Mihilimo 35

Yosiya Avina ngasu ya Pasaka

2Maseuta 23:21-23

1Yosiya avinaga ngasu ya Pasaka kwa kumtunya Zumbe Chohile uko Yelusalemu, mwe idizuwa dya mlongo umwenga na nne dyo umwezi wa nkongo wachinjaga mwana ngoto ywe ingasu ye Pasaka. 2Awasagulaga walavyantambiko mwe ndima wakungwa wasankanile mwe Inyumba ya Chohile na kuwajela moyo wasankane vyedi. 3Hamwenga na ayo, kawagamba Walawi wawahinye wantu wa Izulaeli wadya wasentigwe kwa Zumbe Chohile, malagizo yano yakutimila, “Ikani Idishanduku dye Idilagano mwe Inyumba ya Chohile izengigwe ni seuta Sulemani mwana ywa Daudi, seuta ywa Izulaeli. Hamkungwa kudisamiza vituhu kulawa ntendele kubula ntendele, mna mwaungwa mumsankanile Zumbe, Chohile ywenyu na awantu wakwe wa Izulaeli. 4Damanyani izindima zenyu saviya vikungwa mwe izinkolo zenyu, kulawana neivyo awalagizeni seuta Daudi ywa Izulaeli na mwanawe seuta Sulemani. 5Iviya chimalani hantu hakukile saviya mwi wantu we izinkolo zenyu, chila yumwenga ambize kaya ya Waizulaeli. 6Chinjani wana ngoto ywe Pasaka mkaheza kwekukizeni, mkaheza kwemalanya, malanyani amalavyo ye ngasu kwachausa cha walukolo wenyu, chani wadahe kuchintiza idilagizo dya Zumbe Chohile alamgize Musa.” 7Seuta Yosiya awenkaga wantu kulawa mo uludimo lwakwe ngoto na mbuzi elufu milongo mitatu na njeku Elufu ntatu. 8Seivyo masekulu kwa kunga wenye, walavyaga vintu na kuwenka wantu na walavyantambiko na Walawi. Hilikiya na Zekaliya na Yehieli, masekulu mwe Inyumba ya Zumbe Chohile wawenka ngoto na mbuzi elufu mbili na magana mtandatu na njeku magana matatu kwachausa che Pasaka. 9Konaniya na walukolo wakwe waidi, Shemaya na Nasanieli hamwenga na Hashabiya na Yeieli na Yozabadi, wendaga vilongozi wa Walawi, nawo wenkizaga ngoto na mbuzi elufu shano na njeku magana mashano, kwachausa cha malavyo ye Pasaka kwa Walawi watuhu. 10Umo ukwemalanya kwe Pasaka kwize kuheze, walavyantambiko na Walawi niyo wachimala ahantu hawo na Walawi mwa amabunga yawo saviya walagizwe ni seuta. 11Izingoto ne izimbuzi ze Ipasaka eze zichinjwe, Walavyantambiko niyo wamyagila isakame wahokele mwe mazabahu, Walawi nawo wasangula izinyama. 12Vikaheza wapagula ntambiko ya kutikimya chani wadahe kuzisanga kuligana ne izikaya zawo chani wamlavize Zumbe Chohile saviya viwandikwe mwe ichitabu cha Sigilizi cha Musa. Izinjeku nazo wazitenda seivyo. 13Walawi niyo woka izingoto ze Pasaka mlanga mo umoto, kuligana na viya vilagizwe na kutipwilisa amalavyo ya Kukile mwe nyungu, na masufuliya na mwe nkalango na kusunguza kuwapangila wantu wose. 14Vikaheza, Walawi niyo wepangila izintendele zawo zo ulavyantambiko kwaviya walavyantambiko wo ulukolo lwa Aloni nendile wakasankana kulavya amalavyo yo kutikimya ne izintendele za mavuta kubula nechilo, ivyo Walawi wemalanyiza wowo wenye na kwachausa cha walavyantambiko wo ulukolo lwa Aloni. 15Wachemi wo lweleko lwa Asafu wadamanyaga ndima yawo kuligana na amalagizo ya seuta Daudi na Asafu na Hemani na Yedusuni, muoni ywa seuta. Wachimaila we inchili kwe Inyumba ya Chohile hawaungigwe kuleka indima yawo, kwaviya walukolo wawo Walawi wawaikiyaga Pasaka yawo. 16Ivyo, saviya seuta Yosiya alagize, chila chintu chadamanyagwa mwe idizuwa diya kwa kumvikila Zumbe Chohile, kwa kuvina Pasaka na kulavya malavyo ya kutikimya mlanga mwe imazabahu. 17Mwe ichipindi icho wantu wose wa Izulaeli wendaga aho wavinaga Ipasaka na ngasu ye mikate heijeligwe hamila kwa mazuwa mfungate. 18Kwendaga hakunati kulaila ngasu ya Pasaka saiyo uko Izulaeli kukongela mwa amazuwa ya muoni Samwilu hegu hakwendaga na seuta yoyose ywa Izulaeli yudya avinaga Pasaka saidya adamanye seuta Yosiya, akatenda na walavyantambiko na Walawi na wantu wose wa Yuda na Izulaeli hamwenga na wekazi wa Yelusalemu. 19Pasaka iyo ivinwa mwe mihilimo ya mlongo umwenga na mnane wo useuta wa Yosiya.

Udumo wo Useuta wa Yosiya

2Maseuta 23:28-30

20Seuta Yosiya eze aheze kudamanya ayo yose kwachausa che Inyumba ya Chohile, Seuta Neko ywa Misili niyo alongoza wagomba nkondo kumwebunga uko Kalikemishi ko mto wa Fulati. Yosiya kajeza kumchinda, 21mna Neko niyo amwigaila Yosiya ulosi uno, “Nkondo ino hutowana weye seuta ywa Yuda humuli. Sizile kukwebunga weye, mna siza kuwebunga awankondo wangu, Chohile kanigamba nisunguze. Elo, leka kumchinda Chohile uyo entendele yangu hegu sivyo nakukome.” 22Mna Yosiya kalemela kumwiva Chohile viya alongile kujinkila kwa seuta Neko, kaleka kuvala suche za chiseuta chani asekumanyika na kwita kwe nkondo mo luwala lwa Megido. 23Uko kwe nkondo seuta Yosiya niyo alaswa mfulo ni walasa mifulo wa Misili. Seuta Yosiya niyo awalagiza awandima wakwe akawagamba, “Nusani hano, silumiziswa!” 24Wamwinula mwe idilingisha dyakwe, na kumwika mwe lingisha tuhu endile ananadyo aho, na kumwigala Yelusalemu. Uko niyo abanika na kuhambwa mwe izimbila ze chiseuta. Awantu wose wa Yuda niyo wamlomboleza ifile ya Yosiya. 25Muoni Yelemiya niyo awandika shaili dwa malombolezo kwa seuta Yosiya. Itenda ni mazwela mwe Izulaeli wachemi wagosi na wavyele, wakajeseza inchemo iyo mwe kulombolezeza. Inchemo iyo imwe ichitabu cha malombolezo. 26Chila mbuli yedi adamanye Yosiya kutimilana na yadya yawandikwe mwe izisigilizi za Zumbe, 27ntendwa zakwe kukongela nkongo kubula udumo viwandikwa mo Ulukumbusa lwe Ivitabu vya Maseuta wa Izulaeli na Yuda.