Tic Pa Lukwena

Tic pa

LUKWENA

Lanyut wilok madito ma i buk man

Buk me Tic Pa Lukwena kube ki Kwena Maber ma Luka ocoyo. Miti pa ngat ma ocoyo buk man en aye me tito kore kikore kit ma jo ma lubu Yecu Kricito onyayo kwede Kwena Maber i Jerucalem, i lobo me Judaya ki i Camaria, wa ibut lobo mukene mapatpat 1:8. Buk man keken aye tito kit ma Kwena Maber pa Rwotwa Yecu Kricito ocako nya kwede oromo wilobo ducu. Dok ngat ma ocoyo buk man onyutu kamaleng ni Lukricitayo gin obedo jo ma pe yenyo loc me lobo man, piman gin pe gukelo kit ayela mo wa ki acel ikom loc pa jo Roma.

Buk me Tic pa Lukwena bene kipoko iye i dul adek madongo, ma nyutu kamaleng kit ma Kwena Maber ma mako kom Yecu Kricito onya kwede i kabedo ducu mapatpat: (1) Cake pa dul pa Lukricitayo ki i Jerucalem inge dok pa Yecu iwi Polo; (2) Nya pa dul man i lobo Palicitina; (3) Nya pa dul pa Lukricitayo i kabedo ma orumu nam Mediterranean nio kwede wa i Roma.

Gin ma onyute kamaleng i buk man me Tic pa Lukwena en aye tic pa Cwiny Maleng ma obino ki tek mere ikom luye ducu ma oye Yecu i Jerucalem inino me Pentekote, ki Cwiny Maleng omede ki tiro luye iticgi ducu bene kun jingo cwiny lutela i gin ducu ma kicoyo i buk man. Kwena Maber ma cegocego ma nonge i buk man en aye Kwena Maber ma kibedo katito ne i kabedo mapatpat. Dong gin ma obedo katime i buk man nyutu tek matye ilok me Kwena Maber pa Yecu Kricito ikwo pa jo ma guye kacel ki inywako me Kanica.

Lacim wilok madito ma i buk man

Yube me miyo caden

a. Cik ki cike me agiki pa Yecu

b. Yero lale katyen Juda

Caden ma ki i Jerucalem

Caden ma ki i Judaya ki i Camaria

Tic pa Paulo ka mapatpat

a. Wot mukwongo pa Paulo

b. Kacoke madit i Jerucalem

c. Wot me aryo pa Paulo

d. Wot me adek pa Paulo

e. Paulo lamabuc i Jerucalem, Cecaria, ki i Roma