Mihilimo 22

Ahaziya atenda Seuta ywa Yuda

2Maseuta 8:25-29

2Maseuta 9:21-28

1Wantu wa Yelusalemu wamtenda seuta Ahaziya mwana chilume umdodo ywa Yelohamu hantu ha tati yakwe, kwaviya wakuluze wose wakomwagwa ni kabunga kawantu wasiku wezaga kwedilago hamwenga na Walabu. Ivyo, Ahaziya mwana ywa Yeholamu, seuta ywa Yuda, niyo alongoza. 2Ahaziya akongaga kulongoza akatenda na mihilimo milongo midi na midi, kalongoza akekala uko Yelusalemu kwa mhilimo umwenga. Nine naketangwa Ataliya mwezukulu ywa seuta Omli. 3Mlangilizi ywakwe endaga mami yakwe mwe kudamanya wavu, iviya katimila lujendo lwa awantu we ikaya ya Ahabu, 4kadamanya yehiye kulongozi kwa Zumbe Chohile, saviya wadamanye wantu we ikaya ya Ahabu kwaviya tati yakwe eze abanike masekulu watuhu wa seuta Ahabu niyo watenda walangilizi wakwe, na kumtenda adamanye mbuli zihiye. 5Kwakutimila ulangilizi wawo, niyo elunga na seuta Yolamu ywa Izulaeli mwe nkondo na seuta Hazaeli mwana ywa Ahabu ywa Siliya. Wankondo awo niyo webungana uko Lamosi Gileadi, na Yolamu niyo alumizwa ni Waalamu mwe nkondo. 6Niyo auya ko mzi wa Yezileeli chani euguze inkwenje alumizwe kwe nkondo uko Lama, Ahaziya mwana ywa Yeholamu seuta ywa Yuda kaita kakumtalamkila. 7Ahaziya eze amtalamkile Zumbe Chohile ajeseza intambo iyo itende kukomwa kwa Ahaziya. Umo Ahaziya achei uko, niyo walungana na Yolamu kwita kudugana na mntu akwitangwa Yehu mwana ywa Nimshi asagulwe ni Zumbe Chohile chani abalange ulweleko lwa Ahabu. 8Umo Yehu akawakantila wana wa Ahabu aduganaga na masekulu wa Yuda hamwenga na wana wa walukolo wakwe Ahaziya, wamsindikize Ahaziya niyo awakoma. 9Kaita kakumlonda Ahaziya kambwila kefisa komzi wa Samaliya. Wamgwila wamwigala kwa Yehu na kumkoma. Niyo wamhamba kuno wakagamba endaga mwezukulu ywa seuta Yehoshafati, yudya adamanyaga chila sila na kumvikila Zumbe Chohile kwa moyo wakwe wose.

Ivyo hakwendaga na mlukolo ywa Ahaziya asigale akudaha kutenda seuta.

Malikiya Ataliya alongoza Yuda

2Maseuta 11:1-3

10Ahadya Asaliya nine dya Ahaziya eze awone kugamba mwanawe kakomwa, niyo alagiza kugamba ulukolo lwe chiseuta lwa Yuda lukomwe. 11Mna Yehosheba mchiche ywa seuta Yeholamu amguhaga chinyele Yoashi yumwe mwa awana wa seuta wendile wehajihi na kukomwa kamfisa hamwenga na mndima ywakwe mwe chumba cha kwikiya vintu vya kugonela mndani mwe Inyumba ya Chohile. Yehosheba mchiche ywa seuta Yeholamu, mkaza mlavyantambiko Yehoyada, endaga lumbudye dya Ahaziya, kamfisa umwana chani Asaliya anase kumkoma. 12Kafiswa umo mwe ichumba icho kwa mihilimo mtandatu umo Malikiya Ataliya akalongoza mwe isi.