Mihilimo 29

Hezekiya ateda seuta ywa Yuda

2Maseuta 18:1-3

1Hezekiya akongaga kutenda seuta akatenda na mihilimo milongo midi na mishano, katawala akekala Yelusalemu kwa chipindi cha mihilimo milongo midi na chenda. Nine naketangwa Abija mchiche ywa Zekaliya. 2Kadamanya yedi kulongozi kwa Zumbe Chohile saviya adamanye Daudi babakwe.

Kukukizwa kwe Inyumba ya Chohile

3Mo mwezi wa nkongo wo mhilimo wa nkongo wo useuta wakwe, seuta Hezekiya afungulaga izinchili ze Inyumba ya Chohile na kuivuzagiza uhya. 4Niyo awachisanya na kuwengiza walavyantambiko na Walawi mwe ibalaza ntendele ya ulailo wa zuwa we Inyumba ya Chohile, 5na kuwagamba, “Nyuwe Walawi netegelezani kwekukizeni na kuikukiza Inyumba ya Chohile, Chohile ywa wababa zenyu. Usani chila chintu chizavu hechikumuwagila Zumbe kulawa mwe Inyumba ya Chohile. 6Kwaviya wababa wetu wamlemelaga Zumbe Chohile, Chohile ywetu na kudamanya yehiye. Wamleka Zumbe Chohile na kuhakanda mgongo hantu akwikala we Inyumba ya Chohile. 7Iviya wavugalaga izinyivi zo ukumbi we Inyumba ya Chohile, na kukoma izita naho hawavunkize ubani hegu kulavya ntambiko za kutikimya hantu hakukile mwe Inyumba ya Chohile ywa Izulaeli. 8Kwachausa icho Zumbe Chohile kengilwa ni maya vitendese mwa awantu wa Yuda na Yelusalemu, yadya awadamanyize yawehelesa na kuwogofya awantu wose. Mbuli zose zino mzimanya vyedi saviya mkuwona wenye kwa meso yenyu. 9Kwachausa icho nivyo vilekile watati zetu wakomwa kwe nkondo na wavyele wetu na wenetu watahwa.” 10“Haluse siwona nike lagano na Zumbe Chohile, Chohile ywa Izulaeli, chani asekujendeleza kuchihiwa. 11Ivyo wanangu, mnase kubela imbuli ino. Kwaviya Zumbe Chohile kawasagulani nyuwe chani mumsankanila, na kuwalongoza wantu wakwe mo kumvikila na kumvunkiziza ubani.” 12Walawi wakutimila niyo wakonga ndima, kulawa mo lukolo lwa Kohati wendaga ni Mahati mwana ywa Amasai na Yoeli mwana ywa Azaliya, mo lukolo lwa Melali, Kishi mwana ywa Abudi na Azaliya mwana ywa Yehaleli, kulawa kwa Wagelishoni, ni Yoa mwana ywa Zima na Edeni mwana ywa Yoa, 13Ulukolo lwa Elisafani ni, Shimoli na Yeneli na lukolo lwa Asafu ni Zekaliya na Mataniya, 14Ulukolo lwa Hemani ni Zekaliya na Matani na ulukolo lwa Yedutuni, ni Shemaya na Uzieli. 15Wano niyo wawachisanya awalukolo wawo Walawi, wakaheza niyo wekukiza. Wengila na kudamanya saviya seuta alagize, wakonga kuikukiza Inyumba ya Chohile, kuligana na sigilizi ya Zumbe Chohile. 16Walavyantambiko niyo wengila mwe Inyumba ya Chohile chani waikukize na kuvyusa ivintu vizavu vyose hevikumuwagila Zumbe Chohile na kuvika kouwa. Walawi niyo wavigala ivintu ivyo kwe dikolongo dya Kiduloni. 17Wakongaga indima yo kuikukiza Inyumba ya Chohile mwe idizuwa dya nkongo dyo umwezi wa nkongo kubula idizuwa dya mnane niyo wabinda indima yose hamwenga no ukumbi. Niyo wadamanya ndima kwa mazuwa mnane matuhu kubula zuwa dya mlongo na mtandatu dyo umwezi uwo, chila chintu niyo chaheza.

