Tic Pa Lukwena 15

Coke madit i Jerucalem

11

Ento jo mogo gubino ki i Judaya ma gupwonyo utmego ni, “Ka pe kilirowu macalo Cik pa Moses tye, pe wutwero lare.” 2Ma omiyo Paulo ki Barnaba gubedo ka laro lok ki pyem kwedgi matek. Ci ki yero Paulo ki Barnaba ki jo mukene, kicwalogi Jerucalem bot lukwena ki ludongo pi lok man. 3Kitmeno ka lwak ma oye Yecu gutyeko lwokogi ci guwok ki i Poiniki ki lobo Camaria kun gitito kit ma Lurok guloke kwede bot Kricito ci gukelo yomcwiny madwong bot utmego ducu. 4Ma guo i Jerucalem, lwak ma oye Kricito, kacel ki lukwena ki ludongo, gujologi maber, ci gutito gin ducu ma Lubanga obedo katiyone kwedgi. 5Ento jo mogo ma guye ma gitye i dul pa Luparicayo gua malo bene kun giwaco ni, “Myero kong kilirgi, ki cikogi ni gumak Cik pa Moses.”

6Lukwena ki ludongo gucoke kacel ka laro lok man. 72 Ka pyem dong obedo dwong, ci Petero oa malo owaco botgi ni, “Utmego, wun wungeyo ni yam con Lubanga oyero an ki ikinwu ni Lurok guwinyo lok me Kwena Maber ki idoga ka guye. 8Dok Lubanga ma ngeyo cwiny dano ducu obedo cadengi pi miyogi Cwiny Maleng macalo yam omiyo botwa. 9En pe oketo apokapoka ikinwa ki gin, ento olonyo cwinygi pi niye. 10Pingo wun wutemo i Lubanga ma wumito riyo okol mapek i ngut lupwonye ma tingone oloyo kwariwa kadi wa wan bene? 11Ento wan waye ni wabilare pi kica pa Rwotwa Yecu, ki gin bene kitmeno.”

12Ka dong jo mucoke ducu guling mot, kun giwinyo kit ma Barnaba ki Paulo gitito kit lanyut ki tango ma Lubanga obedo katiyogi kun wok ki botgi ikin Lurok. 13Ma dong gutyeko lokgi, ci Yakobo ogamo ni, “Utmego, wuwinya. 14Cimeon dong otito kit ma Lubanga okwongo nyutu kwede ni eparo pi Lurok kun okwanyo ki ikin gi lwak ma kilwongo ki nyinge. 15Man rwate ki lok mayam lunebi guwaco, macalo kicoyo ni, 163

‘I nge meno abidwogo,

ci abigero aduc pa Daudi mayam opoto pinyi,

abigero odoco kama yam obale,

abiroco odoco amiyo cung maber,

17wek jo mudonge guyeny Rwot,

kacel ki Lurok ducu ma kilwongogi ki nyinga.

18Meno Rwot aye ma owaco ma omiyo lok meno ongene nia wa con.’

19Ma omiyo an angolo ni, pe myero wayelu Lurok ma guloke bot Lubanga. 204 Ento myero wacoyu waraga botgi ni pe gucam gin mo ma kityero inyim jogi, pien odoko gin me kwer, pe gutim tim tarwang, pe gucam ringo lee ma kideyo adeya, pe gucam remo. 21Pien cake ikare macon Moses tye ki jo ma gitito loke i taun madito ducu, kun gikwano cike i kacoke i ceng Cabit ducu.”

Waraga bot Lurok ma guye Yecu

22Ka dong lukwena ki ludongo, kacel ki lwak ma oye Kricito ducu, gutamo ni ber kiyer dano ki ikin gi, kicwalgi i Antiokia kacel ki Paulo ki Barnaba. Ci gucwalo Juda ma kilwongo Barcaba, ki Cira, gin aye jo ma gidito ikin utmego. 23Gumiyo botgi waraga ma kwane kit man ni, “Bot utmego ma Lurok ma i Antiokia ki Ciria ki Cilicia. Wan utmegiwu ma lukwena ki ludongo wamotowu mada. 24Wawinyo ni dano mogo ma gua ki botwa gubedo ka yelowu ki lok mapol, ki rubu tamwu woko, kadi bed wan pe wacikogi ki kit lok macalo meno. 25Pimeno wan ka wacoke waneno ni ber wayer dano wacwalgi botwu kacel ki Barnaba ki Paulo, ma wamarogi tutwal. 26Gin jo madong gudyero kwogi pi Rwotwa Yecu Kricito. 27Ma omiyo wacwalo botwu Juda ki Cira, gin bene ki komgi gibititowu lok ki dogi marom ki man ma wacoyo ni. 28Cwiny Maleng oneno ni ber, kacel ki wan bene, ni pe waket yec mapek tutwal ikomwu makato lok magi ma pirgi tego: 29pe wucam gin ma kityero bot jogi, pe wucam remo ki ringo lee ma kideyo adeya, pe wutim tim mo me tarwang. Ka wugwoke ikom meno ducu, ci wubitimo ber. Dong wubed maber.”

30Kitmeno ka kicwalogi, ci gin gucito i Antiokia; ka dong gucoko lwak kacel, ka kimiyogi waraga. 31Ka dong gutyeko kwano, ci cwinygi obedo yom ikom lok ma kicoyo iye me cuko cwinygi. 32Juda kacel ki Cira, ma gin bene lutit lok pa Lubanga, gucuku cwiny utmego ki lwak lok mapol ma omiyogi teko. 33Ka dong gutyeko nino mapolpol kunu, ci gulwokogi ki kuc ka gidok bot utmego mayam gucwalogi ni. 34Ento Cira otamo ni ber edong kunu.5 35Ento Paulo ki Barnaba gudong i Antiokia, kun gipwonyo dano ki tito lok pa Rwot, kacel ki jo mukene mapol bene.

Paulo ki Barnaba Gupoke woko

36I nge kare manok Paulo owaco ki Barnaba ni, “Bin wek wadok ka limo utmego ma i taun ducu mayam watucu iye lok pa Rwot, wanen kit ma gitye kwede.” 37Ci Barnaba onongo mito ni giwot ki Jon ma nyinge mukene Marako. 386 Ento Paulo otamo ni pe dok ber me tero dano mayam oa owekogi i Pampulia, pe owoto kwedgi i dog tic. 39Ci gubedo ka laro lok magwa, nio ka kin gi opoke woko. Barnaba owoto ki Marako ci gukwango nam gucito i Caiprac, 40ento Paulo oyero Cira ci gua madong utmego omiyogi i cing Rwot wek okonygi ki kicane. 41Ci Paulo owoto obaro i Ciria ki Cilicia kun miyo tekcwiny bot lwak ma oye Kricito.