Mihilimo 5

Lweleko lwa Lubeni

1Lubeni nendile ni mwelekwa ywa nkongo ywa Izulaeli, mna niyo ahokwa ulisi uwo kwaviya ajendaga na chilaga cha ise, luhenyo ulo niyo enkigwa mlukolo ywakwe Yusufu, elo Lubeni hawazigwe mo uwagilwa wo ulukolo lwa Yakobo vikuligana no kwelekwa. 2Hatahegu Yuda nuyo ezile kutenda na nguvu kujinka awatuhu, chilongozi nalawe uko, mna uwagilwa wa mwelekwa ywa nkongo nautende wa Yusufu. 3Lubeni mwelekwa ywa nkongo ywa Izulaeli nendile ana wane wa chilume, Henoki na Palu na Heziloni na Kalimi.

4Welekwa wa Yoeli cheleko na cheleko nendile ni Yoeli na Shemaya na Shemaya na Gogi na Shimei, 5Mika na Leaya na Baali, 6na Beela endaga chilongozi ywe idikabila dya Lubeni, seuta Tigilati Pileseli ywa Ashulu amguhaga na kumwigala ko usamizo.

7Masekulu wano wa nkolo wakutimila wawandikwa mo uludongo lo ulukumbusa lwe ivyeleko vye idikabila dya Lubeni, Yeieli na Zakaliya, 8na Bela mwana ywa Azazi mwezukulu wa Shema wo lukolo lwa Yoeli nalukekala komzi wa Aloweli kubula Nebo na Bela na Baali Meoni. 9Naho kwaviya amafyo yawo nendile yajenyela vitendese uko Giliyadi wantu we idikabila dya Lubeni niyo wazagala ntendele ya ulailo wa zuwa kubula mpezo mwe inyika yenele kubula komto wa Efulate.

10Mo ulonwantu wa gozi wa seuta Sauli, wantu we idikabila dya Lubeni wagomba nkondo na Wahajili, niyo awakoma vikaheza niyo waguha isi yawo yose ntendele ya ulailo wa zuwa wa Giliyadi.

Lweleko lwa Gadi

11Kabila dya Gadi nendile dihakana ne idikabila dya Lubeni ntendele ya chenya, mwe isi ya Bashani yenele ulailo wa zuwa kubula komzi wa Saleka. 12Yoeli nuyo endaga sekulu ywo ulukolo luna nguvu, ywa kaidi ni Shafani. Niyo watimila Yanai na Shefati wakongile nkolo ntuhu uko Bashani. 13Walukolo kuligana ne izinkolo zawo nendile ni mfungate, Mikaeli na Meshulamu na Sheba na Yolai na Yaakani na Ziya na Ebeli. 14Wose awo nendile ni welekwa wa Abihaili na Huli, Huli amweleka Yalowa, Yalowa amweleka Giliyadi, Gileyadi amweleka Mikaeli, Mikaeli amweleka Yeshishai, Yeshishai amweleka Yado, Yado amweleka Buzi. 15Ahi nendile ni mwana ywa Abudieli, mwezukiulu ywa Guni, Ahi nuyo endaga sekulu mwe izinkolo izo. 16Wantu we idikabila dywa Gadi wekalaga ntendele ya Gileyadi mwe isi ya Bashani ne izizkaya zakwe zizunguluke na ntendele yose yo kudimila ya Shaloni kubula kwe mihaka yakwe. 17Wantu awo nendile wawandikwa mwe nkolo chipindi cho ulongozi wa seuta Yotamu ywa Yuda na seuta Yeloboamu ywa kaidi ywa Izulaeli.

Wagomba nkondo wa amakabila ya ulailo wa zuwa

18Makabila ya Lubeni na Gadi ne inusu ye idikabila dya Manase nendile yana wagomba nkondo wakankalu kwe nkondo wakubula milongo mine na wane elufu magana mfungate na milongo mtandatu wakudaha kwinula nchingo na mabamba naho wadahi wa kulasa mifulo kwe nkondo. 19Wagombaga nkondo ne izinkolo za Wayetuli na Wanafishi na Wanodabu na Wahajili. 20Nawaika msuhi wawo kwa Chohile niyo wamlombeza awambize, Chohile niyo etikila idilombezo dyawo, vyaleka awenka uhuda mwa Wahajili na wambuya zawo. 21Wataha vintu kulawa kwa awankondo wawo, ngamiya elufu milongo mishano na ngoto laki mbili na milongo mishano elufu na mpunda elufu milongo midi, niyo wataha wantu elufu mlongo umwenga. 22Niyo wawakoma wankondo wawo walozese, kwaviya nkondo iyo wambizwa ni Chohile. Niyo wajendeleza kwikala mwe isi iyo kubula mwe ichipindi cho kwigalwa ko usamizo.

Inusu ye idikabila dya Manase

23Inusu ya awantu we idikabila dya Manase ntendele ya ulailo wa zuwa nendile walozesa niyo wazagala kukongela Bashani kubula komzi wa Baali Helimoni na kwamagulu ya Senili na Helimoni ntendele ya chenya. 24Mazina ye vilongozi we izinkolo izo nendile ni Efeli na Ishi na Elieli na Azilieli na Yelemiya na Hodaviya na Yadiyeli. Wose nendile ni wagomba wakankalu wa nkondo, wantu wamanyikise masekulu we izinkolo izo.

Inusu ya amakabila ya ulailo wa zuwa yegalwa kousamizo

25Mna wantu awo niyo wamleka Chohile ywa wababa zawo, wajesa mbuli za vilanga kwa kuvikila milungu ya wekazi we izisi izo Chohile abalange kulongozi kwawo. 26Ivyo Chohile ywa Izulaeli niyo amsonga maya Puli, seuta ywa Ashulu naho nendile kamanyika enga Tigilati Pileseli, niyo ayebunga isi yawo, awataha na kuwaguha Walubeni na Wagadi ne inusu ye idikabila dya Manase kubula kwe mizi ya Halu na Haboli na Hala na Komto wa Gozani uko wakwikala kubula dyelo.