Mihilimo 30

Hezekiya emalanya kwa ngasu ya Pasaka

1Seuta Hezekiya kawegaila ulosi wantu wose wa Izulaeli na Yuda, naho kawawandikila baluwa wakaya wa Efulaimu na Manase, akawagoneka wose weze mwe Inyumba ya Zumbe Chohile uko Yelusalemu chani weze wavine Pasaka kwa ntunyo ya Zumbe Chohile, Chohile ywa Izulaeli. 2Seuta na masekulu wendile wechisanya wose ko mzi wa Yelusalemu niyo weza kuvina ingasu ye Pasaka mo mwezi wa kaidi, 3hawavinile ingasu ye Pasaka mwe ichipindi chakwe chizweleke, kwaviya mligano wa walavyantambiko wekukize nendile ni wajeche, awantu nawo nendile hawenati kwechisanya uko Yelusalemu. 4Ivyo imbuli ino imwelela seuta hamwenga na awantu wose wechisanye, 5niyo wegala ulosi kuwagoneka awantu wose mwe isi ya Izulaeli, kukongela Beli Sheba ntendele ya chenya kubula Dani ntendele ya kwamwenyemzi, wakawetanga awantu weze Yelusalemu wavine Pasaka ya Zumbe Chohile, Chohile ywa Izulaeli. Pasaka saiyo nendile hainati ivinwe ni wantu walozize saviya awo kwa chipindi chitali kutimilana na viya viwandikwe. 6Kwa sigilizi ya seuta na masekulu, walosi wegale baluwa mwe isi yose ya Izulaeli na Yuda zikagamba,

“Nyuwe watu wose wa Izulaeli mhonile kwe nkondo ya maseuta wa Wasiliya. Muwiyeni Zumbe Chohile, Chohile ywa Ibulahimu na Isaka na Izulaeli, chani naye awawiyeni msigale mhonile kulawa mwe imikono ya maseuta wa Ashulu. 7Msekutenda saviya wababa zenyu na walukolo wenyu wadya hawendaga wakanuni kwa Zumbe Chohile wa wababa zawo, saviya muwone wenye kawakantila vitendese. 8Msekutenda wankani saviya wendaga wababa zenyu, mna mtegelezeni Zumbe Chohile, soni mwe Inyumba yakwe akukize kale na kale, mvikileni Zumbe Chohile, Chohile ywenyu anase kuwehiwani. 9Mnamuwiya Zumbe Chohile, wadya wawatahaga awalukolo wenyu na wanenyu nawawonele mbazi na kuwalekeila wauye mwe isi ino. Kwaviya Zumbe Chohile, Chohile ywenyu ni ywedi na mta mbazi, uneva mnamuwiya nawahokeleni.” 10Ivyo walosi awo niyo waita kulawa mzi umwenga kwita mzi mtuhu mwe isi yose ya Efulaimu na Manase, wabula kweisi ye idikabila dya Zabuloni, mna awantu niyo wawaseka na kuwatila. 11Hataivyo wantu wasiku mwa amakabila ya Asheli na Manase na Zabuloni wanyanyahalaga niyo weza Yelusalemu. 12Chohile kawatenda awantu mwe isi ya Yuda walungane waunge kutimila na kudamanya yadya Zumbe Chohile awalagize wadamanye, mbuli ziya seuta na masekulu wawagambile wazidamanye kuligana na ulosi wa Zumbe Chohile.

Ngasu ya Pasaka

13Wantu walozese niyo welunga komzi wa Yelusalemu mo mwezi wakaidi kwe ingasu ye mikate heijeligwe hamila. 14Wakonga ndima kwa kusa izimazabahu zose zendile uko Yelusalemu ne izintuhu zose zendile zikajeseza kuvunkiziza ubani na kuzidula mwe idikolongo dya Kiduloni. 15Mwe idizuwa dya mlongo na nne dyo umwezi uwo wa kaidi niyo wachinja mwana ngoto ywe Pasaka. Walavyantambiko na Walawi wendile hawekukize wawonaga soni, niyo wekukiza na kwigala malavyo ya kutikimya mwe Inyumba ya Zumbe Chohile. 16Waguha ahantu hawo mwe Inyumba ya Chohile kuligana ne izisigilizi za Musa mndima ywa Chohile. Walawi niyo wawenka isakame ye intambiko kwa walavyantambiko, nawo niyo waimyagila mwa amazabahu. 17Kwaviya wantu walozize nendile hawekukize, vileka Walawi wawachinjiza wanangoto we Pasaka na kuwakukiza kwa Zumbe Chohile. 18Hatahegu wantu walozize mwe wadya walaile Efulaimu na Manase na Isakali na Zabuloni, nendile hawekukize nawakavina Ipasaka hewetimile saviya amalagizo yawandikwe, mna seuta Hezekiya kawalombezeza akagamba, “Zumbe Chohile mta wedi mlekeile chila yumwenga adamanye ivyo, 19wadya wose wakulombeza kwa moyo wose weye Zumbe Chohile, Chohile ywa wababa zawo hata hegu hawekukize kuligana ne izisigilizi ze Inyumba ya Chohile.” 20Chohile niyo ahitula amalombezo ya Hezekiya na kuwalekeila awantu awo. 21Waizulaeli wose wendile wechisanya uko komzi wa Yelusalemu wavina ingasu ye mikate heijeligwe hamila kwa mazuwa mfungate kwa chinyemi kitendese, Walawi na walavyantambiko niyo wamtogola Zumbe Chohile chila zuwa kwa nguvu zawo zose. 22Hezekiya kawatogola na kuwajela moyo Walawi.

Kwaviya wadamanyisa vyedi kwa umanyi ulozese mo kumvikila Zumbe Chohile. Wantu niyo wadya nkande ye ingasu kwa mazuwa mfungate, wakalavya ntambiko za utondowazi na ntogozi kwa Zumbe Chohile ywa wababa zawo.

Ngasu ya Kaidi ye Pasaka

23Wantu wose niyo walamula kujendeleza ne ingasu kwa mazuwa mfungate. Ivyo niyo wajendeleza kuvina kwa chinyemi. 24Seuta Hezekiya ywa Yuda niyo awenka wadya wantu wechisanye majeku elufu imwenga na ngoto na mavulata elufu mfungate, seivyo masekulu nawo niyo wawenka majeku elufu imwenga na ngoto elufu mlongo umwenga. Walavyantambiko walozize niyo wekukiza. 25Chila mntu ezile aho kelelwa vidala, awantu wose wa Yuda walavyantambiko na Walawi na wantu walaile Izulaeli na wekazi wajeni kulawa Izulaeli na Yuda wa Yelusalemu wose ni welelwa vitendese. 26Kwendaga na chinyemi chikulu mo mzi wa Yelusalemu kwaviya hakwalailaga mbuli saino kulawa mwa seuta Sulemani mwana Daudi seuta ywa Izulaeli. 27Walavyantambiko na Walawi niyo wachimala wawalombezeza wantu wose ujimbiko kwa Zumbe Chohile naye kulawa kowikazi wakwe kwembingu niyo awajimbika.