Mihilimo 2

Welekwa wa Yuda

1Yakobo iviya naketangwa Izulaeli endaga na wana chilume mlongo umwenga na waidi, Lubeni na Simoni na Lawi na Yuda na Isakali na Zabuloni, 2na Dani na Yusufu na Benjamini na Nafutali na Gadi na Asheli.

3Yuda endaga na wana washano, Eli na Onani na Shela awa awelekaga na mkaziwe mchiche ywa Shuwa kulaila kweisi ya Kanani. Mna Eli mwelekwa ywa nkongo ywa Yuda endaga akamdamanyiza wavu Zumbe Chohile, Zumbe Chohile niyo amkoma. 4Yuda niyo eleka wana waidi kwa mkwewe Tamali, Pelesi na Zela. Mligano wawo ni washano.

5Pelesi nendile ana wana waidi, Heziloni na Hamuli. 6Zela endaga na wana wa chilume ni washano, Zimli na Itani na Hemani na Kalikoli na Dala. 7Mwana ywa Kalimi nendile ni Akali. Akali nivyo kugamba nkunto. Uyo awajelaga Waizulaeli mwe nkunto kwaviya aguhaga vintu vikukizwe kwachausa cha Zumbe Chohile.

8Mwana ywa Itani nendile ni yumwenga, naketangwa Azaliya.

Lweleko lwa Seuta Daudi

9Wana wa Heziloni nendile ni Yelameli na Lamu na Kalebu.

10Lamu kamweleka Aminadabu, Aminadabu amweleka Nashoni sekulu ywe idikabila dya Yuda. 11Nashoni kamweleka Salimoni, Salimoni amweleka Boazi, 12Boazi amweleka Obedi, Obedi amweleka Yese.

13Yese endaga na wana mfungate wa chilume. Eliyabu mwanawe ywa nkongo naho niyo amweleka Abinadabu mwanawe ywa kaidi, Shama nendile ni mwanawe ywa katatu, 14mwana ywa kane naketangwa Nasanieli ywa shano naketangwa Ladai. 15Ywa mtandatu ni Ozemu ywa mfungate ni Daudi. 16Walumbu zawo nendile ni Seluya na Abigaili. Wana wa chilume wa Seluya ni Abishai na Yoabu na Asaheli. 17Abigaili kamweleka Amasa ise nendile ni Yeteli kulaila mo lweleko lwa Ishumaeli.

Lweleko lwa Heziloni

18Kalebu mwana ywa Hesiloni nendile ana wavyele waidi Azuba na Yelioti, niyo eleka wana watatu mwa mkaziwe ywe nkongo Azuba, Yeseli na Shobabu na Alidoni. 19Azuba eze abanike, Kalebu amsola Efulati amwelekela Huli. 20Huli kamweleka mwana chilume akwitangwa Uli, Uli amweleka Besaleli.

21Heziloni eze abuze mihilimo milongo mtandatu, niyo asola mchiche ywa Makili, lumbu dya Gileadi, niyo eleka mwana chilume akwitaangwa Segubu. 22Segubu keleka mwana chilume akwitangwa Yaili uyo kalongoza mizi mikulu milongo midi na mitatu mwe isi ya Gileadi. 23Mna Geshuli na Alamu niyo wawebunga na kutaha imizi ya Yaili na Kenati ne izikaya zakwe, mizi yose mligano wakwe nendile ni milongo mtandatu. Awo wose nendile ni welekwa wa Makili ise dya Gileadi. 24Heziloni eze abanike, niyo Kalebu amsola Efulata mwasigwa ywa ise Heziloni. Efulata niyo amwelekela Kalebu mwana chilume akwitangwa Ashulu, uyo nuyo nkongelo yo kuzenga umzi wa Tekowa.

Lweleko lwa Yelameli

25Yelameli mwelekwa ywa nkongo ywa Hesiloni nendile ana wana washano, ywa nkongo ni Lamu, Buna na Oleni na Osemu na Ahiya. 26Yelameli nendile ana mvyele mtuhu naketangwa Atala. Uyo niyo amwelekela mwana Yelameli akwitangwa Onamu. 27Lamu mwelekwa ywa nkongo ywa Yelameli wanawe nendile ni Masi na Yamini na Ekeli. 28Wana wa Onamu nendile ni Shamai na Yada. Wana wa Shamai nendile ni Nadabu na Abisuli.

