Mihilimo 31

Hezekiya awatenda wantu wamvikile Chohile

1Ngasu ize iheza, wantu wose wa Izulaeli niyo waita chila mzi uko Yuda na kutula izinguzo za amayuwe na kutulatula amatukulu ya Ashela mnungu ywa chivyele. Iviya wabalanga izimazabahu na hantu henukile hakuvikila milungu mituhu, mbuli izo wazidamanya mwe izisi za Yuda na mweisi ya Benjamini na mweisi ya Efulaimu na Manase, wose niyo wauya kwezikaya zawo. 2Seuta Hezekiya kawaika uhya walavyantambiko na Walawi mwe mabunga, chila yumwenga kamwinka ndima siku ya kudamanya mwe Inyumba ya Zumbe Chohile. Ndima izo ni hamwenga na kulavya ntambiko za kutikimya na ntambiko za utondowazi na kutunya na kuchema ntogozi mwe izinchili ze Inyumba ya Chohile. 3Kulawana no uludimo lwakwe mwenye seuta kalavyaga wanyama watende malavyo ya kutikimya mtondo na chisingi na malavyo ya kutikimya kwa mazuwa ya Kuhumula na Ngasu zo Umwezi Ukatontomoka, na ngasu ntuhu zilagizwe kuligana ne izisigilizi za Zumbe Chohile. 4Kwa kongezeza, seuta awagambilaga awekazi wa Yelusalemu walavye hantu hakuwagila walavyantambiko na Walawi, chani welavye vyedi mwe izindima ze izisigilizi za Zumbe Chohile. 5Aho idilagizo idyo dize dilavigwe, awantu wa Izulaeli niyo walavya vitendese malimbulo ya uhule na divai na mavuta ya mzaituni na uchi hamwenga na ulozo wesimile ulaile mwe izinkonde, na malavyo ya fungu dya mlongo yalozize ya chila chintu. 6Wantu wa Izulaeli na Yuda wendile wakekala mwe imizi ya Yuda niyo wegala malavyo yawo ya mlongo ya ng'ombe na ngoto, naho wegala vintu vilozize na kuvisenta mafungufungu kwa Zumbe Chohile, Chohile ywawo. 7Wakonga kudamanya yano mo mwezi wa katatu na kubindiliza mo mwezi wa mfungate. 8Seuta Hezekiya na masekulu weze wawone yadya amalavyo ivyo yalozize niyo wamtogola Zumbe Chohile na kuwajimbika awantu wakwe wa Izulaeli. 9Seuta Hezekiya niyo alonga na walavyantambiko na Walawi mwa amalavyo ayo, 10Azaliya Mlavyantambiko Mkulu kulawa mo ulukolo lwa Sadoki niyo amhitula, “Kukongela hadya wantu wakongile kuleta malavyo yawo mwe Inyumba ya Chohile, chitenda na nkande ilozize na mpamba ilozese kwaviya Zumbe Chohile kawajimbika awantu wakwe, nivyo vikuleka chipata ivintu vino vyose.” 11Hezekiya niyo alavya lagizo dya kuzenga hazina mwe iviwasa vye Inyumba ya Chohile, niyo wazenga, 12vikaheza wazumile niyo waika amalavyo yawo ya mafungu ya mlongo na vintu visentigwe, niyo wamwika Mlawi akwitangwa Konaniya atende sekulu ywe ivintu ivyo, na Shimei mlukolo ywakwe, atende mwambizi ywakwe. 13Walawi wasagulwe ni seuta Hezekiya watende wambizi wa Konaniya na Shimei mwe Inyumba ya Chohile ni Yehieli na Azaziya na Nahati na Asaheli na Yelemoti na Yozabadi na Elieli na Isimakiya na Mahati na Benaya,. 14Kole mwana ywa Imna endaga Mlawi achimailaga umwingilo wa ulailo wa zuwa we Inyumba ya Chohile, nakachimaila amalavyo kwa kunga wenye ya majeleko yalavigwe kwa Zumbe Chohile malavyo yose yasentigwe na kuyasanga. 15Edeni na Miniyamini na Yeshua na Shemaya na Amaliya na Shekaniya, wamwambizaga kudamanya indima iyo kwa uchumi mwe imizi mituhu wendile wakekala walavyantambiko. Wawasangila nkande walukolo wawo Walawi wakulu kwa wadodo kuligana na amabunga yawo, 16naho hehena kukaula lukolo umo wawandikwe. Wawenka vihendo wadya wana we chilume wabuzize mihilimo mitatu na kujendeleza, na awo wengile mwe Inyumba ya Zumbe Chohile chila zuwa kudamanya izindima zawo. Chila yumwenga kapata hantu hakwe kuligana ne indima akudamanya kwa luzo lwakwe. 17Vikaheza Walavyantambiko wawandikwa kuligana ne izinkolo zawo, na Walawi wabuzize mihilimo milongo midi na kujinka wawandikagwa kuligana ne izindima zawo no uluzo lwawo. 18Walavyantambiko na Walawi wawandikagwa hamwenga na wakazi zawo na wana wawo na wadya wakwikala nawo, kwaviya nawakaungwa watende wakuka chipindi chose. 19Iviya mgati mwa welekwa wa Aloni walavyantambiko wendile wakekala mwe izinkonde zikuzunguluka imizi yawo hegu mwe imizi mituhu kwendaga na wantu wakanuni wawapangile awalavyantambiko awo vihendo vyawo vye nkande. Chila mgosi mgati mwe lukolo lwa walavyantambiko na chila yumwenga awandikwe mwe Walawi enkagwa chihendo chakwe. 20Vino nivyo seuta Hezekiya atendile yedi na yachumile na uzumizi kulongozi kwa Zumbe Chohile, Chohile ywakwe mweisi yose ya Yuda. 21Kachumilwa kwaviya mwe chila ndima adamanye mwe Inyumba ya Chohile hegu mwe ndima ya sigilizi na malagizo ya Chohile chani atimile ulongozi kulawa kwakwe, kadamanya kwa moyo wakwe wose.