Mihilimo 28

Malagizo ya Daudi mo kuzenga Inyumba ya Chohile

1Seuta Daudi kawetanga wakulu wose wa Izulaeli uko Yelusalemu, wakulu wa makabila na wakulu wa mabunga ya vilongozi wa wagombankondo wamsankanile seuta na wakulu wa wagomba nkondo elufu elufuimwe imwe na masekulu mabunga ya magana gana na wose na wagombankondo wakuchimaila ugoli wose ne izing'ombe zose za seuta na wanawe hamwenga na wakulu wemwenyumba ya seuta na wagomba nkondo wakankalu wose. 2Niyo Seuta Daudi achimala na kugamba, “Nyuwe walukolo weyangu na wantu wangu nitegelezani. Mo umoyo wangu nahaunga nizenge nyumba kwa chausa cha kudika idishanduku dye dilagano dya Zumbe Chohile, chani chitende na hantu hakumvikila simalanya kale ivintu vyo kuzengela. 3Mna Chohile kanilemeila kwaviya miye ni mntu ywa nkondo na kukomesa wantu. 4Mna Chohile, Chohile ywa Izulaeli nakanisagula miye mgati mwe wantu wa tati yangu na kutenda seuta ywa Izulaeli mazuwa yose. Nakadisagula kabila dya Yuda dilongoze na kulawana ne dikabila idyo, nakasagula wantu wa tati yangu na mgati mwa wana wa tati yangu, vimuwagila miye nitende seuta ywa Izulaeli yose. 5Chohile kaninka wana walozize na mgati mwa awo wose, kamsagula Sulemani mwanangu, ekale mwe chigoda cho useuta wakwe Chohile akailongoza Izulaeli.”

6“Chohile nakanigambila, ‘Mwanawo Sulemani nuyo akunga anizengele nyumba ne izinyuwa zakwe, kwaviya simsagula uyo atende mwanangu, miye nitende tati yakwe. 7Naniutogeze useuta wakwe mazuwa yose uneva najendeleze kutoza kwa ukanuni malagizo na sigilizi zangu saviya akudamanya dyelo.’”

8“Ivyo nawalagizani kulongozi kwe dibunga dino dya Waizulaeli wose, Bunga dya wantu wa Chohile na kulongozi kwa Chohile ywetu akeva. Tozesani amalagizo yose ya Zumbe Chohile, Chohile ywenu chani muiguhe isi ino itenda yenyu na kuwasiza wana wenyu itende ulisi wawo mazuwa yose.” 9“Wenawe mwanangu Sulemani, ummanye Chohile ywa tati yako umsankanile kwa moyo wako wose na kwa akili yose, uyo Chohile mwenye azuza myoyo wa chila mntu naho kamanya fanyanyi za mntu na yadya akunga adamanye. Ukamlonda uyo naumuone mna unamwasa nakuduile hale mazuwa yose. 10Ivyo ukaulise na kukumbuka kugamba, Chohile kakusagula weye umzengele nyumba ya kuvikila. Utende mkankalu udamanye ivyo.”

11Naho Daudi kamwinka Sulemani mwanawe lamani ya amazengo yose ye Inyumba ya Chohile, nyumba zakwe ze izihazina zakwe, golofa zakwe, vyumba vyakwe vya kunyumba na hantu hakukise. 12Nakamlagisa ivyo inyumba naitende saviya Muye wa Chohile umlongoze mo moyo wakwe, kwachausa cho ukumbi we Inyumba ya Chohile na viya vikungwa mwe izinyuwa ze Inyumba ya Chohile, vyumba vikuzunguluka Inyumba ya Chohile na magulu ya kwikiya vintu vilavigwe kwa Chohile. 13Iviya seuta kamwinka malagizo ya ivyo akungwa awapange walavyantambiko na Walawi kuzidamanya izindima zawo, kusankanikila inyumba ya Chohile na kuvitunduliya iviya vyose vye nyumba ya Chohile. 14Kamwinka zahabu yungigwe kudamanyiza viya vyose vya zahabu mo kusankana kose, kamwinka chumbu chungigwe kudamanyiza vintu vyesimile navyungwe mo kusankana kose, 15uzami we iviya vyo kwikiya taa za zahabu ne izita zakwe, uzami wa mayuwe ya chumbu chila chiya cha kwikiya taa ne izita zakwe kuligana na ivyo ikujesezwa na uzami wa chila chiya cha kwikiya taa ne izita zakwe kuligana na ukujesezwa kwakwe, 16ne izahabu yo kudamanyiza meza ya zahabu zikigwe migate ilavigwe kwa Chohile na mayuwe ya chumbu yo kudamanyiza meza ya chumbu, 17naho nakalavya malagizo kulanga izahabu ilenguke yungigwe kudamanyiza makulega na mabakuli na mabinauli na madisi ya zahabu na chumbu chungigwe kudamanyiza mabakuli ya chumbu, 18na zahabu ikukile ya kudamanyiza mazabahu ya kuvunkiziza ubani. Naho kamwinka umligano wa ngubiko ina vyumbe vidi vya zahabu mlanga mwamwe vina mawawa yatantamule na kudigubika idishanduku dye idilagano dya Zumbe Chohile. 19Seuta Daudi niyo agamba, ayo yose siyawandika saviya anilagise Zumbe Chohile chani indima yose idamanyike saviya anilagise.

20Seuta Daudi niyo amgamba mwanawe, Sulemani “Utoge naho utende mkankalu udamanye indima ino. Usekogoha hegu kuta na nkama. Zumbe Chohile, uyo Chohile ywangu ehamwenga na weye. Hakwase kubula uhelo we indima yose ikungigwa idamanywe mwe Inyumba ya Chohile. 21Walavyantambiko na Walawi wenkigwa kale ndima za kudamanya mwe Inyumba ya Chohile. Chila mntu akunga mwenye mta umanyi wose wekamba wakwambize, wantu wose hamwenga ne vilongozi wawo nawetegeleze chila lagizo dyako.”