Mihilimo 34

Yosiya atenda seuta ywa Yuda

2Maseuta 22:1-2

1Yosiya endaga na mihilimo mnane umo akakonga kutenda seuta ywa Yuda, kalongoza akekala uko Yelusalemu kwa mihilimo milongo mitatu na umwenga. 2Adamanyaga yedi yakumuwagila Zumbe Chohile. Atimilaga izisila za babakwe Daudi na kutoza amalagizo ya Zumbe Chohile.

Yosiya atula matukulu ya milungu

3Mo mhilimo wa mnane wo useuta wakwe, akatenda achei mbwanga mdodo, akongaga kumvikila Chohile ywa Daudi babakwe vikaheza umo eze atende na mihilimo milongo midi niyo akonga kuikukiza imizi ya Yuda na Yelusalemu kwa kubalanga ntendele zinukile za kuvikila milungu ya chijeni, na matukulu ya Ashela, na matukulu matuhu ya kusongola na kusana. 4Kalagiza wantu wakwe wabalanga mazabahu zo kuvikila milungu ya Mabaali na kuzisenga senga izimazabahu zo kuvunkiziza ubani zinulwe mlanga mwe izimazabahu izo, seivyo niyo ahondahonda amatukulu ya Ashela na ntuhu za kusongola na kusana, kazihitusa lumbi, naho lumbi dwakwe niyo aditila mlanga mwe izimbila za wadya nawakazilaviza ntambiko. 5Koka amavuha ya walavyantambiko we imilungu iyo mwe izimazabahu zawo ivyo nivyo akukize Yuda na Yelusalemu. 6Adamanyaga ivyo mwe imizi ya Manase na Efulaimu na Simeoni kubula Nafutali na kwa mahame ye imizi yendile mnkanda mwe imizi iyo. 7Seivyo kasengasenga izimazabahu zo kuvunkiziza ubani mwe isi yose ya Izulaeli, kazibalanga izi mazabahu na hondahonda Maashela na matukulu ya kusongola niyo yatenda lumbi. Akaheza niyo auya Yelusalemu.

