Mihilimo 27

Mabunga ya wagomba nkondo

1Luno ni ludongo lwa masekulu we izinkolo za Izulaeli wendaga izikaya zawo na masekulu wa wagomba nkondo maelufu na magana na wakulu wawo wamsankanile seuta Daudi kwa kuhokelezana kwingila na kufosa. Chila mwezi na chila mhilimo, bunga dyesimile dya wantu elufu milongo midi na nne nawahokela wadamanye ndima.

2Yashobeamu mwana ywa Zabudieli endaga chilongozi ywa bunga dya nkongo mo mwezi wa nkongo, bunga dyakwe dyendaga na wantu elufu milongo midi na nne. 3Uyo endaga mwelekwa ywa Pelesi, niyo atenda mkulu ywa vilongozi wa wagomba nkondo wose mo mwezi wa nkongo. 4Dodai endaga chilongozi ywa bunga dya kaidi mo mwezi wa kaidi. Bunga dyakwe dyendaga na wagomba nkondo elufu milongo midi na nne. 5Benaya mwana ywa Yehoyada endaga sekulu ywa bunga dya katatu dikatenda na wagomba nkondo elufu milongo midi na nne. 6Uyo Beyana nuyudya endaga mkankalu ywa wadya milongo mitatu na mkulu ywawo. Mwanawe Amizabadi endaga chilongozi. 7Asheli mlukolo ywa Yoabu endaga chilongozi ywe idibunga mo mwezi wa kane dyendaga na wagomba nkondo elufu milongo midi na nne, vikaheza niyo atimilwa ni mwanawe Zebadiya. 8Chilongozi mo mwezi wa shano endaga ni Shamhuti mntu ywa Izilahi endaga na bunga dya wagomba nkondo elufu milongo midi na nne. 9Mo mwezi wa mtandatu chilongozi endaga ni Ila mwana ywa Ikeshi mntu nywa Tekao endaga na bunga dya wagomba nkondo elufu milongo midi na nne. 10Mo mwezi wa mfungate chilongozi endaga ni Helesi mntu ywa Peloni mwelekwa ywa Efulaimu endaga na bunga dya wagomba nkondo elufu milongo midi na nne. 11Mo mwezi wa mnane chilongozi endaga ni Sibekei mntu ywa Hushati mwelekwa ywa Wazela endaga na bunga dya wagomba nkondo elufu milongo midi na nne. 12Mo mwezi wa chenda chilongozi endaga ni Abiezeli, Muanatoti mwelekwa ywa wantu wa Benjamini endaga na bunga dya wagomba nkondo elufu milongo midi na nne. 13Mo mwezi wa mlongo chilongozi endaga ni Mahalai mntu ywa Netofati mwelekwa ywa Wazela, naye endaga na bunga dya bunga dya wagomba nkondo elufu milongo midi na nne. 14Mo mwezi wa mlongo na umwe chilongozi endaga ni Benaya mntu ywa Pilatoni mwelekwa ywa Efulaimu, naye endaga na bunga dya wagomba nkondo elufu milongo midi na nne. 15Mo mwezi wa mlongo na wakaidi chilongozi endaga ni Helidai mntu ywa Netofati mwelekwa ywa Otinieli, naye endaga na bunga dya wagomba nkondo elufu milongo midi na nne.

Ulongozi wa amakabila ya Izulaeli

16Luno ni ludongo lwa masekulu wa makabila ya Izulaeli, kabila dya Lubeni sekulu ni Eliazali mwana ywa Zikili, kabila dya Simeoni sekulu endaga Shefatiya mwana Maaka, 17kabila dya Walawi sekulu endaga Hashabiya mwana ywa Kemueli mwelekwa ywa Haluni na Sadoki, 18kabila dya Yuda sekulu endaga Elihu mlukolo ywa seuta Daudi, kabila dya Isakali sekulu endaga Omli mwana ywa mikaeli, 19kabila dya Zabuloni sekulu endaga Ishimaya mwana ywa Obadiya, dya Nafutali sekulu endaga Yelemoti mwana ywa Azilieli, 20kabila dya Efulaimu sekulu endaga Hosheya mwana ywa Azaziya, sekulu ywa awantu we inusu ye ikabila ya Manase endaga Yoeli mwana ywa Pedaya, 21sekulu ywa awantu we inusu ye idikabila dya Manase mo mzi wa Gileyadi endaga Ido mwana ywa Zekaliya, sekulu ywe idikabila dya Bejamini endaga Yasieli mwana ywa Abuneli, 22sekulu ywe idikabila dya Dani endaga Azaleli mwana ywa Yelohamu. Awo nawo amasekulu wa amakabila ya Waizulaeli. 23Seuta Daudi hawawazize wantu hewebuzize mihilimo milongo midi, kwaviya Zumbe Chohile nakagamba nawajenyeze Waizulaeli saviya ntondo za koulanga 24Yoabu mwana ywa Seluya niyo awawaza awantu mna habindile. Kwachausa che imbuli iyo Waizulaeli niyo wagwelwa ni nkunto, elo uwazwa uwo haujeligwe mwe izimbuli zijinkile za seuta Daudi.

Wachimaila wo ugoli wa seuta

25Azimaweti mwana ywa Adieli nuyo achimailaga izihazina za seuta Daudi. Yonasani mwana ywa Uziya achimailaga izimpamba zikwenkonde na kwemizi na kwevijiji na mwe izingome. 26Ezili mwana ywa Kelubu achimailaga wandima wa kwenkonde wa seuta. 27Shimei mntu ywa mzi wa Lamati achimailaga izindima za kwezinkonde ze mizabibu. Zabudi mntu ywa Shifimi achimaile izindima za kufumbula na kutunduliya idivai ya seuta. 28Baalihanani mntu ywa Gedeli nuyo achimaile imizabibu ne imikuyu imwentamabalale ya awagulu wo uswelo wa zuwa. Yoashi achimailaga izihazina za amavuta. 29Shitilai mntu ywa Shaloni nuyo achimailaga izing'ombe uko Shaloni, Shafati mwana ywa Adilai achimailaga uludimo lwendaga kwamakolongo. 30Obili kulawa ulukolo lwa Ishimaeli achimailaga izingamiya. Yedeya kulawa ulukolo lwa Melonoti achimailaga izimpunda. Achimaile amafyo ye izingoto endaga ni Yazizi kulawa ulukolo lwa Hagili. 31Awo wose wendaga wantu wakutunduliya ugoli wa seuta Daudi.

Walangilizi wa seuta Daudi

32Yonasani mtumbawe dya seuta Daudi endaga mlangilizi naho mntu mta umanyi naho mtakuwandika. Uyo na Yahieli mwana ywa Hakimoni nawakawahinya wana wa seuta. 33Ahitofeli endaga ni mlangilizi ywa seuta, Hushai ywe idikabila dya Akiki endaga mbuyaye dya seuta. 34Ahitofeli eze abanike, hantu hakwe niyo haguhigwa ni Yehoyada mwana ywa Benaya na Abiatali. Yoabu endaga sekulu ywa wagomba nkondo wa seuta.