chohile ywa wababa zetu wikwembingu walongoza izisi zose. Una nguvu na udahi naho hahana akudaha kukuhiga. 7Ni weye Chohile ywetu, hadya awantu wako wa Izulaeli wengilaga mwe isi ino, wabalazaga awantu wendile wakekala mwe isi ino na kuwenka isi welekwa wa Ibulahimu, mbuyayo itende yawo kalenakale. 8Wekala hano na kuzenga Nyumba ya Chohile kwa ntunyo yako, 9wakamanya kugamba wakebungwa ni nkunto na nkondo yoyose hegu manyonje yehiye hegu gumbo, weza na kuchimala kulongozi kwako kwe Inyumba ino wakakuvikila. Wakulombeza mwe izinkunto, weye noweve na kuwakombola.” 10“Haluse awantu wa Amoni na Wamoabu na Waedomu wachebunga. Umo wababa zetu wakalawa Misili, weye wawalemezaga wase kuzebunga izisi izo, ivyo wababa zetu wajinkilaga mnkanda hawawakomile. 11Kaula vino nivyo wakuchiliha! Weza kuchigulusa mwe isi uchinkile itende ulisi wetu. 12Ni weye Chohile ywetu! Wakantile kwaviya suwe hachina udahi mwe bunga kulu sadino dya wagomba nkondo wakuchebunga. Hachimanyize dyo kudamanya, mna chasinya weye uchambize.” 13Wagosi wose wa Yuda, hamwenga na wakazi zawo na wana wawo, wendaga wachimala aho he Inyumba ya Chohile. 14Muye wa Zumbe Chohile niyo wamwingila yumwenga mwa Walawi endaga aho he dibunga. Idizina dyakwe naketangwa Yahazieli mwana ywa Zekaliya mwana ywa Benaya, mwana ywa Yeieli, mwana ywa Mataniya endaga mlukolo ywa Asafu. 15Yahazieli niyo agamba, “Tegelezani nyuwe wantu wa Yuda na wekazi wa Yelusalemu na seuta Yehoshafati, Zumbe Chohile agamba vino, msekufachevu hegu kogoha kudyebunga dino idibunga dya wagomba nkondo, kwaviya nkondo ino ni ya Chohile siyo yenyu. 16Luvi webungeni umo wakakwela idikolongo dya Sisi. Namuwaduganye hajihi ne idikolongo di ntendele ya ulailo wa zuwa we idijangwa dya Yelueli. 17Hamungwe mtowane inkondo ino. Mwepange du muwagoje, namuwone Zumbe Chohile akawahuda kwachausa chenyu. Nyuwe wantu wa Yuda na Yelusalemu, msekogoha hegu kufachevu. Hitani kwenkondo Zumbe Chohile natende hamwenga na nyuwe!” 18Vikaheza seuta Yehoshafati niyo afika madi enama kubula mwe sanga, na awantu wose wenamila hamwenga na uyo na kumvikila Zumbe Chohile. 19Walawi wo ulukolo lwa Kohashi na Kola niyo wachimala wamtogola Zumbe Chohile, Chohile ywa Izulaeli kwa izwi kulu. 20Mtondo wakwe chilochilo wantu niyo waita kubula kwe dijangwa dya Tekowa. Umo wakakonga kuhalawa, Yehoshafati kalonga nawo kwa ulosi uno, “Nyuwe wantu wa Yuda na Yelusalemu! Mtegelezeni Zumbe Chohile, Chohile ywenyu na kutogesa. Waoni wakwe wazumileni namchumilwe.” 21Eze abinde kulonga na awantu wakwe, seuta niyo alagiza wachemi wasiku wacheme kulongozi kwa Zumbe Chohile wamtogole wakawalongoila wagomba nkondo wakachema,

“Mtogoleni Zumbe Chohile!

Kwaviya ungi wakwe ni wakalenakale!”

22Weze wakonge kuchema na kumtogola Zumbe, Zumbe Chohile niyo awebunga awagomba nkondo wa Amoni na Moabu na wa Amagulu ya Seili wezile kutowana na Yuda. Wagomba nkondo awo niyo wahudwa. 23Waamoni na Wamoabu wawebunga awantu wa kwedigulu dya Seili na kuwakoma wose, na kukonga kwebungana wenye kwa wenye. 24Wagomba nkondo wa Yuda weze wabule he inguzo yo wamizi yendile kwe dijangwa, wakaula ntendele ya wankondo wawo wawona vimba ivyodu vizagale mwe isanga, hahana hata yumwenga ahonile. 25Yehoshafati na wagomba nkondo wakwe waita wakutaha, na kubwila viziha zilozize na suche na vintu vituhu vina yombe kulu. Wajeseza mazuwa matatu wakachisanya ivintu ivyo, mna hawavibindile kwaviya vyendaga vilozesa. 26Mwe idizuwa dya kane niyo wechisanya mwe idikolongo dya ntogozi wamtogola Zumbe Chohile kwaviya adamanye. Nivyo vikuleka kubula dyelo kolongo idyo dyetangwa, “Ntogozi” 27Yehoshafati niyo alongoza awagomba nkondo wakwe wauye Yelusalemu kwa chinyemi, kwaviya Zumbe Chohile kawahuda awankondo wakwe. 28Eze wabule komzi wa Yelusalemu, watungata kwe Inyumba ya Chohile, kuno wakatowa vilangu na mazeze na magunda. 29Nkama ya Chohile iwengila wantu we iziseuta zose weze weve ivyo Zumbe Chohile awahudile awankondo wa Izulaeli, 30ivyo Yehoshafati niyo alongoza kwa utondowazi, Chohile niyo amwikiya wamizi ntendele zose.

Udumo wo ulongozi wa Yehoshafati

1Maseuta 22:41-50

31Yehoshafati endaga seuta ywa Yuda akatenda na mihilimo milongo mitatu na shano. Atawalaga akekala Yelusalemu kwa mihilimo milongo midi na mishano. Nine naketangwa Azuba, mchiche ywa Shilihi. 32Mo useuta wakwe kadamanya yedi saviya adamanye tati yakwe Asa viya adamanye kulongozi kwa Zumbe Chohile, 33mna habalange chila hantu henukile ho kuvikila milungu. Wantu nendile wachei hawanati kumhitukila Chohile ywa wababa zawo. 34Mbuli ntuhu zo ulongozi wa Yehoshafati adamanye, kukongela nkongo kubula udumo, ziwandikwa mwe chitabu cha mbuli zijinkile za Yehu mwana ywa Hanani, izo zimndani mwe chitabu cha Maseuta wa Izulaeli. 35Vikaheza seuta Yehoshafati ywa Yuda niyo elunga na seuta Ahaziya ywa Izulaeli, yudya adamanye mbuli zikwihiza. 36Niyo wevana wazenge meli nkulu za kudamanyiza mayombe, wazidamanyiza uko Esioni gebeli. 37Mna Eliezeli mwana ywa Dodavahu, kulawa komzi wa Malesha, niyo alavya uwoni kumfunda Yehoshafati akamgamba, “Kwaviya kudamanya wivano na Ahaziya, Zumbe Chohile nabalange izimeli uzengile.” Ivyo izimeli izo niyo zabogazoka hazitambile vituhu kwita kwa amayombe.