Mihilimo 27

Yotamu atenda seuta ywa Yuda

2Maseuta 15:32-38

1Yotamu endaga seuta akatenda na mihilimo milongo midi na mishano, kalongoza akekala Yelusalemu kwa mihilimo mlongo umwenga na mtandatu. Nine naketangwa Yelusha mchiche ywa Sadoki. 2Kadamanya yedi kulongozi kwa Zumbe Chohile saviya adamanye tati yakwe Uziya, mna yeye mwenye hengile mwe Inyumba ya Chohile na kuvunkiza ubani, mna awantu wakajendeleza kudamanya wavu. 3Yotamu nuyo azengile Inchili ntendele ya chenya ye Inyumba ya Chohile na kudamanyisa ndima zo uzesi we ichiwambaza cho mzi wa Yelusalemu ntendele ikwitangwa Ofeli. 4Azengaga mizi mwe isi ya awagulu ya Yuda na kwezimbago kazenga ngome na minala. 5Katowana na seuta ywa Amoni na kumhuda uyo hamwenga na awagomba nkondo wakwe. Mo mhilimo uwo Waamoni niyo wamliha kodi ya chilo zikwinga elufu nne na tani zikwinga elufu imwenga za ngano na chilo zikwinga elufu imwenga za shaili, wajendeleza kumliha mhilimo wa kaidi na wakatatu. 6Yotamu niyo ajendeleza kutenda na nguvu, kwaviya nakamwiva Zumbe Chohile, Chohile ywakwe. 7Ntendwa ntuhu za Yotamu nkondo agombile na ulongozi wakwe vyose viwandikwa mwe Ichitabu che Izimbuli za Maseuta wa Izulaeli na Yuda. 8Yotamu endaga na mihilimo milongo midi na mishano umo akakonga kutenda seuta, kalongoza akekala Yelusalemu kwa mihilimo mlongo umwenga na mtandatu. 9Kabanika na kuhambwa mo Mzi wa Daudi na mwanawe ywa chilume Ahazi niyo aguha ahantu hakwe kutenda seuta.