Mihilimo 25

Amaziya Atenda seuta ywa Yuda

2Maseuta 14:2-6

1Amaziya endaga na mihilimo milongo midi na mishano umo akatenda seuta, kalongoza Yelusalemu kwa mihilimo milongo midi na chenda. Nine naketangwa Yehoadani kulawa Yelusalemu. 2Adamanyaga yakumuwagila Zumbe Chohile mna hadamanye kwa moyo uchumile. 3Amaziya eze etogeze mo useuta, niyo awakoma masekulu wamkomaga seuta tati yakwe. 4Hataivyo hawakomile awana wawo, saviya viwandikwe mwe ichitabu che izisigilizi za Zumbe Chohile amlagize Musa akamgamba, “Welesi hawakomwe kwachausa cha wavu udamanywe ni wana wawo, na wana hawakomwe kwachausa cha wavu udamanywe ni welesi wawo, mntu nakomwe kwa wavu adamanye mwenye.”

Nkondo na Waedomu

2Maseuta 14:7

5Seuta Amaziya achisanyaga wagosi wa amakabila ya Yuda na Benjamini, na kuwaika mwe mabunga ya wagomba nkondo yesimile kuligana ne zinkolo zawo, niyo awaika walongozwe ni masekulu ya maelufu na magana. Eze awakaule wadya wendile na mihilimo milongo midi na kujendeleza, wendaga laki ntatu. Wemalanyaga kwa nkondo, na wamanyi wa kujeseza maguha na nchinga. 6Seivyo niyo ongezeza wagomba nkondo watuhu wakankalu laki imwenga wa kukodisha kulawa Izulaeli, kwa yombe dya chilo zikwinga elufu ntatu za mayuwe ya chumbu. 7Mna muoni ywa Chohile ambasaga seuta na kumgamba, “Usekwita hamwenga na wano awagomba nkondo wa Izulaeli. Zumbe Chohile hehamwenga na wantu wa Izulaeli, naho hehamwenga na wano wakulawa kwedikabila dya Efulaimu. 8Hatahegu ukadaha kwita kwe nkondo na kutowana kwa ukankalu, Mungu nakutende uhudwe kwaviya Chohile nuyo mta izinguvu za kumwinka mntu uhuda hegu kumtenda ahudwe.” 9Amaziya niyo amuza uyo mntu ywa Chohile, “Mna na vitende vivihi mwe yadya amayuwe ye ichumbu hwinkile kale?” Yudya mntu ywa Chohile niyo amhitula, “Zumbe Chohile adaha kukwinka yalozize kujinka ivyo!” 10Ivyo Amaziya niyo awaleka wagomba nkondo wakodiswe wa Izulaeli na Efulaimu wauye kaya, nawo niyo wauya kaya wakatenda waweihiwa vitendese awantu wa Yuda. 11Amaziya niyo enkamoyo na kulongoza awagomba nkondo wakwe kwe dikolongo dyo munyu. Uko katowana na kuwakoma wagomba nkondo wa Edomu elufu mlongo, 12na kutaha watuhu elufu mlongo wakatenda wemeso na kuwakweza mwe mjema wa luwe uko komzi wa Seili na kuwakoma kwa kuwadula hasi mwe mayuwe kuno wakantika vihande hande. 13Mwechipindi icho wadya wagomba nkondo walemezwe ni Amaziya waitanye kwenkondo niyo wayebunga imizi ya Yuda mgati mwa Samaliya na Beti Haloni na kuwakoma wagosi elufu ntatu na kutaha vintu vilaozese. 14Amaziya eze auye kulawa kokuwahuda Waedomu, niyo eza na matukulu ya Edomu na kuyatenda milungu yakwe na kuyavikila na kuyavunkiziza ubani. 15Zumbe Chohile niyo emukwa ni maya, egala muoni kwa Amaziya. Muoni niyo amuza Amaziya, “Ni mbwani wavikila milungu ya chijeni heikuaha kukombola awantu wawo kulawa mwe imikono yako?” 16“Ahadya muoni henati kubinda ukulonga,” Amaziya niyo ampwela amgamba, “Nyamala! Chikwika ini utende mlangilizi ywa seuta? Weye walonda file!” Muoni niyo agamba, “Haluse sivimanya kugamba Chohile kalamula akukome kwaviya kudamanya yano yose na kubela amalagizo yangu niyo anyamala.”

Nkondo na wagomba nkondo wa Izulaeli

2Maseuta 14:8-20

17Seuta Amaziya ywa Yuda eze alosane na awalangilizi wakwe wegala ulosi kwa Yehoashi mwana ywa Yehoahazi mwana ywa Yehu seuta ywa Izulaeli, amgamba, “So chigombe nkondo.” 18Mna Yehoashi seuta ywa Izulaeli amhitula Amaziya, “Zuwa dimwenga mshongoma wa Lebanoni uugamba mwelezi wa uko Lebanoni, ‘Mloze mchiche ywako kwa mwanangu.’ Mna kala dimwenga dilawa kumbago na kujatajata umshongoma uwo. 19Haluse weye Amaziya weduvya kugamba kuwahuda Waedomu, mna nakulangiliza wikale kukaya. Ni mbwani walonda nkumbizi ikunga ikwigaile file na awantu wako wa Yuda?” 20Mna Amaziya kalemela kumwetegeleza. Uwo wendaga mwalo wa Zumbe Chohile kwa Amaziya ahudwe, kwaviya avikilaga milungu ya matukulu ya Waedomu. 21Ivyo seuta Yoashi ywa Izulaeli kaita kumwebunga seuta Amaziya ywa Yuda. Wadugana uko Beti Shemeshi mwe isi ya Yuda, 22wagomba nkondo wa Yuda niyo wahudwa, chila yumwenga asumkila kwe ikaya yakwe. 23Yehoashi seuta ywa Izulaeli niyo amtaha Amaziya seuta ywa Yuda mwana ywa Yoashi mwana ywa Ahaziya uko Betishemashi. Akaheza kamwigala Yelusalemu na kubogozola ichiwambaza cho mzi wa Yelusalemu kukongela kwenchili ya Efulaimu kubula ko mwingilo wa mnkanda, ntendele ina utali wa mita magana maidi. 24Kaguha zahabu yose na mayuwe ya chumbu na vimpandwa vyoseni vyendile mwe Inyumba ya Chohile navikamilwa ni Obedi Edomu, na ugoli mwe idizumba dye chiseuta na awantu watahigwe wauya komzi wa Samaliya. 25Seuta Amaziya ywa Yuda ekalaga mihilimo mlongo na mishano eze abanike seuta Yehoashi mwana ywa seuta Yehoahazi seuta ywa Izulaeli. 26Mbuli ntuhu zo useuta wa Amaziya kukongela nkongo kubula udumo wakwe ziwandikwa mwe chitabu cha Maseuta wa Yuda na Izulaeli. 27Mwalo wa kumkoma Amaziya udamanywa komzi wa Yelusalemu eze ahitukile na kuleka kumtimila Zumbe Chohile, niyo asumkila Lakishi, mna niyo wasigila wantu wambase uko Lakishi na kumkomela uko. 28Umwili wakwe niyo wegalwa Yelusalemu kwa falasi na kuhambwa mwe izimbila ze chiseuta mo Mzi wa Daudi.