Mihilimo 7

Welekwa wa Isakali

1Wana wa Isakali wendaga wane, Tola na Pua na Yashubu na Shimloni.

2Wana wa Tola wendaga ni mtandatu, Uzi na Lefaya na Yelieli na Yamai na Ibusamu na Shemueli. Awo wendaga wakulu we izikaya mo lukolo lwa Tola na wendaga wagomba nkondo wakankalu vitendese. Umo Seuta Daudi akalongoza mligano wawo wendaga wantu elufu milongo midi na midi na magana mtandatu.

3Uzi endaga na mwana yumwenga, idizina dyakwe naketagwa Izilahiya. Wana wa Izilahiya nendile ni wane, Mikaeli na Obadiya na Yoeli na Ishiya, wose wendaga ni masekulu we zinkolo. 4Kwaviya welekwa wawo nawalozesa wendaga na wana wa wachilume wakudaha kulavya mafyo ya wagomba nkondo wakubula Elufu milongo mitatu na mtandatu.

5Walukolo wawo mo lweleko lwawo lose mwe idikabila dya Isakali wawandikwe kutimila izinkolo zawo wendaga ni Elufu milongo mnane na mfungate elufu, wose wendaga wakankalu wa kugomba nkondo.

Welekwa wa Benjamini na Dani

6Benjamini endaga na wana watatu, Bela na Bekali na Yedaeli. 7Bela endaga na wana washano, Eziboni na Uzi na Uzieli na Yelemoti na Ili. Awo wendaga masekulu wa nkolo zawo naho wagomba nkondo wakankalu. Wawandikagwa kwa kutimila nkolo, wagomba nkondo wose mligano wawo wendaga Elufu milongo midi na midi na milongo mitatu na nne.

8Bekali endaga na wana chenda, Zemila na Yoashi na Eliezeli na Elihonai na Omli na Yelemoti na Abiya na Anasoti na Alementi. Awo wose wendaga wana wa Bekeli. 9Wawandikwe kwa nkolo kuligana na vyeleko vyawo saviya masekulu mligano wawo wendaga Elufu milongo midi na magana maidi wakudaha kugomba nkondo.

10Yedieli endaga na mwana yumwenga, zina dyakwe naketangwa Bilihani, na Bilihani endaga na wana mfungate, Yeushi na Benjamini na Ehudi na Kenana na Zetani na Talishishi na Ahishahali. 11Wose awo wendaga masekulu mwa awelekwa wawo ne izinkolo zawo naho wagomba nkondo wakankalu. Welekwa wawo mligano wawo ni wantu elufu mlongo umwenga na mfungate na magana maidi wakudaha kwita kwenkondo. 12Shupimu na Hupimu nawo wendaga wantu we idikabila idyo. Dani endaga na mwana yumwenga zina dyakwe naketangwa Hushimu.

Welekwa wa Nafutali

13Nafutali endaga na wana wane, Yazieli na Guni na Yeleli na Shalumu. Mami yakwe dya Nafutali naketangwa Biliha.

Welekwa wa Manase

14Manase endaga na wana waidi mwe chilaga chakwe ywa kabila dya Walami, Asilieli na Makili. Makili niyo amweleka Gileadi. 15Makili niyo awalombela wanawe waidi Hupimu na Supimu, zina dya lumbudye naketangwa Maaka. Mwana ywa kaidi ywa Makili ni Selofehadi. Selofehadi endaga na wana chiche awodu.

16Maaka, mkaza makili, elekaga wana waidi, ywa nkongo naketangwa Peleshi na mlukolo ywakwe naketangwa Sheleshi. Wana wa Peleshi wendaga waidi, Ulamu na Lekamu, 17na Ulamu endaga na mwana akwitangwa Bedamu. Wano wose wendaga welekwa wa Gileadi, mwana ywa Makili mwezukulu ywa Manase, 18Giliyadi endaga na lumbudye akwitangwa Hamoleketi endaga na wana watatu, Ishihodi na Abiezeli na Mala. 19Shemida endaga na wana wane, Ahiani na Shekemu na Likihi na Aniamu.

Welekwa wa Efulaimu

20Wano nawo welekwa wa Efulaimu kulawa cheleko kubula cheleko, Shutela na Beledi na Tahati na Eleadahi na Tahati, 21Zabadi na Shutela. Ukaleka Shutela, Efulaimu endaga na wana watuhu waidi, Ezeli na Eleadi awo wakomagwa ni wekazi we idikolwa dya wanasi wa Gasi hadya waitaga kuwapolaganya uludimo lwawo. 22Tati yawo Efulaimu alombolezaga ifile yawo kwa mazuwa yalozese, na walukolo wakwe niyo weza kumhoza. 23Elo Efulaimu niyo agona na mkaziwe vituhu, mkazite niyo atenda msoka na kwefungula mwana ywa chilume. Efulaimu niyo amwinka zina dya Beliya, kwa udya uchiwa ulaile mo lukolo lwakwe.

24Efulaimu endaga na mwana ywa chiche zina dyakwe naketangwa Shela. Uyo nuyo aizengile imizi ya Besiholoni ya kuchenya na hasi na Uzenishelahi. 25Naho Efulaimu elekaga wana akwitangwa Lefai na Leshefu na Tela na Tahani, 26Ladani na Amihudi, na Elishama, 27na Nuni na Yoshuwa.

28Wikazi wawo wendaga Beteli ne izikaya zakwe zizunguluke, Nalani mzi wendaga ntendele ya ulailo wa zuwa na Gezeli wendaga ntendele ya uswelo wa zuwa hamwenga ne zikaya zakwe, seivyo Shekemu ne zikaya zakwe, na Aya ne zikaya zakwe. 29Mwe mihaka yezintendele wendile wakekala welekwa wa Manase, Besi sheani ne zikaya zakwe na Tanaki ne izikaya zakwe zizunguluke na Megido ne zikaya na Doli ne zikaya zakwe. Zino zose ni zintendele wendaga wakekala welekwa wa Yusufu mwana ywa Izulaeli.

Welekwa wa Asheli

30Wano nawo welekwa wa Asheli. Uyo Asheli endaga na wana wane, Imna na Ishiva na Ishivi na Beliya na mchiche yumwenga zina dyakwe naketangwa Sela. 31Beliya endaga na wana waidi, Hebeli na Malikieli uyo endaga tati yakwe dya Bilizaili. 32Hebeli endaga na wana watatu, Yafuleti na Shomeli na Hotamu na mwana chiche yumwenga zina dyakwe naketangwa Shuwa. 33Yafuleti naye endaga na wana watatu, Pasaki na Bimahali na Ashivati. 34Mlukolo ywakwe Shemeli endaga na wana watatu, Loga na Yehuba na Alamu. 35Helamu mlukolo mtuhu ywa Shomeli endaga na wana wane, Sofa na Imna na Sheleshi na Amali. 36Welekwa wa Sofa wendaga ni Suwa na Hanefeli na Shuali na Beli na Imla, 37Bezeli na Hodu na Shama na Shilisha na Itilani na Bela. 38Welekwa wa Yeteli wendaga Yefune na Pisipa na Ala, 39na Welekwa wa Ula wendaga ni Ala na Hanieli na Lisiya. 40Awo wose wendaga welekwa wa Asheli. Wendaga masekulu wamanyikise mo welekwa wawo, wantu wakankalu, wawazagwa ni elufu milongo midi na mtandatu wakudaha kugomba nkondo.