Mihilimo 32

Wagomba nkondo wa Ashulu waitisa Yelusalemu

2Maseuta 18:13-37, 19:14-19, 35-37; Isaya 36:1-22, 37:8-38

1Vikaheza, mbuli zose izo zo ukanuni adamanye seuta Hezekiya, seuta Senakelebu ywa Ashulu niyo ayebunga Yuda akaika msuhi wa kuihuda chani itende yakwe. Katowa amalago ye imizi yendile izengelwa ngome na kulagiza awagomba nkondo wakwe waike sila kujinkila mwe viwambaza. 2Seuta Hezekiya eze awone kugamba Senakelebu kemalanya chani ayebunge Yelusalemu, 3niyo alamula hamwenga na masekulu wa wawagomba nkondo wakwe wachinda izisokwe za amazi zendile zikuse komzi, nawo niyo welunga hamwenga naye wamwambize. 4Niyo wawachisanya wantu walozize na kuzichinda izisokwe zose za amazi hamwenga na kamto kendile kajinkile mgati mwe ntendele iyo wakagamba, “Kwambwani chiwalekele maseuta wa Ashulu wakeza wabwile mazi yamema?” 5Chani audime umzi seuta Hezekiya kahikiliza kudamanya ndima ya kuvuzagiza muntu mose mbogozoke ze ichiwambaza na kuzenga minala mlanga mwakwe. Ntendele ya kuse niyo azenga chiwambaza chituhu cha kaidi kuse kwa udya wa nkongo na kutogeza Madunda ya kuse ulailo wa zuwa mo mzi wa Daudi. Ukaleka ayo niyo adamanya viziha vilozize na nchinga. 6Kawaika wantu wose wo umzi walongozwe ni masekulu wa wagomba nkondo na kuwalagiza wechisanye he Inchili yo Umzi. Niyo awajela moyo awagamba, 7“Mtoge naho mtende wakankalu, msekogoha awagomba nkondo wa seuta ywa Ashulu. Kwaviya uyo chinanaye ni mkulu kujinka uyo ana Senakelebu. 8Uyo ana nguvu ya chimntu, mna suwe china Zumbe Chohile, Chohile ywetu, akuchambiza na kuchigombela nkondo yetu.” Milosi iyo ya seuta iwajela moyo vitendese awantu awo. 9Vikaheza, umo seuta Senakelebu ywa Ashulu nendile achei kauzunguluka umzi wa Lakishi akatenda na wagomba nkondo wakwe wose, niyo awatuma walosi wakwe waite Yelusalemu kwa Hezekiya seuta ywa Yuda na kwa awantu wose wa Yuda wendile Yelusalemu akagamba, 10“Vino nivyo akulonga Senakelebu seuta ywa Ashulu, togolani msuhi wenyu ni mbwani hata msigaila mwe mzi utandamwe wa Yelusalemu? 11Hezekiya akawagamba Zumbe Chohile ywenyu, nawakomboleni mwe izinguvu chinanazo, mna Hezekiya awadantani naho nawalekeni mkomwe ni sala na nchilu. 12Togolani suyo Hezekiya mwenye ausize ahantu henukile ho kuvikila milungu hamwenga ne izimazabahu zakwe, akawagamba awantu wa Yuda na Yelusalemu wamvikile Zumbe Chohile na kuvunkiza ubani mwe mazabahu imwenga du na kutikimya ntambiko mlanga mwakwe? 13Hamvimanyize ivyo miye na wababa zangu chiwadamanye wantu wose we izisi ntuhu? Kuna milungu yoyose iwakombole awantu wawo kulawa mwe imikono yangu? 14Ni mlungu yuhi mgati mwe imilungu ye izisi zose izo ibalangiswe ni wababa zangu adahile kuwakombola awantu wakwe kulawa mwe imikono yangu nivyo nanywi mtende na msuhi wa kugamba Chohile ywenyu nawakomboleni kulawa mwe imikonl yangu? 15Haluse msekumleka Hezekiya awadanteni hegu kuwazani saivyo. Mse kumzumila! Hahana mlungu ywa si yoyose adahaga kukombola awantu wakwe kulawa kwa seuta ywa Siliya. Ivyo yuno mlungu ywenyu hakudaha kuwakombolani!” 16Wandima wa seuta ywa Siliya walongaga mbuli zihiye mwa Zumbe Chohile na umndima ywakwe Hezekiya. 17Ibaluwa idya iwandikwe ni seuta mwenye akamhuluta na kumbela Zumbe, Chohile ywa Izulaeli, ikagamba, “Saviya milungu mituhu ya si ntuhu idunduge kuwakombola awantu wawo kulawa mwe izinguvu zangu, seivyo mlungu ywa Hezekiya hakudaha kuwakombola awantu wakwe kulawa mwangu.” 18Masekulu awo wasigilwe niyo wawagambila kwa longa dya Chiebulaniya wantu wa Yelusalemu wendile mlanga mwe ichiwambaza cho mzi, wakekamba wawajele nkama na woga chani wautahe vihufu umzi uwo. 19Wamtila Zumbe Chohile ywa Yelusalemu saviya wakutila imilungu ya si ntuhu, matukulu yadamanywe kwa mikono. 20Vikaheza seuta Hezekiya na muoni Isaya mwana ywa Amozi walombeza kwa Zumbe Chohile na kumwila amwambize mwe imbuli ino. 21Zumbe niyo egala mndima ywa kwembingu yudya awakomile awagomba nkondo na masekulu wa Ashulu. Ivyo seuta niyo auya Ashulu akatenda na soni. Zuwa dimwenga akatenda mwe inyumba yo kumvikila mnungu ywakwe, wamwe mwa wanawe mwenye niyo wamkoma kwa mabamba yawo. 22Mwe isila ino Zumbe Chohile kamhonya seuta Hezekiya na awantu wa Yelusalemu mwe zinguvu za Senakelebu, seuta ywa Ashulu, seivyo kwa wankondo watuhu. Kawatenda awantu wekale kwa utondowazi na wantu we izisi zihaguhi nawo. 23Wantu walozize niyo waita Yelusalemu, wakatenda wenula malavyo kwa Zumbe na majeleko kwa Hezekiya, ivyo kukongela aho izisi zose niyo zamtunya Hezekiya.