Chitabu cha Sisigilizi Chabunkulwa

2Maseuta 22:3-20

8Mo mhilimo wa milongo mnane wo ulongozi wakwe, eze abinde ukukukiza isi ne Inyumba ya Chohile seuta Yosia niyo atuma wantu watatu, Shafani mwana ywa Azali na Maaseya chilongozi wo umzi na Yowa mwana ywa Yowahazi, mta kuwandika waite wakavuzagize kuzenga uhya Inyumba ya Chohile, Chohile ywakwe. 9Wambasaga Hilikiya, mlavyantambiko Mkulu, niyo wamwinka izihela zigalwe mwe Inyumba ya Chohile zichisanywe ni Walawi na wachimala mwe iziinchili kuhokela wantu kulawa kwa Manase na Efulaimu na kulawa ntendele ntuhu zose za Izulaeli ne isi yose ya Yuda na Benjamini, iviya kulawa kwa wakaya wa Yelusalemu. 10Niyo wazinkiza kwa wadya awantu watatu wakuchimaila kuvuzagiza kuzenga uhya Inyumba ya Chohile na awazesi wendile wakazenga mwe Inyumba ya Chohile wazilavya chani zivuzagize Inyumba. 11Wawenkaga wata kusongola na wazesi kwachausa cha kugula mayuwe yasongolwe, mbao za kulunganyiza na boliti za kujeseza mo kuvuzagiza amazengo yasagwa na maseuta wa Yuda wayaleka yabogozoka. 12Awantu awo wadamanyaga indima iyo kwa ukanuni, wakatenda walongozwa ni Walawi wane, wankongo ni Yasasi na Obadiya wo lukolo lwa Melali, watuhu ni Zekaliya na Meshulamu wo ulukolo lwa Kohati. Walawi wose wendaga udahi wa kutowa vimpandwa vya kuchemela. 13Wawachimaila wata kwinula mizigo na kuwalongoza wadya wose wendile wakadamanya ndima zesimile, Walawi watuhu wendaga wata kuwandika, watuhu masekulu na wachimaila izinchili. 14Umo wendile wakalavya izihela zendille zigalwa mwe Inyumba ya Chohile, mlavyantambiko Hilikiya niyo abunkula Chitabu Cha Sigilizi za Zumbe Chohile amwinkaga Musa. 15Vikaheza Hilikiya niyo amgamba Shafani mta kuwandika, “Sibunkula Chitabu cha Sigilizi mwe Inyumba ya Chohile.” Hilikiya niyo amwinka Shafani ichitabu icho, 16Shafani niyo amwigaila seuta ichitabu nakumgamba, “Chila chintu wandima wako wagambilwe wadamanye wadamanya. 17Chiziguha izihela zikigwe mwe Inyumba ya Chohile na kuwenka awandima na awachimaila wawo.” 18Mta kuwandika Shafani niyo ongezeza agamba, “Mlavyantambiko Hilikiya kaninka chitabu hwigaile nnanacho hano.” Shafani niyo achisoma kwa izwi kulu kulongozi kwa seuta. 19Seuta eze eve imilosi isomigwe mwe ichitabu icho, niyo atatula izisuche zakwe, 20na kumlagiza Hilikiya, kwa Ahikamu mwana ywa Shafani na kwa Abudoni mwana ywa Mika na Shafani mta kuwandika na Asaya, mndima ywa seuta akagamba, 21“Hitani mkamuze Zumbe Chohile kwachausa changu na awantu wasigale uko Izulaeli na Yuda, mwe mbuli zikuwoneka mwe chino Ichitabu. Kwaviya maya ya Zumbe Chohile yachigwela, wababa zetu hawatozize ulosi wa Zumbe Chohile, hegu kudamanya mbuli ziwandikwe muno mwe ichitabu chino.” 22Kwa malagizo ya seuta, Hilikiya na weyawe niyo waita wakumuza mvyele yumwenga muoni akwitangwa Huluda, mkaza Shalumu mwana ywa Tokati mwana ywa Hasila mta kutunduliya izisuche zikujesezwa mwe Inyumba ya Chohile, uyo nakekala Yelusalemu, wikazi uzengigwe uhya, niyo walonga naye mbuli zose zilaile. 23Niyo awagamba wauye kukaya wakamgambile seuta ulosi uno ukulawa kwa Zumbe Chohile, 24“Nawegailani nkanto mo umzi wa Yelusalemu na awekazi wakwe wose, na maligito yose yawandikwe mwe ichitabu che izisigilizi chisomigwe kulongozi kwa seuta ywa Yuda. 25Kwaviya wanilemela miye na kulavya ntambiko kwa milungu mituhu wadamanye kwa mikono yawo chani wanisonge maya yangu. Maya yangu nayemuke mwa Yelusalemu, naho hayasele mpwii. 26Mna kwa seuta ywa Yuda, awatumileni kunga ulangilizi wa Zumbe Chohile ywa Izulaeli mgambeni, ‘Zumbe Chohile agamba utimile imilosi yose wivile iwandikwe mwe Ichitabu chino, 27kwaviya kweila na kunyanyahala weye mwenye kulongozi kwangu, na kutatula izisuche zako na kwila wize wive ivyo hunga nikantile Yelusalemu na awekazi nwakwe wose. Siva amalombezo yako, 28ne inkanto idya nendile haunga niigale Yelusalemu haize kubula hadya weye nobanikile. Nahuleke ubanike mwe utondowazi.’” Wadya awantu niyo wauya kwa seuta Yosiya wamwigaila ulosi uwo.

Yosiya aika Lagano kumtimila Zumbe Chohile

2Maseuta 23:1-20

29Seuta Yosiya niyo achisanya ivilongozi wose wa Yuda na Yelusalemu, 30uyo seuta kaita hamwenga na wadya awantu kwe Inyumba ya Zumbe Chohile, akasindikizwa ni walavyantambiko na Walawi na awantu wose, wakulu kwa wadodo hamwenga. Seuta niyo awasomela kwa izwi kulu Ichitabu chose che idilagano, chibwilwe mwe Inyumba ya Chohile. 31Vikaheza seuta niyo achimala hajihi ne izinguzo ze Chiseuta na kwika lagano kulongozi kwa Zumbe Chohile dya kunyanyahala na kwika izisigilizi zakwe na amalagizo yakwe hamwenga kwa moyo wakwe wose na muye wakwe na kudamanya ndima kuligana ne imilosi yose iwandikwe mwe ichitabu che idilagano. 32Vikaheza niyo awatenda awantu wose wendile Yelusalemu na Benjamini kutoza idilagano. Awantu wose wa Yelusalemu niyo wekala kwa kutimila idilagano dya Zumbe Chohile, Chohile ywa wababa zawo. 33Vikaheza seuta Yosiya niyo abalanga amatukulu yose yakwihiza yendile ntendele zose za awantu wa Izulaeli, na kuwalahiliza awantu wose wa Izulaeli wamsankanile Zumbe Chohile, Chohile ywawo. Mo wikazi wakwe wose usigale hamlekile vituhu Zumbe Chohile ywa wababa zawo.