Mihilimo 26

Uziya atenda seuta ywa Yuda

2Maseuta 14:21-22; 2Maseuta 15:1-7

1Vikaheza awantu wose wa Yuda niyo wamguha Uziya, mwana ywa Amaziya endile na mihilimo mlongo umwenga na mtandatu wamtenda seuta hantu ha tati yakwe Amaziya. 2Ise eze abanike niyo ataha umzi wa Elati na kuvuzagiza kuuzenga uhya. 3Uziya endaga seuta akatenda na mihilimo mlongo umwenga na mtandatu, na kulongoza akekala Yelusalemu kwa mihilimo milongo mishano na midi. Nine naketangwa Yekoliya kulawa Yelusalemu. 4Katimila lujendo lwedi lwa tati yakwe Amaziya kudamanya yedi yakumuwagila Zumbe Chohile. 5Uziya kamsankanila Zumbe Chohile kwa ukanuni umo Zekaliya achei mjima, Zekaliya nuyo amhinyize seuta kumtimila Chohile. Umo akamtimila Chohile, Chohile kamjimbika seuta. 6Uziya aitaga kwe nkondo akatowana na Wafilisiti. Niyo abogozola iviwambaza vye imizi ya Gati na Yabune na Ashidodi na kuzenga uhya imizi ihaguhi na Ashidodi na kusigala kweisi ya Wafilisia. 7Chohile kamwambiza kuwahuda Wafilisiti na Walabu wendile wakekala mweisi ya Gulibaali na Wameuni. 8Waamoni nendile wakamliha kodi Uziya, niyo amanyikisa na kutenda na nguvu kubula komhaka wa Misili. 9Uziya ketogeza niyo azenga minala uko Yelusalemu mnkanda mo Mwingilo wa Kwedikolongo na Mpezo. 10Iviya azengaga minala kwedijangwa na kusimba masima yalozize, kwaviya endaga na ludimo lukulu kwe ntendele inukile na ntendele mo luwala. Kwaviya nakaungisa chilimo, kawaluvya wantu wahande mizabibu mwa wagulu na kulima mwe ulongo wedi. 11Ukaleka ayo Uziya endaga na wagomba nkondo wemalanye kwa nkondo. Wendaga wapangwa mwe mabunga yesimile, mazina yawo yawandikagwa na kwikwa ni mtakuwandika Yeieli na Maaseya, sekulu ywawo endaga ni Hananiya yumwenga mwa masekulu wa seuta. 12Vilongozi wose wa wagomba nkondo wendaga elufu mbili na magana mtandatu. 13Hasi hawo kwendaga na wagomba nkondo laki ntatu na elufu mfungate na magana mashano. 14Uziya awenkaga awagomba nkondo awo nchinga na maguha na nkofiya za chuma na makoti ya chuma kugubika ichifuwa na mita na nkumba yuwe. 15Uko Yelusalemu wantu wata ubala wadamanyaga chimpandwa cha kudwila mifulo na mayuwe makulu kulawa mwe minala na mlanga mwe zimpembe ze iviwambaza vyo umzi. Ubala wakwe niyo wazagala chila hantu, niyo atenda na nguvu zitendese kwaviya kahokela wambizi kulawa kwa Chohile.

Uziya akantilwa kwa wefenyi wakwe

16Mna seuta Uziya eze atende na nguvu, niyo atenda na wefenyi umwigaile ukugwa kwakwe. Kaswesa uzumizi kwa Zumbe Chohile, Chohile ywakwe kwa kwingila mwe Inyumba ya Chohile chani avunkize ubani mwa mazabahu. 17Azaliya mlavyantambiko akatenda na walavyantambiko wakankalu milongo mnane, niyo wambasa seuta, 18na kumchinda. Wamgamba, “Uziya! Hukungwa ukavunkiza ubani kwa Zumbe Chohile, walavyantambiko wo ulukolo lwa Haluni awodu nawo wasentigwe kuvunkiza ubani. Halawe hano ahantu hakukile. Wamhiga Zumbe Chohile naho hotunywe.” 19Uziya nendile kachimala hadya he Inyumba ya Chohile haguhi ne mazabahu katoza chetezo cho kabakuli kachumbu kakuvunkiziza ubani mwe mikono yakwe. Kawehiwa walavyantambiko, ahadya niyo engilwa ni matana mo uso. 20Azaliya Mlavyantambiko mkulu na wadya walavyantambiko watuhu, weze wamwone ana matana mo uso wasunguza kumlavya kuse, hata mwenye kasunguza kufosa mwe Inyumba ya Chohile. Kwaviya Chohile kamkantila. 21Seuta Uziya endaga na matana kubula abanika. Ekalaga mwe nyumba yechedu kwaviya hazumilwe vituhu kwingila mwe Inyumba ya Zumbe Chohile. Mwanawe ywa chilume akwitangwa Yotamu niyo atunduliya idizumba dye chiseuta iviya kawalongoza awantu mwe isi. 22Ntendwa ntuhu zose adamanye seuta Uziya kukongela nkongo kubula mo udumo wakwe, ziwandikwa ni muoni Isaya mwana ywa Amozi. 23Uziya abanikaga na kuhambwa hantu wakuhambwa maseuta, mna sumo mwe izimbila ze ichiseuta kwaviya endaga na matana. Mwanawe Yotamu niyo atenda seuta ahantu hakwe.