Mihilimo 23

Ataliya ausigwa mo useuta

2Maseuta 11:4-16

1Eze ubule mhilimo wa mfungate mlavyantambiko Yehoyada kalamula kutenda chintu. Kadamanya wivano na masekulu wa mabunga mashano ya wagomba nkondo, Azaliya mwana ywa Yeholamu na Ishimaeli mwana ywa Yehohanani na Azaliya mwana ywa Obedi na Maaseya mwana ywa Adaya na Elishafati mwana ywa Zikili. 2Niyo watamba na kuzunguluka mwe imizi yose ya Yuda wawachisanya Walawi na vilongozi wa makabila ya Izulaeli waita kubula Yelusalemu. 3Wose niyo wadugana mwe Inyumba ya Chohile wadamanya lagano na Yoashi mwana ywa Seuta. Yehoyada niyo awagamba, “Yuno ni mwana ywa seuta! Mwana ywa seuta natende seuta, saviya Zumbe Chohile alagane kugamba lweleko lwa seuta Daudi. 4Haluse vino nivyo namdamanye. Umo walavyantambiko wa Walawi wakengila mo uluzo mwe dizuwa dya Kuhumula, selusi imwenga idime inchili ye Inyumba ya Chohile, 5selusi ntuhu idime idizumba dya seuta, selusi ikutimila nawadime Umsingi we izinchili. Wantu watuhu wose nawadugane mwe ibalaza ye Inyumba ya Chohile. 6Hahana mntu akungwa engile mwe Inyumba ya Chohile ukaleka walavyantambiko na Walawi wata uluzo. Wadaha kwingila kwaviya ni wakuka mna wantu wose wasigale waungwa watimile amalagizo ya Zumbe Chohile. 7Walawi waungwa wamdime seuta kwa kumzunguluka, chila mntu akatenda na chiziha chakwe mo mkono, mntu mtuhu yoyose najeze kwingila mwe Inyumba ya Chohile nakomwe. Ikalani hajihi na seuta hohose naite” 8Walawi na awantu wa Yuda niyo watoza amalagizo ya mlavyantambiko Yehoyada. Chila sekulu niyo awaguha awantu wakwe wose wabindile uluzo na wadya wakwingila mo uluzo mwe idizuwa dyo Kuhumula, kwaviya Yehoyada hawalekeile wahalawe wase izindima zawo. 9Vikaheza Mlavyantambiko Yehoyada niyo awenka masekulu wa mabunga ya gana maguha na nchinga nkulu na ndodo zendile za seuta Daudi zekigwe mwe Inyumba ya Zumbe Chohile. 10Niyo aika wamizi kumzunguluka seuta wakatenda na viziha vyawo mwe mikono ntendele zose, kukongela ntendele ya kwamwenyemzi kubula ntendele ya chenya ye Inyumba ya Chohile wakazunguluka imazabahu yose. 11Vikaheza Yehoyada na wanawe wa chilume niyo wamlavya kuse Yoashi mwana ywa seuta wamvika chilemba cho useuta, na kumwinka ichitabu chiwandikwe izisigilizi za Zumbe Chohile zikulongoza mo useuta. Ivyo niyo atendwa seuta. Yehoyada mlavyantambiko na wanawe wamhaka mavuta Yoashi. Wantu wose wendile aho niyo watula chizumo, “Seuta wikale kalenakale!” 12Malikiya Ataliya eze eve ulwasu lwa awantu wakamvinila seuta niyo asunguza kwingila mwe Inyumba ya Chohile, kudya awantu wendile wadugana. 13Niyo amwona seuta umhya kachimala kwe inchili ye Inyumba ya Chohile, akatenda kazungulukwa ni masekulu wakatowa magunda. Awantu wose wakaguta kwa chinyemi na mbwedo wakatowa magunda, wachemi wakatenda ne ivimpandwa vyawo vyo kuchemela wawalongoza wantu mwe ingasu, ahadya Ataliya niyo atatula izisuche zakwe na kugamba, “Wanihituka! Wanihituka!” 14Yehoyada haungile Ataliya akomelwe mndani mwe Inyumba ya Chohile, ivyo kawagamba masekulu wa awagomba nkondo ya mabunga gana, gana, “Mlavyeni kuse mgatigati mwa awagomba nkondo wamizi, chila akunga ajeze kumgombela akomwe.” 15Ivyo wamgwila, na kumwigala kwe idizumba dye chiseuta, uko weze wabule komwingilo we inchili ye izifalasi ye idizumba dya seuta niyo wamkoma.

Yehoyada avuza wantu wamvikile Chohile

2Maseuta 11:17-20

16Mlavyantambiko Yehoyada niyo adamanya lagano kugamba uyo mwenye na awantu wose na seuta nawatende wantu wa Zumbe Chohile. 17Wose niyo waita kwe inyumba yo kumvikila Baali waibogozola. Watula izimazabahu na matukulu yakwe na kumkoma Matani mlavyantambiko ywa Baali, kulongozi kwe mazabahu. 18Vikaheza mlavyantambiko Yehoyada niyo aika walavyantambiko Walawi chani wamile Inyumba ya Zumbe Chohile, saviya seuta Daudi awaikaga Walawi wasankane mwe Inyumba ya Chohile kwachausa cha kulavya ntambiko za kutikimya kwa Zumbe Chohile saviya viwandikwe mwe Isigilizi ya Musa kuno wakachema na kuvina saviya alagize seuta Daudi. 19Yehoyada iviya aikaga wamizi kwe inchili ye Inyumba ya Chohile chani anasekwingila mntu yoyose hekukile. 20Kawachisanya masekulu wa wagomba nkondo wa mabunga ya gana na vilongozi wa wantu na wantu wose mweisi na kumsindikiza seuta kulawa mwe Inyumba ya Chohile kwita kwe idizumba dye chiseuta wakajinkila Inchili yo mwingilo wa Kulanga na kumwika seuta mwe ichigoda chakwe cho useuta. 21Malikiya Ataliya eze akomwe kwa sime wantu wose niyo wamema chinyemi, umzi niyo watondowala.