Mihilimo 21

1Yehoshafati niyo abanika na kuhambwa mwe izimbila ze chiseuta mo Mzi wa Daudi mwanawe Yeholamu niyo aguha ahantu hakwe atenda seuta.

Seuta Yeholamu atawala Yuda

2Maseuta 8:17-24

2Yeholamu mwana ywa seuta Yehoshafati ywa Yuda endaga na wakuluze mtandatu, Azaliya na Yehieli na Zekaliya na Azaliyahu na Mikaeli na Shefatiya. 3Tati yawo awenkaga zahabu ilozize na mayuwe ya chumbu na vintu vituhu vina yombe kulu, chila yumwenga kamtenda mchimaila ywa mzi umwenga uzengelwe ngome uko Yuda. Yehoshafati amwinkaga Yeholamu useuta kwaviya nuyo endaga mwelekwa ywakwe ywa nkongo. 4Yeholamu eze etogeze mo useuta wakwe niyo awakoma wakuluze wose kwa sime, na masekulu wasiku wa Izulaeli. 5Yeholamu katenda seuta akatenda na mihilimo milongo mitatu na midi na akekala uko Yelusalemu kwa mihilimo mnane. 6Yeholamu katimila sila zihiye za seuta Ahabu na maseuta watuhu wa Izulaeli, asolaga mchiche yumwenga ywa Ahabu. Kakola masa kwa Zumbe Chohile, 7mna Zumbe Chohile haungile alubinde ulukolo lwa Daudi, kwaviya aikaga lagano na Daudi kugamba welekwa wakwe nawajendeleze kulongoza kalenakale. 8Mwe chipindi Yeholamu akalongoza, wantu wa Edomu niyo wahiga useuta wa Yuda na kwika seuta ywawo wenye. 9Ivyo Yeholamu na masekulu na wagomba nkondo wakwe wemalanya na malingisha yawo wadeluka na kuwabasa Waedomu. Uko Waedomu nendile wawazunguluka na kuwebunga nechilo na kuwahuda, niyo wasumka. 10Kubula dyelo Edomu imlemela useuta wa Yuda. Mwe ichipindi icho wekazi wo umzi wa Libuna nawo niyo waulemela useuta wa Yuda, kwaviya Yeholamu kamleka Zumbe Chohile, Chohile ywa wababa zakwe. 11Iviya adamanyaga hantu ha kuvikila milungu mituhu kwa awagulu wa Yuda na kuwahosa wantu wa Yuda na Yelusalemu kuswesa ukanuni na kukola masa kwa Zumbe Chohile. 12Yeholamu kahokela baluwa kulawa kwa muoni Eliya ikulonga vino, “Zumbe Chohile, Chohile ywa babako Daudi agamba, ‘Weye hutimile isila ya seuta Yehoshafati tati yako, hegu babako seuta Asa ywa Yuda, 13mna kutimila sila za maseuta wa Izulaeli. Kuwalongoza wantu wa Yuda na Yelusalemu wasekutenda wakanuni kulongozi kwa Chohile. Kudamanya saviya adamanye seuta Ahabu na wantu we ikaya yakwe uko Izulaeli, naho kuwakoma walukolo wako wendile wachumi kujinka weye. 14Ivyo Zumbe Chohile naawakantile vitendese awantu wako na wanawo na wakazizo, na kubalanga chila unanacho. 15Weye mwenye nosulumizwe kwa unyonje wa kundani nojendeleze zuwa kubula zuwa, hata utumbo naufontokele kuse.’”

16Kwendaga na Wafilisiti na Walabu wendile wakekala pwani haguhi na Waisiopiya. Zumbe Chohile kawasonga maya watowane na Yeholamu. 17Niyo wayebunga isi ya Yuda, na kutaha ivintu vyose vyendile mwe idizumba dya seuta na kuwataha awantu na wanawe wose na wakazize, ukaleka Ahaziya mwana chilume chiziwanda chakwe. 18Ivyo vize viheze, Zumbe Chohile niyo amwigaila seuta unyonje wa kundani hewine mti. 19Kajendeleza kulumwa kwa chipindi chi mihilimo midi kubula udumo seuta niyo abanika mwe masulumizo yatendese. Awantu hawajimbile moto kulomboleza ifile yakwe saviya wendile wakawadamanyiza wababa zakwe. 20Yeholamu katenda seuta akatenda na mihilimo milongo mitatu na midi na kulongoza Izulaeli kwa mihilimo mnane akekala Yelusalemu. Hahana amonele usungu mo kubanika kwakwe. Niyo wamhamba mo Mzi wa Daudi, mna sumo mwe izimbila ze chiseuta.