Inyumba ya Chohile yakukizwa vituhu

18Walawi niyo wambasa seuta Hezekiya wamgamba, “Chikukiza kale Inyumba ya Chohile, hamwenga ne izimazabahu zo kulaviza ntambiko za kutikimya ne imeza ye imikate ikukile na iviya vyose. 19Naho chivuza ivintu vyose viya seuta Ahazi ausaga umo mo utawala wakwe, umo amhitukaga Zumbe Chohile, chivikukiza na kuvivuza. Vyose vitende vya Zumbe Chohile chivika kulongozi kwe imazabahu ya Zumbe Chohile.” 20Mtondo zuwa ditimile seuta Hezekiya niyo awachisanya vilongozi wo mzi aita nawo kwe Inyumba ya Zumbe Chohile. 21Wegala njeku mfungate na ndolome mfungate na wadolome mfungate na mavulata mfungate, zitende ntambiko ya kusa masa ya welekwa we izinkolo ze chiseuta na Ahantu Hakukile na awantu wa Yuda. Aho seuta niyo awagamba walavyantambiko welekwa wa Aloni watikimye awanyama awo mlanga mwe imazabahu ya Zumbe Chohile. 22Walavyantambiko niyo wakonga kuchinja amajeku na kumwagila sakame yawo mlanga mwe mazabahu, vikaheza wachinja izindolome na kumwagila sakame yawo mlanga mwe mazabahu, niyo wachinja wana ngoto na kumwagila sakame yawo mlanga mwe mazabahu. 23Vikaheza niyo wegala yadya amavulata mfungate yo kusiza masa haguhi na seuta na wantu wose wendaga aho, nawo niyo waika imikono yawo mlanga mwa amavulata ayo. 24Ivyo walavyantambiko niyo wachinja yadya amavulata na kumyaga isakame yawo mlanga mwe imazabahu chani itende ntambiko ya kusa masa kwachausa cha wivano kwa Waizulaeli wose, kwaviya seuta Hezekiya alagizaga ilavigwe ntambiko ya kutikimya na ntambiko ya kusa masa kwachausa cha Waizulaeli wose. 25Seuta niyo atimila amalagizo ya Zumbe Chohile amwinkile seuta Daudi kwa sila ya Gadi muoni ywa seuta na muoni Nasani. Ivyo kawaika Walawi mwe Inyumba ya Zumbe Chohile wasiku wawo wakatenda na malimba na watuhu magunda na watuhu vilangu. 26Walawi niyo wachimala ne vimpandwa vyawo vyo kuchemela vya seuta Daudi hamwenga na walavyantambiko niyo wachimala na amagunda yawo. 27Hezekiya niyo alagiza lavyo dyo kutikimya dilavigwe mlanga mwe imazabahu, hadya intambiko iyo ize ikonge kulavigwa, awantu awo niyo wakonga kumchemela ntogozi Zumbe Chohile, wachemi watowa amagunda na vimpandwa vituhu vyose. 28Wantu wose wendile hadya niyo walungana mo kuvika, kuno wachemi wajendeleza kuchema na kutowa amagunda yawo kubula wabinda kulavya izintambiko izo zo kutikimya. 29Vikaheza seuta Hezekiya hamwenga na awantu wose wendile aho niyo wafikamadi na kumvikila Zumbe Chohile. 30Vikaheza seuta Hezekiya ne vilongozi wawagamba Walawi wamtogole Zumbe Chohile kwa nchemo za ntogozi achemile seuta Daudi na muoni Asafu. Ivyo awantu wose niyo wamtogola Chohile kwa chinyemi wafika madi kubula hasi na kumvikila. 31Hezekiya niyo awagamba awantu, “Kwaviya haluse mwekukiza kale sogelani hajihi leteni malavyo na majeleko ya ntogozi mwe Inyumba ya Zumbe Chohile.” Ivyo, wantu niyo wegala malavyo yawo na malavyo ya ntogozi na malavyo ya kutikimya, wantu wose kwa moyo wa kunga wenye niyo walavyantambiko za kutikimya. 32Ntambiko zo kutikimya wegala chahamwenga zendaga majeku milongo mfungate na ndolome gana na wadolome magana maidi zose izo zitenda malavyo ya kutikimya kwa Zumbe Chohile. 33Wanyama wasentigwe kwa malavyo ya kutikimya wendaga majeku magana mtandatu na ndolome na mbuzi elufu ntatu. 34Kwaviya walavyantambiko wendaga wajeche, wadunduga kusangula awanyama wose, ivyo walukolo wawo Walawi niyo wawambiza kubula indima iyo isila. Ichipindi wongezekela walavyantambiko watuhu niyo wekukiza. Walawi nendile ni wakanuni mo kwekukiza kujinka walavyantambiko. 35Ukaleka amalavyo ayo yalozize yo kutikimya, iviya kwendaga na mavuta ya malavyo ya utondowazi iviya kwendaga na malavyo ya kunywegwa yendaga hamwenga na malavyo ya kutikimya. Ivyo mbuli zo kuvika niyo zakongwa vituhu mwe Inyumba ya Chohile. 36Seuta Hezekiya na awantu wose niyo wamemwa ni chinyemi kwachausa cha yose yadya wadamanyizwe ni Zumbe Chohile, kwaviya mbuli izo zidamanyika kwa chipindi chijihi.