Tic Pa Lukwena 14

Paulo gucito Ikonio

1Ikare ma Paulo ki Barnaba dong gitye i Ikonio, gudonyo i kacoke pa Lujudaya macalo kitgi tye. Dong pi kit ma guloko kwede omiyo lwak jo mapol ikin, Lujudaya ki Lurok guye Rwot. 2Ento Lujudaya ma pe guye gutugu Lurok ma omiyo cwinygi odoko kec ikom jo ma oye Yecu Kricito. 3Paulo ki Barnaba gubedo kunu pi kare malac kun giloko pi Rwot ki tekcwiny labongo lworo, Rwot bene omiyogi twero me tiyo lanyut ki tango mapol ma omoko kwede lok ma gitito ikom kicane. 4Ento jo Ikonio igi opoke woko; dul mogo gudok kom Lujudaya, ki dul mogo ikom lukwena. 5Ka Lurok ki Lujudaya guribe kacel ki lulocgi pi bino katimogi marac ki celogi ki got. 6Ka gugwilo loke ci gupuce woko wa i Licitra ki Derube, taun madito ma i lobo Likaonia, ki i lobo ma orumu kenyo; 7Gin gubedo katucu lok me Kwena Maber kunu.

Paulo ki Barnaba i Licitra ki Derube

8I Licitra onongo tye iye laco mo ma onongo laput nia ikare ma kinywale pe omedo ki woto ki tyene. 9En obedo kawinyo ka Paulo loko, ci Paulo ociko wange onene, ci oniang ni en tye ki niye ma oromo ma weko en cang. 10Ci Paulo owace matek ni, “Aa malo, icung ki tyeni atir.” Ci olenge malo opye, ocako wot. 11Ka lwak guneno gin ma Paulo otiyo, ci gudange matek i leb Likaonia kun gin waco ni, “Lubanga gulor piny botwa macalo dano!” 12Gulwongo Barnaba ni Jeuc1 ki Paulo ni Ermec, pien en aye lalok makato. 13Ajwaka pa Jeuc matye ki ot woro jokgi inge taun kacel ki lwak gukelo twon ma kideyo ki ature i dogcel me taun kun gimito tyero gitum bot lukwena. 14Ento ka lukwena Barnaba ki Paulo guwinyo pire, ci guyeco bongigi kun kibaro dye lwak ki dange ni, 152 “Wun wutimo kit man pingo? Wan bene wa dano, ma kitwa rom ki mewu. Wakelo botwu lok me Kwena Maber, wek wun wua woko ki bot gin ma konye peke, wuloke bot Lubanga makwo mayam ocweyo polo ki lobo ki nam ki gigu ducu matye. 16Yam ikare macon en oye ni rok ducu gulub yogi ken gi. 17Kadi bed kitmeno, kare ducu en bedo ki cadene ma nyutu ni en tye. En otimowu ber kun cwalo botwu kot ma ocwer ki ipolo, dok miyowu kit cam mapatpat ma cek ka karegi oromo mamiyo wuyeng ki cam, cwinywu bene bedo yom.” 18Kadi bed guloko lok meno, juku lwak wek pe gutyer gitum botgi obedo tek tutwal.

19Ento Lujudaya mogo gucito kunu ma gua ki i Antiokia ki i Ikonio. Gupiyo lwak, ka gucelo Paulo ki got ci guywayo woko gutere inge taun madit meno, kun gitamo ni dong oto woko. 20Ento ka lupwonye gucoke bote, ci oa malo odonyo i taun madit meno. Orwone guwoto gin ki Barnaba wa i Derube.

Dok cen i Antiokia ma i lobo Ciria

21Ka Paulo ki Barnaba dong gutucu lok me Kwena Maber i taun madit meno, ki nongo lwak lupwonye mapol, ci gudok cen i Licitra ki Ikonio ki Antiokia ma i lobo Picidia. 22Kunu gujingo cwiny lupwonye, ki cuko cwinygi ni gumede i niye, ma giwaco ni, “Omyero wadony i can madwong ka wakat kwede i ker pa Lubanga.” 23I kabedo acel acel ma jo ma guye Kricito tye iye, guketo ludongo makakagi ki lega ki rii kec, ci gumiyogi i cing Rwot mayam gin guyeni.

24Ka guwoto gukato ki i Picidia, ci gubino wa i lobo Pampulia. 25Ka gutyeko tito lok pa Lubanga i Perga ci gucito piny i Atalia. 26Ka gua ki kunu gukwang nio i Antiokia, kama yam kimiyogi iye i cing Lubanga wek en okonygi ki kicane ikom tic madong gutyeko coboneni.

27Ka guo i Antiokia, gucoko lwak ma oye Yecu kacel, ci gutito botgi gin ducu madong Lubanga otyeko tiyo kacel kwedgi, ki kit ma oyabo kwede dogola me niye bot Lurok. 28Ci gubedo kunu ki lupwonye pi kare malac.