Mihilimo 24

Yoashi atenda seuta ywa Yuda

2Maseuta 12:1-16

1Yoashi endaga na mihilimo mfungate umo akakonga kulongoza, alongozaga kwa mihilimo milongo mine akekala Yelusalemu. Nine naketangwa Sabiya kulawa komzi wa Beli sheba. 2Yoashi adamanyaga yedi yakumuwagila Zumbe Chohile chipindi chose mlavyantambiko Yehoyada achei mjima. 3Yehoyada niyo amloza wavyele waidi, wamwelekela wana chilume na wachiche. 4Nyumani Yoashi niyo aizenga uhya Inyumba ya Zumbe Chohile. 5Kawetanga walavyantambiko na Walawi na kuwagamba waite kwe imizi ya Yuda na kuchisanya hela kulawa kwa Waizulaeli wose wegale maliho wakungwa kuliha chila mhilimo yo kudamanyiza Inyumba ya Chohile. Kawagamba wasunguze kudamanya ivyo, mna Walawi niyo wakawa, 6elo, seuta kamwitanga Yehoyada, chilongozi ywawo, na kumgamba, “Ni mbwani huwagambile Walawi wachisanye ikodi kulawa kwa wantu wa Yuda na Yelusalemu ikigwe ni Musa, mndima ywa Zumbe Chohile alagize awantu walihe kwachausa che Idihema Dikukile dya Zumbe Chohile?” 7Wakumtimila yudya mvyele mwavu Ataliya watulaga Inyumba ya Zumbe Chohile na kwingila mndani na kujeseza iviya visentigwe kwa Zumbe Chohile kwa kumvikila mnungu Baali. 8Ivyo Seuta kalagiza Walawi wadamanye shanduku dya kuchisanyiza na kudika he inchili ye Inyumba ya Chohile. 9Niyo wegala milosi uko Yelusalemu na Yuda yose kugamba chila yumwenga aungwa egale ikodi idya ichisanywe aho nkongo ni Musa mndima ywa Zumbe Chohile kudya kwedijangwa. 10Vilongozi wose na wantu wose niyo wegala kodi zawo kwa chinyemi kubula wadimemeza idishanduku. 11Chila zuwa Walawi nawakadigala idishanduku kwa wakulu we chiseuta wendile wakadichimaila, umo wakawona dimema, mtakuwandika ywa seuta na mwambizi ywa Mlavyantambiko Mkulu nendile wakausa izihela na kudivuza idishanduku ahantu hakwe. Ivyo nawakachisanya hela zilozize. 12Seuta na Yehoyada walavya izihela izo na kuwaliha wadya awandima wendile wakavuzagiza kuzenga Inyumba ya Chohile, na kuwaliha wandima watuhu wazesi na wakusongola na wasana chuma na mafundi wa chumbu wavuzagize Inyumba ya Chohile. 13Wose awo wadamanya kwa kuhikiliza na kuvuzagiza kuizenga Inyumba ya Chohile saviya yendile nkongo, na kuitogeza. 14Eze waheze kuivuzagiza Inyumba ya Chohile, zahabu isigale ne ichumbu vinkizwa kwa seuta na Yehoyada wadamanye mabakuli na viya vya kulaviza ntambiko za kutikimya na vintu vituhu vya mayuwe ya chumbu.

Mwechipindi chose Yehoyada achei mjima malavyo ya kutikimya nayakalavigwa chila nkanana mwe Inyumba ya Chohile.

Malagizo ya Yehoyada yalemelwa

15Yehoyada eze adalahale na kubula mihilimo gana na milongo mitatu, niyo abanika. 16Niyo wamhamba mwe izimbila ze chiseuta mo Umzi wa Daudi kwa yadya ayedi adamanye mwa awantu wa Izulaeli na kwachausa cha Zumbe Chohile ne Inyumba ya Chohile. 17Yehoyada eze abanike, vilongozi wa Yuda niyo weza na kumtunya seuta Yoashi na kumluvya naye niyo evana nawo. 18Ivyo awantu niyo waleka kuvikila mwe Inyumba ya Zumbe Chohile ywa wababa zawo, na kukonga kuvikila matukulu ye milungu ya chivyele ya Ashela. Masa ayo yahosa Zumbe Chohile emukwe ni maya mwa awantu wa Yuda na Yelusalemu. 19Hatahegu Zumbe Chohile atumaga waoni chani wawafunde awantu wauye kwakwe, mna walemela kuwetegeleza. 20Vikaheza Muye wa Chohile umwingila Zekaliya mwana ywa mlavyantambiko Yehoyada. Niyo achimala kulongozi kwa wantu awagamba, “Zumbe Chohile awauzani ni mbwani mkalemela amalagizo yakwe? Elo, hamchumilwe! Kwaviya mumlemela Zumbe naye kawalemelani!” 21Mna Seuta Yoashi niyo alungana nawo wamdila njama wamkome Zekaliya, kwa malagizo ya seuta awantu niyo wamtowa mayuwe Zekaliya na kumkoma mo uwa we Inyumba ya Chohile. 22Seuta Yoashi kajala yadya yose ayedi adamanyizwe ni Yehoyada, ise dya Zekaliya, mna niyo amkoma mwanawe. Umo Zekaliya akaunga abanike agamba, “Zumbe Chohile nawone vino mkudamanya nawaliheni chikoda!”

Udumo wo ulongozi wa Yoashi

23Mo udumo wo mhilimo wagomba nkondo wa Siliya wamwebunga Yoashi na Yuda na Yelusalemu, wakoma ivilongozi wose na kutaha vintu vilozize na kuvigala kwa seuta ywawo uko Damesiki. 24Hatahegu awagomba nkondo wa Siliya wendaga wajeche, mna Zumbe Chohile, Chohile ywa wababa zawo kawenka uhuda, mwe bunga kulu dya wagomba nkondo wa Yuda kwaviya Yuda wamleka Zumbe Chohile ywa wababa zawo, elo nivyo akantilwe seuta Yoashi kujinkila Wasiliya. 25Wankondo weze wahalawe wamwasa Yoashi kalumiziswa, masekulu wakwe waidi niyo wamdila njama wamkomele holusazi, kuliha chikoda kwaviya amkomaga mwana ywa Mlavyantambiko Yehoyada. Niyo ahambwa mo Mzi wa Daudi, mna suko kwezimbila ze chiseuta. 26Awantu wamdile njama wendaga ni Zabadi mwana ywa mvyele muoni zina dyakwe naketangwa Shimeati, na Yehozabadi mwana ywa mvyele yumwenga Mmoabu idizina dyakwe naketangwa Shimliti. 27Mbuli za wanawe Yoashi zo kuvuzagiza kuzenga Inyumba ya Zumbe Chohile na uwoni wose mwakwe, ziwandikwa mwe Chitabu cha Maseuta. Mwanawe ywa chilume Kwitangwa Amaziya niyo atenda seuta ahantu hakwe.