Tic Pa Lukwena 13

Yero ki oro Barnaba gin ki Caulo

1Ikare meno lwak jo ma oye Yecu matye i Antiokia onongo dong gin tye ki lunebi ki lupwony: Barnaba, Cimeon ma kilwongo Niga, Lukia me Cirene, ki Manaen ma odongo kacel ki Kerode laloyo, ki Caulo. 2Ikare ma gitye kamiyo woro bot Rwot ki nirii kec, ci Cwiny Maleng owaco ni, “Wukwanya Barnaba ki Caulo pi tic ma alwongogi pireni.” 3Lacen ka dong gutyeko lega ki nirii kec, ci guketo cinggi ikomgi ka gucikogi.

Lukwena gutito lok pa Lubanga i Caiprac

4Ka Cwiny Maleng ocwalo Barnaba ki Caulo, ci gucito i dog nam i Celeukia; ka gua ki kunu gukwang gucito i Caiprac. 5Ka guo i Calamic, gutucu iye lok pa Lubanga i kacoke pa Lujudaya. Gin onongo gitye kacel ki Jon Mark ma lakonygi. 6Ka guwoto gurumu i cula ducu nio wa i Papo, ci gurwate ki laco mo ma obedo latyet, lanebi ma lagoba, Lajudaya, ma nyinge Bar - Yecu. 7En obedo kacel ki laloyo, Cergio Paulo, en laco ma laryeko. Laloyo olwongo Barnaba ki Caulo bote kun onongo mito winyo lok pa Lubanga. 8Ento Elima ma latyet (meno aye telok me nyinge) ocako pyem kwedgi kun mito ngako laloyo woko ki i niye. 9Ento Caulo ma kilwongo bene ni Paulo, ka en opong ki Cwiny Maleng, ociko wange ikome, 10ci owace ni, “In latin pa Larac, in lamerok me kit ducu matye atir, ipong ki lok me bwola, labal wi dano, in pud ibimede ki dwanyo yo pa Rwot ma ocung atiri? 11Kombedi teko pa Rwot opoto ikomi; wangi bicor woko, pe ibineno ceng pi kare mo.”

Cutcut lupuu ocido wange woko, ci opange kun yenyo dano wek omak bade opeye. 12Laloyo oye Yecu ikare ma oneno gin ma otimeni, pien obedo ka uru kit pwony ma kimiyo ikom Rwot.

Kitito lok i Antiokia me lobo Picidia

13Lacen Paulo ki luwote gukwang gua ki i Papo, gucito i Perga i lobo Pampulia. Ci Jon owekogi odok woko i Jerucalem. 14Ento gin gua ki i Perga gucito i Antiokia me lobo Picidia, ci gudonyo i kacoke i ceng Cabit, gubedo piny. 15Ka dong kityeko kwano Cik pa Moses ki lok pa lunebi, ci ludito me kacoke gucwalo lok botgi kun gipenyogi ni, “Utmego, ka wutye ki lok mo me cuko cwiny dano, ci wuwaci.” 16Ka Paulo ocung ci ojukugi ki cinge kun waco ni, “Jo Icrael, ki wun dano ma wulworo Lubanga, wuwiny. 171 Lubanga pa rok pa jo Icrael yam oyero kwariwa, ci omiyo dano gunya madwong ikare ma gubedo i Ejipt. En okwanyogi woko ki kunu ki tek mere. 182 Odiyo cwinye ikomgi i tim pi mwaka pyere angwen. 193 Dong ka otyeko rok abiro ma i lobo Kanaan ni woko, ci omiyogi lobo meno me bedo meggi. Man ducu otime pi mwaka maromo miya angwen ki pyere abic. 204 Lacen omiyogi lungolkop nio kwede wa ikom Camuel ma lanebi. 215 Lacen ka gupenyo pi rwot; ci Lubanga omiyo botgi Caulo wod pa Kic, laco ma a ki i kaka pa Benjamin, pi mwaka pyere angwen. 226 Ka dong okwanye woko, ci oyero Daudi, oketo me bedo rwotgi. Otito pi Daudi kun waco ni, ‘Atyeko nongo Daudi wod pa Yece; en laco ma yomo cwinya, ma bitiyo gin ma amito ducu.’ 23Lubanga okelo Lalar bot Jo Icrael ki ikin likwayo pa laco meno, macalo yam, ociko, en aye Yecu. 247 Ikare ma peya obino, Jon otito lok bot Jo Icrael ducu ni gin onguti ikom balgi wek kibaticagi. 258 Ikare ma Jon dong cok cobo dog tice en owaco ni, ‘Wun wutamo ni an anga? An pe angat ma wukuruni; ento dano ma bibino ma lubu kora, an pe amyero me gonyo war tyene.’

