Mihilimo 28

Ahazi atenda seuta ywa Yuda

2Maseuta 16:1-4

1Ahazi akongaga kutenda seuta akatenda na mihilimo milongo midi, kalongoza Yelusalemu kwa mihilimo mlongo umwenga na mtandatu. Hatimile umliganyo wedi wa babakwe seuta Daudi, mna kadamanya mbuli zimwihize Zumbe Chohile, 2katimila lujendo lwihiye lwa maseuta wa Izulaeli. Ukaleka ivyo kadamanya matukulu ya kusana ya zahabu ya kumvikila mnungu Baali. 3Iviya kavunkiza ubani mwe dikolongo dya Beni Hinomu na kuwalavya ntambiko wanawe wa chilume kwa kuwatikimya moto, katimila mazwela yehiye ya wadya awantu Zumbe Chohile abalaze mweisi umo Waizulaeli wakengila mweisi iyo. 4Alavyaga ntambiko na kuvunkiza ubani hantu ha kuvikila milungu mituhu kwa wagulu na hasi he chila mti una mani maisi.

Wayuda wahudwa ni Wasiliya na Izulaeli

2Maseuta 16:5

5Kwaviya seuta Ahazi na kakola masa, ivyo Zumbe Chohile, Chohile ywakwe kamleka seuta ywa Siliya amhude na kutaha wantu wakwe walozize na kuya nawo Damasikasi. Naho kawatenda wahudywe ni seuta ywa izulaeli, yudya akomaga wantu wakwe walozize. 6Peka mwana ywa Lemaliya kwa zuwa dimwenga akomaga wagomba nkondo wakankalu gana dimwenga na milongo midi elufu mwa Yuda. Vilaila ivyo kwaviya nendile wamleka Zumbe Chohile, Chohile ywa wababa zawo. 7Zikili mgomba nkondo mkankalu ywa Izulaeli, amkomaga Maaseya mwana ywa seuta Ahazi na Azikilimu sekulu ywe idizumba dye chiseuta na Elikana ywa kaidi akalawa seuta kwo ukulu. 8Hatahegu Wayudea wendaga walukolo wawo, Waizulaeli watahaga wantu laki mbili wavyele hamwenga na wana chilume na wachiche. Wawaguha kubula Samaliya hamwenga na ugoli ulozese watahile.

Muoni Odedi awakwahila wagomba nkondo wa Izulaeli

9Nyumani, muoni yumwenga ywa Zumbe Chohile akwitangwa Odedi akwikala komzi wa Samaliya. Afosaga kuwasingila wagomba nkondo wa Izulaeli hamwenga na wadya watahigwe wa Yuda wendile wehaguhi na kwingila komzi wa Samaliya, niyo awagamba, “Zumbe Chohile, Chohile ywa wababa zenyu nendile kajelwa maya ni wantu wa Yuda nivyo vilekile kawatendani muwahude, mna muwakoma chimaya. Mbuli iyo Zumbe Chohile kaiva. 10Haluse mwaunga muwatende watumwa wenyu awantu wa Izulaeli na Yuda. Hammanyize kugamba nyuwe nanywi na mkola masa mwa Zumbe Chohile, Chohile ywenyu? 11Nitegelezani! Wano awafungwa ni walukolo wenyu. Walekeni wauye kwawo, hegusivyo Zumbe Chohile nawakantileni kwa maya yakwe.” 12Wakulu wasiku mwa Efulaimu, kugamba, Azaliya mwana ywa Yehohanani na Belekiya mwana ywa Meshilemoti na Yehizikiya mwana ywa Shalumu na Amasa mwana ywa Hadilayi, niyo wevana na uyo muoni na kuwahiga izi ntendwa za wadya wagomba nko awo wendile wakengila kulawa kwe nkondo. 13Wawagamba, “Msekuwaleta awo watahigwe hano! Chikola masa kale kulongozi kwa Zumbe Chohile naho chimwihiza vitendese chani achikantile, nimbwani mwaunga mdamanye mbuli ikunga ichihose masa yetu yongezekele?.” 14Ivyo awagomba nkondo niyo wawalekeila awo watahigwe na viya watahile vyose kulongozi kwa amasekulu no umdugano wose. 15Elo, wadya amasekulu watajigwe amazina yawo niyo wawaguha awo watahigwe na kulawana na viya vitahigwe waguha suche na kuwavisa wadya wendile wemwazi. Niyo wawenka nkande na vyakunywa na makwapa na kuwajela mavuta ya mizeituni mwe izinkwenje zawo. Wadya wendile wasokelesa niyo wawakweza mwe mpunda na kuwavuza wose uko Yeliko, umzi we mitende. Vikaheza niyo wowo wauya Samaliya.

Ahazi alombeza Wambizi kwa Washulu

2Maseuta 16:7-9

16Mwe ichipindi icho seuta Ahazi niyo atuma walosi wakalombeze wambizi kwa seuta ywa Ashulu, 17kwaviya Waedumu naweza vituhu na kuyebunga isi ya Yuda na kuwahuda na kutaha wantu walozize. 18Mwe ichipindi icho Wafilisiti nendile wayebunga imizi yendile hasi mwa awagulu wa Yuda na Negebu. Wataha imizi ya Beti Shemeshi na Ayaloni na Gedeloti na Soko hamwenga ne ivijiji vyakwe, Timna ne ivijiji vyakwe na Gimzo ne ivijiji vyakwe na kwikala uko. 19Kwaviya seuta Ahazi ywa Yuda nendile akawadamanyiza yehiye awantu wakwe na kuswesa uwagila kwa Zumbe Chohile niyo awatenda awantu wa Yuda waswese ukanuni na kudamanya masa. 20Ivyo Tigilati Pileseli seuta ywa Ashulu niyo amtubwanisa vitendese akaleka kumwambiza. 21Ahazi niyo aguha izahabu mwe Inyumba ya Chohile na kulawa mwe izinyumba ze chiseuta na mwe izinyumba ze ivilongozi na kumwinka seuta ywa Ashulu saviya kodi vileke amwambize, mna seuta ywa Ashulu kalemela kumwambiza.

Masa za Ahazi

22Seuta Ahazi umo endaga mwe masulumizo, seuta Ahazi kajendeleza kumkola masa Zumbe Chohile. 23Kailaviza ntambiko imilungu ya Siliya iyo imhudile kwe nkondo akagamba, “Kwaviya imilungu ya Siliya iwambiza amaseuta wa Siliya nailaviza ntambiko mafani yadaha inambize.” Mna mbuli ivyo imwigaila ukomi mwakwe hamwenga na awantu wakwe wa Yuda. 24Kwa kongezeza, niyo aguha ivintu vyose vyendile mwe Inyumba ya Chohile na kuvitula vihandehande. Niyo avugala izinyivi ze Inyumba ya Chohile na kwezengela mazabahu mwe chila mpembe zo umzi wa Yelusalemu. 25Naho chila mzi wa Yuda kadamanya hantu henuke ha kuvunkiziza ubani na kuvikila milungu mituhu na kulaviza ntambiko za kutikimya. Kwa kudamanya ayo kamjela maya Zumbe Chohile, Chohile ywa wababa zakwe. 26Ntendwa zakwe ntuhu zo useuta wakwe adamanye kukongela nkongo kubula udumo viwandikwa mwe Ichitabu cha Maseuta wa Yuda na Izulaeli. 27Seuta Ahazi abanikaga na kuhambwa komzi wa Yelusalemu mna sumo mwe izimbila za maseuta wa Izulaeli. Mwanawe Hezekiya niyo atenda seuta hantu hakwe.