Unyonje wa Hezekiya no kweduvya kwakwe

2Maseuta 20:1-3, 12-19; Isaya 38:1-3, 39:1-8

24Mwe ichipindi icho seuta Hezekiya niyo ahuma hajihi na kubanika. Kamlombeza Zumbe Chohile, niyo Zumbe amwigaila chilagiso kugamba nahone. 25Mna Hezekiya hamtogole Zumbe Chohile mwe mbuli zose amtendele kwaviya moyo wakwe naumema wefyenyi. Mbuli iyo ihosa nkunto mwa awantu wa Yuda na Yelusalemu. 26Mna nyumani Hezekiya na awantu wa Yelusalemu niyo wanyanyahala, ivyo vileka Zumbe hawakantile kubula ukubanika kwa Hezekiya.

Ugoli no ukulu wa Hezekiya

27Seuta Hezekiya niyo atenda mgoli vitendese, na chila mntu nakamtunya. Kedamanyiza hazina za kwikiya zahabu na mayuwe ya chumbu na mayuwe ya yombe kulu na vilungo na nchinga na vintu vya yombe kulu. 28Iviya nakedamanyiza hazina ya kwikiya nkande na divai na mavuta ya mizaituni na kuzenga madewa ya ng'ombe zakwe na ngoto zakwe. 29Ukaleka ivyo vyose, azengaga mizi ilozize kwaviya Zumbe Chohile nakamwinka mafyo yalozize ya ngoto na ng'ombe na vintu vituhu vya ugoli ulozize. 30Seuta Hezekiya nuyo achindile amazi ye soko ya Gihoni, niyo ayasimbila mfilimbi wa hasi kwa hasi kubula ntendele ya uswelo wa zuwa yo umzi wa Daudi. Hezekiya niyo achumilwa mwe chila mbuli adamanye, 31na hata umo wakulu wa Babeli umo wasigilagwa kwakwe wakauze mwe mbuli za maula zilaile mweisi, Chohile kamleka Hezekiya asagule mwenye chani amjeze akaule ye mo moyo wakwe.

Udumo wo useuta wa Hezekiya

2Maseuta 20:20-21

32Vintu vituhu vya seuta Hezekiya na ntendwa zakwe zedi viwandikwa mwe Ichitabu cho Uoni wa Muoni Isaya mwana ywa Amozi mwe Ichitabu cha Maseuta wa Yuda na Izulaeli. 33Hezekiya abanikaga na kuhambwa mwe ntendele ya kolugulu mwe izimbila ze chiseuta za Daudi. Awantu wose wa Yuda na Izulaeli wamtunyisa mwe ifile yakwe. Mwanawe Manase niyo aguha ahantu hakwe atenda seuta.