29Abisuli niyo asola mvyele akwitangwa Abihaili niyo eleka wana waidi, Abani na Molidi. 30Wana wa Nadabu nendile ni Seledi na Apimu. Mna Seledi abanikaga hene wana. 31Mwana ywa Apimu nendile ni Isi. Mwana ywa Isi nendile ni Sesani. Mwana ywa Sesani nendile ni Alai.

32Yada mlukolo ywa Shamai wanawe ni Yeteli na Yonasani, mna Yeteli abanikaga hene wana. 33Yonasani nendile ana wana waidi, Peleti na Zaza. Wose ni lweleko ywa Yelameli.

34Shesheni nendile hana wana chilume, nendile ni wana chiche du. Mna nendile ana mndima Mmisili, zina dyakwe naketangwa Yala. 35Elo niyo amloza mwanawe asolwe ni Yala mndima ywakwe niyo eleka mwana akwitangwa Atai. 36Atai niyo amweleka Nasani, Nasani niyo amweleka Zabadi, 37Zabadi niyo amweleka Efulali, Efulali niyo amweleka Obedi, 38Obedi niyo amweleka Yehu, Yehu niyo amweleka Azaliya, 39Azaliya niyo amweleka Helesi, Helesi niyo amweleka Elasa, 40Elasa amweleka Sisimai, Sisimai amweleka Salimu, 41Salimu niyo amweleka Yekamiya, Yekamiya niyo amweleka Elisama.

Welekwa watuhu wa Kalebu

42Mwelekwa ywa nkongo ywa Kalebu mlukolo ywa Yelameli naketangwa Mesa, Mesa kamweleka Zifu, Zifu amweleka Malesha, Malesha amweleka Hebuloni. 43Wana wa Hebuloni nendile ni Kola na Tapuwa na Lekemu na Shema. 44Shema niyo amweleka Lekamu, Lekamu amweleka Shamai. 45Shamai amweleka Maoni. Maoni amweleka Betisuli.

46Kalebu nendile ana msuntaviya ywakwe akwitangwa Efa, niyo amwelekela wana, Halani na Moza na Gazezi, Halani nendile ana mwana akwitangwa Gazezi.

47Yadai nendile ana wana mtandatu, Legemu na Yotamu na Gesani na Peleti na Efa na Shafu.

48Kalebu nendile ana msuntaviya mtuhu akwitangwa Maka. Uyo ni amwelekela wana waidi Shebali na Tihana. 49Naho niyo amweleka Shafu, Shafu mzesi ywa nkongo ywo mzi wa Madimana, na Sheva mzesi ywa nkongo ywo mzi wa Makibena na Gibeya.

Naho Kalebu nendile ana mwana chiche akwitangwa Akisa.

50Kalebu nendile ana wana watuhu kwa mkaziwe Efulata. Mwelekwa ywakwe ywa nkongo endaga ni Huli, Huli endaga na wana watatu, mwelekwa ywa nkongo ni Shobali mzesi ywa nkongo ywo mzi wa Kiliyati Yelimu, 51ywa kaidi ni Salimu mzesi ywa nkongo ywo mzi wa Betelehemu, ywa katatu ni Halefu, mzesi ywa nkongo ywo mzi wa Besigadeli.

52Shobali mzesi ywa nkongo ywo mzi wa Kiliyati Yalimu nendile ni babawo awantu wa Halowe ne inusu ya wantu wa Wamenuhosi. 53Nkolo ntuhu nazikela ko mzi wa Kiliyati Yealimu ni Waisili na Waputi na Wasumati na Wamofila. (Wazolati na Waesitaoli walawana na Wamishalai).

54Salimu mzesi ywa nkongo ywo umzi wa Betelehemu nendile ni babawo Wanetofasi na Watulosi Besi Yoabu ne inusu ya Wamenuhosi na Wazoli.

55Zino ni nkolo za wata kuwandika wekalaga wakekala ko mzi wa Yabesi, Watilati na Wasimeati na Wasukati, Awo nawo Wakeni walaile mo lweleko lwa Hamati, endaga babawo dya Walekabu.