Ezila 1

Koleshi awambiza Waizulaeli wauye kwawo

1Mo mhilimo wa nkongo wo useuta wa Koleshi, seuta ywa Uwajemi, chani ulosi wa Zumbe Chohile alongile kujinkila muwoni Yelemiya uchinte, Zumbe Chohile niyo amtenda Koleshi, seuta ywa Uwajemi, alavye ulosi mo useuta wakwe na kuuwandika na kulonga akagamba, 2“Vino nivyo akulonga Koleshi, seuta ywa Uwajemi, Zumbe, Chohile ywa kwembingu, kaninka useuta wose we isi, naho kanilagiza nimzengele nyumba uko Yelusalemu mwe isi ya Yuda. 3Ivyo haluse chila mntu ywa Chohile mgati mwenyu, Zumbe Chohile atende hamwenga naye, aite Yelusalemu mweisi ya Yuda, akazenge uhya Inyumba ya Zumbe Chohile, Chohile ywa Izilaeli, Chohile akuvikilwa uko Yelusalemu. 4Chila asigale mjima uko ko usamizo akunga kuya, weyawe wamwambize kwa kumwinka mayuwe ya chumbu na zahabu na vintu na wanyama, hamwenga na malavyo ya mazwela kwachausa che Inyumba ya Chohile uko Yelusalemu.”

5Ivyo, niyo vilongozi we izinkolo za makabila ya Yuda na Benjamini na walavyantambiko na Walawi wahalawa, na chila mntu yudya Chohile amwinkile moyo wa kwita kwizenga uhya Inyumba ya Zumbe Chohile, iyuko Yelusalemu. 6Weyawe niyo wawambiza awantu awo kwa kuwenka viya vya chumbu, zahabu na vintu vituhu na wanyama na vintu vya yombe na malavyo ye Inyumba ya Chohile.

7Seuta Koleshi niyo awavuziza iviya seuta Nebukadineza aviguhaga kulawa mwe Inyumba ya Chohile na kuvika mwe inyumba ye imilungu yakwe. 8Seuta Koleshi alagizaga iviya ivyo vigalwe ni Misiledati, mchimaila ywe hazina yakwe. Uyo kamuwaziza iviya ivyo na kumwinka Shesibaza, sekulu ywa Yuda, 9viya vilavigwe ni mabakuli ya zahabu milongo mitatu na mabakuli ya mayuwe ya chumbu elufu imwenga na visahani milongo midi na chenda, 10na wabakuli wa zahabu milongo mitatu na bakuli ndodo za mayuwe ya chumbu magana mane na mlongo na viya vituhu elufu imwenga.

11Iviya vyose vye izahabu na mayuwe ye chumbu, hamwenga ne ivintu vituhu vyendaga ni elufu shano na magana mane. Vyose ivyo Shesibaza na wantu watuhu waviguhaga na kwita navyo uko Yelusalemu mo udumo wo kwikala ko usamizo uko Babeli.