Mihilimo 33

Seuta Manase alongoza Yuda

2Maseuta 21:1-9

1Manase endaga na mihilimo mlongo umwenga na midi umo akakonga useuta mwe isi ya Yuda, kalongoza akekala Yelusalemu kwa mihilimo milongo mishano na mishano. 2Adamanyaga mbuli zikwihiza kulongozi kwa Zumbe Chohile kwa kutimila lujendo lwihiye lwa wantu we izisi ntuhu wabalazwe ni Zumbe Chohile umo awantu wakwe wa Izulaeli wakengila mwe isi. 3Kwaviya azenga uhya ahantu ha kulanga ho kuvikila milungu hadya tati yakwe Hezekiya abogozolaga. Niyo azenga mazabahu za kuvikila Mabaali, na kudamanya matukulu ya Ashela mnungu mvyele, iviya kavikila vintu vyo ulanga na kuvikila na kuvisankanila. 4Niyo azenga mazabahu za milungu mndani mwe Inyumba ya Zumbe Chohile, ntendele idya Zumbe Chohile agambile ni yakumvikila yeye mazuwa yose. 5Mwe zinyuwa izimbili ze Inyumba ya Chohile niyo azenga mazabahu za kuvikila ivintu vyo ulanga. 6Naho niyo awalavya lavyo wanawe kwa kuwajisa mwe moto saviya lavyo dya kutikimya mwe idibwandasi dya Beni hinomu. Naho nakasinya milamulo na kulotela kwa kujeseza hilizi na kwambizana na wakutimila mizimu na wasai. Adamanyaga yakwihiza kulongozi kwa Zumbe Chohile na kumsonga maya. 7Niyo aika tukulu dya kusongola adamanye mwenye mwe Inyumba ya Zumbe, ntendele idya Chohile amgambile Daudi na mwanawe Sulemani kugamba, “Hano Yelusalemu, mwe Inyumba ya Chohile, naho ahantu nisagule mgati mwa amakabila mlongo na maidi ya Izulaeli hatende hantu ha kunivikila kale na kale. 8Naho uneva wantu wa Izulaeli wanatoza na kutimila amalagizo wenkigwe ni Musa, saniwaleke wauswe mwe isi niwenkile wababa zawo.” 9Mna Manase kawazaganya awantu wa Yuda na wakaya wa Yelusalemu kudamanya yehiye kujinka wantu wa si ntuhu ziya Zumbe awagulusaga kulongozi kwa Waizulaeli.

Manase Eila

10Hata hegu Zumbe Chohile amfundaga Manase na awantu wakwe, mna walemelaga kumwiva. 11Ivyo Zumbe Chohile niyo awaleka masekulu wa wagomba nkondo wa Ashulu wayebunge Yuda. Niyo wamtaha Manase na kujela ndwana mwe mpula na kumnyinya minyolo wamwigala Babeli. 12Umo akatenda mo kukunta niyo amlombeza Zumbe Chohile ywakwe na kunyanyahala kulongozi kwa Chohile ywa wababa zakwe. 13Chohile niyo azumila amalombezo ya Manase kwa kumvuza Yelusalemu na kulongoza vituhu. Vino vimtenda Manase amanye kugamba Zumbe nuyo Chohile ywa chindedi. 14Vikaheza, Manase niyo aznga chiwambaza cha kuse cho Umzi wa Daudi ntendele yo uswelo wa zuwawe Isoko ya Gihoni mwe idikolongo, kubula ko umwingilo we Inchili ya Samaki na kuuzungulusiza madunda, iviya niyo ichiwambaza kachongeza utali, niyo aika maseuta wa wagomba nkondo mwe chila mihaka ye imizi ya Yuda izengelwe ngome. 15Ausaga mwe Inyumba Chohile imilungu yose ye chijeni na matukulu hamwenga ne izimazabahu zose azengaga kolugulu lwe Inyumba ya Chohile na mo mzi wa Yelusalemu na kuvidula kuse komzi. 16Seivyo niyo avuzagiza kuzenga uhya izimazabahu ziya Zumbe Chohile nendile akavikilwa, na kulavizwa malavyo ya mevano na malavyo ya ntogozi. Kawalagiza awantu wose wa Yuda wamvikile Zumbe, Chohile ywa Izulaeli. 17Hataivyo wantu nendile wakajendeleza kulavya ntambiko mwe ntendele ntuhu zinukile za kuvikila nendile wakalavya kwa Zumbe Chohile ywawo uyodu.

Udumo wo Useuta wa Manase

2Maseuta 21:17-18

18Mbuli ntuhu adamanye Manase, na malombezo adamanye kwa Chohile ywakwe, na milosi agambilwe ni waoni kwa zina dya Zumbe, Chohile ywa Izulaeli, yose yawandikwa mwe Izimbuli Zomboke za Maseuta wa Izulaeli. 19Idilombezo dyakwe na ivyo Chohile amhitule, na amasa yakwe adamanye mwe yadya yehiye adamanye, ntendele zinukile za kuvikila milungu na ivyo adamanye nguzo za Ashela na matukulu umo henati kweila, yawandikwa mwe Chitabu cha Lukumbusa lwa Waoni. 20Manase abanikaga na kuhambwa mwe idizumba dyakwe dye chiseuta, mwanawe Amoni niyo aguha ahantu hakwe atenda seuta.

Seuta Amonialongoza Yuda

2Maseuta 21:19-26

21Amoni endaga na mihilimo milongo midi na midi umo akatenda seuta ywa Yuda, kalongoza akekala uko Yelusalemu kwa mihilimo midi. 22Adamanyaga mbuli zihiye kulongozi kwa Zumbe Chohile, saviya adamanye tati yakwe Manase. Alavyaga ntambiko na kusankanila matukulu yasanigwe ni Manase tati yakwe. 23Uyo hanyanyahale kulongozi kwa Zumbe Chohile, saviya adamanye Manase, mna uyo kakolesa masa kumjinka tati yakwe. 24Wandima wakwe Amoni niyo wamfungila njama na kumkomela mwe idizumba dyakwe dye chiseuta. 25Mna awantu wa Yuda niyo wawakoma wadya wose wafungile injama ya kumkoma Amoni, niyo wamwika mwanawe akwitangwa Yosiya atende seuta ahantu hakwe.