Mihilimo 36

Yehoahazi atenda seuta ywa Yuda

2Maseuta 23:30-35

1Awantu wa Yuda niyo wamsagula Yehoahazi, mwana chilume ywa Yosiya na kumhaka mavuta wamtenda seuta ywa Yelusalemu hantu ha tati yakwe. 2Yehoahazi endaga na mihilimo milongo midi na mitatu umo akakonga kutenda seuta ywa Yuda, kalongoza uko Yelusalemu kwa myezi mitatu. 3Vikaheza Seuta ywa Misili niyo amtaha na kumusa mo ulongozi uko Yelusalemu na kuitoza kodi isi ya chilo elufu ntatu na magana mane za mayuwe ya chumbu na chilo milongo mitatu na nne za zahabu. 4Vikaheza seuta ywa Misili niyo amwika Eliyakimu, mlukolo ywa Yehoahazi, atende seuta ywa Yuda na Yelusalemu, niyo ahitwila idizina dyakwe na kwitangwa Yehoyakimu, mna Neko niyo amguha amwigala Misili.

Yehoyakimu atenda seuta ywa Yuda

2Maseuta 23:36-24:7

5Yehoyakimu endaga na mihilimo milongo midi na mishano umo akakonga kutenda seuta ywa Yuda, niyo alongoza akekala uko Yelusalemu kwa mihilimo mlongo umwenga na umwe. Adamanyaga masa kwa Zumbe Chohile, Chohile ywakwe. 6Seuta Nebukadineza ywa Babeli niyo ayebunga Yuda, na kumgwila Yehoyakimu kwa minyolo ya shaba na kumwigala Babeli. 7Seivyo Nebukadineza niyo ataha iviya vyendile mwe Inyumba ya Chohile na kuvika mwe inyumba yakwe uko Babeli. 8Ivyo ntendwa ntuhu za Yehoyakimu, hamwenga na uwihi adamanye na yadya yawoneke mwakwe, yawandikwa mwe Ichitabu cho Lukumbusa lwa Maseuta wa Izulaeli na Yuda. Yehoyakimu mwanawe ywa chilume niyo atenda seuta hantu hakwe.

Seuta Yehoyakini atenda seuta ywa Yuda

2Maseuta 24:8-17

9Yehoyakini endaga na mihilimo mlongo umwenga na mnane umo akatenda seuta ywa Yuda, na katawala uko Yelusalemu kwa myezi mitatu na mazuwa mlongo umwenga. Niyo adamanya yehiye kulongozi kwa Zumbe Chohile. 10Mwe nkongelo yo mhilimo seuta Nebukadineza niyo asigila wantu wamwigale Babeli, hamwenga ne ivimpandwa vina yombe kulu kulawa mwe Inyumba ya Chohile. Akaheza niyo amsenta mtumbawe dya Yehoyakini akwitangwa Sedekiya atende seuta ywa Yuda na Yelusalemu.

Seuta Sedekiya ywa Yuda

2Maseuta 24:18-20; Yelemia 52:1-3

11Sedekiya endaga na mihilimo milongo midi na umwenga umo akatenda seuta ywa Yuda, katawala akekala uko Yelusalemu kwa mihilimo mlongo umwenga ne imwenga. 12Niyo adamanya yehiye kulongozi kwa Zumbe Chohile naho hatimile amalangilizo yalongigwe ni muoni Yelemiya, yudya amgambile imilosi ya Zumbe Chohile.

Ukugwa kwa Yelusalemu

2Maseuta 25:1-21; Yelemia 52:3-11

13Sedekiya niyo amhituka seuta Nebukadineza, yudya amwelisize kwa zina dya Chohile kugamba hamhituke. Endaga mnkani vitendese na kulemela kweila na kumhitukila Zumbe Chohile, Chohile ywa Izulaeli. 14Kwa kongezeza ayo, walavyantambiko wose wa Yuda na awantu niyo watongela ntendwa zose zikwihiza za wantu we izisi ntuhu wakuvikila matukulu, na kuijela uzavu Inyumba ya Chohile, idya ikukizwe ni Zumbe Chohile mwenye uko Yelusalemu. 15Zumbe Chohile, Chohile ywa wababa zawo, chila nkanana kawegaila waoni kuwalangiliza awantu wakwe, kwaviya nakawawonela mbazi awantu ne Inyumba yakwe. 16Mna wowo wajendeleza kubela izimbuli za Zumbe Chohile, na kubela imilosi yakwe na kuwatila awaoni wakwe, kubula amaya ya Zumbe Chohile yemukisa mwa awantu wakwe naho hahana adahile kusumka. 17Ivyo Zumbe Chohile kamwigala seuta ywa Babeli akawebunge. Uyo awakomaga wabwanga wa Yuda kwa bamba hata mndani mwe Inyumba ya Chohile. Hawonele mbazi hata mntu yoyose, mbwanga hegu mchiche, mgosi hegu mvyele, mnyonje hegu mjima. Chohile kamleka Nebukadineza awakome. 18Seuta ywa Babeli niyo aguha ivintu vyose mwe Inyumba ya Chohile ne hazina yakwe, na ugoli wa seuta na amaseuta wakwe. Vyose ivyo kavigala Babeli. 19Kaichulika Inyumba ya Chohile na kubogozola ichiwambaza cho mzi, niyo abogozola amazumba ye chiseuta na kubalanga iviya vyose vya yombe kulu. 20Kawaguha awantu wose wahonile mwe inkondo na kuwegala Babeli, kudya wamsankanile na welekwa wakwe saviya watumwa kubula nkongelo yo useuta wa Uwajemi. 21Ivyo niyo yalaila yadya yalongigwe ni Zumbe Chohile kujinkila kwa muoni wakwe Yelemiya kugamba, “Isi neisigale heine chintu hailimwe mihilimo milongo mfungate kuliha ichipindi cho kuvina idizuwa dyo Kuhumula chiya hechidamanywe.”

Koleshi awalagiza Wayahudi wauye kwawo

Ezila 1:1-4

22Mo mhilimo wa nkongo wo useuta wa Koleshi ywa Uwajemi, chani uchinte ulosi alongile Zumbe Chohile kujinkila muoni ywakwe Yelemiya, Zumbe Chohile amtendaga Koloshi seuta ywa Uwajemi alonge mo useta wakwe wose na kuwandika, 23“Vino nivyo alongile seuta ywa Uwajemi. Zumbe Chohile, Chohile ywa kwembingu, kanitenda seuta ywe isi yose naho kaninka udahi wa kumzengela Nyumba Yelusalemu uko Yuda. Haluse nyuwe wantu wa Chohile, hitani uko chani Zumbe Chohile, Chohile ywenyu atende hamwenga na nyuwe.”