Mihilimo 26

Wamizi we Inyumba ya Chohile

1Yano ni mabunga ya Walawi yadamanye ndima ya wamizi mwe izinyivi. Kulawa mo lukolo lwa Kola ni Meshelemiya mwana ywa kole ywe ikaya ya Asafu. 2Meshelemiya endaga na wana mfungate, mwelekwa ywakwe ywa nkongo endaga ni Zekaliya ywa kaidi ni Yedieli ywa katatu ni Zebadiya ywa kane ni Yasinieli, 3ywa shano ni Elamu ywa mtandatu ni Yohanani ywa mfungate ni Eliehoenai.

4Obediedomu endaga na wana mnane, mwelekwa ywakwe ywa nkongo endaga Shemaya ywa kaidi ni Yehozabadi ywa katatu ni Yoa ywa kane ni Sakali ywa shano ni Netaneli, 5ywa mtandatu ni Amieli ywa mfungate ni Isakali ywa mnane ni Peuletai. Chohile amjimbikaga Obediedomu. 6Shemaya mwanawe ywa nkongo ywa Obediedomu apataga wana chilume wendaga vilongozi mo lukolo lwa tati yakwe, kwaviya wendaga ni wagosi wata kutunyiswa.

7Shemaya endaga na wana chilume mtandatu, Osani na Lefaeli na Obedi na Elizabadi, walukolo wakwe Elihu na Shemakiya wendaga wakankalu. 8Wose awo ni wana wa Obediedomu hamwenga na wana wawo na wana wa walukolo wawo, wendaga ni wantu wakankalu wakudaha indima iyo. Welekwa wose wa Obediedomu wendaga milongo mtandatu na waidi. 9Meshelemiya endaga na wana na walukolo wakwe, wantu mlongo umwenga na mnane wata udahi we indima iyo. 10Hosa yumwenga ywa wana wa Meleli endaga na wana wane, Shimli atendagwa chilongozi mwa welekwa wa tati yakwe hatahegu suyo mwelekwa ywa nkongo, 11ywa kaidi ni Hilikiya, ywakatatu ni Tebaliya ywakane ni Zekaliya. Hamwenga na walukolo wawo wendaga mlonhgo umwenga na watatu.

12Wamizi awo nawesima mwe mabunga kuligana na amasekulu wawo, awo nawo wenkagwa ndima kwe Inyumba ya Chohile saviya wadya Walawi watuhu. 13Chila kaya hehena kukaula wadalahala na wabwanga wadamanyaga tegatega wasagule inchili nawamile kutimilana ne ivilongozi wawo. 14Tegatega dya kumsagula namile inchili ntendele ya ulailo wa zuwa dimgwela Shelemiya. Niyo wadamanya tegatega vituhu kwachausa cha mwanawe Zekaliya endaga mlangilizi mta ubala amile inchili ntendele ya chenya. 15Obediedomu kasagulwa amile inchili ntendele ya kwamwenyemzi na wanawe wapata tegatega dya kwamila izihazina diwagwela wanawe. 16Tegatega dya kwamila ntendele ya uswelo wa zuwa we inchili ya Sheleketi kwe isila inkulu ye intendele ya kulanga yo mzi iwagwela Shupimu na Hosa. Luzo lo kwamila lwikigwa vikuligana. 17Chila zuwa ntendele ya ulailo wa zuwa kwendaga na wamizi mtandatu, intendele ya chenya wamizi wane, intendele ya kwamwenyemzi wamizi wane, iviya kwehazina kwendaga na wamizi waidi idi, 18kwendaga na ukumbi mtana wendaga ntendele ya uswelo wa zuwa, kwendaga na wadimi wane kwesila, kokumbi kwenye kwendaga na wamizi waidi. 19Yano nayo amabunga mgati mwa wamizi mo lukolo lwa Kola na welekwa wa Melali.

Ndima ntuhu mwe Inyumba ya Chohile

20Mgati mwa Walawi, Ahiya adamanyaga ndima ya kwamila ihazina ye Inyumba ya Chohile ne ihazina ye vintu vilavigwe kwa Zumbe. 21Kulawa mwe ikaya ya Libuni molukolo lwa Gelishoni, chilongozi endaga Yehieli.

22Wana chilume waidi watuhu wa Yezieli ni Zetamu na Yoeli wendaga wamizi we hazina mwe Inyumba ya Chohile. 23Iviya ndima mwe Inyumba ya Chohile nazisangwa mwa awantu we izinkolo za Wasiliya na Waishali na Wahebuloni na Wauzieli.

24Shemueli mwana ywa Gelishoni mwana ywa Musa endaga nuyo mchimaila mkulu ywe izihazina zose. 25Welekwa wakwe kulawa kwa Eliezeli ni Lehabiya na Yeshaya na Yolamu na Zikili na Shelomoti. 26Shelomoti na walukolo wakwe wendaga nawo wamizi we ivintu vyose visentigwe kwa Chohile ni seuta Daudi hamwenga ne ivilongozi wa nkolo na vilongozi wa wagomba nkondo magana na maelufu. 27Mwe ivintu watahile kwe nkondo visiku wavisenta kwa ndima yesimile kwachausa cha kuidamanya Inyumba ya Chohile. 28Iviya ivintu vyose vilavigwe kwa Chohile ni muoni Samwilu kwa ndima yesimile na Sauli mwana ywa Kishi na Abuneli na Yoabu mwana ywa Seluya, hamwenga ne ivintu vyose visentigwe vyendaga vikamilwa ni Shelomoti na walukolo wakwe.

Ndima za Walawi watuhu

29Mgati mwa Waishali, Kenaniya na wanawe wenkagwa ndima ya ulongozi, wakatenda vilongozi wa wantu na walamuzi kwachausa cha Waizulaeli. 30Mgati mwa Wahebuloni, Hashabiya na walukolo wakwe elufu imwenga na magana mfungate, wose wendaga wakutunyiswa wenkigwa ndima ya kuchimaila muntu mwa Izulaeli mwendaga ntendele ya uswelo wa zuwa yo mto wa Yolodani. Nawachimaila indima yose ya Chohile ne izindima za seuta Daudi.

31Mgati mwa Wahebuloni Yeliya endaga chilongozi ywa nkolo kutimilana na awelekwa wose, naho mo mhilomo wa milongo mine wo ulongozi wa seuta Daudi wadamanyagwa uzuza niyo wagosi wata udahi mkulu mwa Wahebuloni wabwilwa uko Yezeli mo mzi wa Gileadi. 32Seuta Daudi amsagulaga Yeliya na walukolo wakwe elufu mbili na magana mfungate, wakutunyiswa na vilongozi wa nkolo kuchimaila mbuli zose zikumlanga Chohile na seuta Daudi mwe ntendele ze idikabila dya Lubeni ne idikabila dya Gadi ne inusu ye idikabila dya Manase, zendaga ntendele ya ulailo wa zuwa wo mto wa Yolodani.