26Utmego, wun likwayo ma i kaka pa Abraim, ki jo mukene ma ikinwu ma gilworo Lubanga, wan aye kicwalo botwa lok man me lare. 27Ento jo mayam gibedo i Jerucalem, ki luditogi, onongo pe giniang ikome, pe bene guniang lok mayam lunebi gutito ki ma kikwano nino ducu i ceng Cabit. Ci gucobo lok pa lunebi kun gungolo lok me to iwi Yecu. 289 Kadi pe gunongo bal mo ikome, gin gungole to, ci gulego Pilato wek oye kineke. 2910 Ka dong gutyeko cobo lok mayam kicoyo ikome ducu, ci gukwanye woko ki ikom yat, gupyelo kome i lyel. 30Ento Lubanga ocere woko ki ikin jo ma oto. 3111 Dok obedo ka nen pi nino mapol bot jo mayam gua kwede ki i Galilaya gubino kwede i Jerucalem, ma koni gin aye cadene bot lwak. 32Wan bene wakelo botwu lok me Kwena Maber ni, gin mayam Lubanga ociko pire bot kwariwa, 3312 en ocobo bot wan likwayogi pi cero Yecu, macalo yam kicoyo bene i jabuli me aryo ni,

‘In i Woda,

tin dong anywali.’ 3413

Lok ikom cero en ki ikin jo ma oto, ma pe kome dok bitop woko, yam oloko kit man ni,

‘Abimini gicike maleng ki ma gene

mayam aciko pi Daudi.’ 3514

Dok owaco bene i jabuli mukene ni,

‘Pe ibiweko kom danoni ma geni top woko.’

36Pien ka Daudi yam otyeko tic kun cobo yub pa Lubanga, en oto, ci kiyiko en kanget kwarine, kome otop woko. 37Ento ngat ma Lubanga ocero woko ni kome pe otop. 38Utmego, myero wunge ni, pi dano man en aye Lubanga oweko ki tucu kwena me weko bal bot wun ducu; 39ci omiyo ngat acel acel ma ye en ki kwanyo bale woko ducu ma pe kitwero kwanyo ki ikomwu ite Cik pa Moses. 40Ber dong wugwoke, wek gin mayam lunebi guloko pire ni pe opot ikomwu: 4115

‘Nen ba, wun lucac! Wuur matek,

ci wuto woko matwal!

Pien atye katiyo tic mo ikarewu ni

ma pe wun wubiye kadi matidi mo,

kadi ngat mo otucu pire botwu.’”

42Ikare ma gukato woko, lwak gulego ni lok man myero kitit botgi odoco i ceng Cabit mabino ni. 43Ka lwak ma gubedo i kacoke dong guket woko, ci Lujudaya mapol ki jo ma guloke i dini pa Lujudaya ma giworo Lubanga gulubu kor Paulo ki Barnaba, ci gin gubedo kalok kwedgi kun gicuku cwinygi ni myero gumede ki geno kica pa Lubanga.

44I Cabit ma olubu pol dano ma i gang meno gucore gugure kacel pi winyo lok pa Lubanga. 45Ento ka Lujudaya guneno lwak, ci nyeko omakogi, gucako pyem ki lok ma Paulo tito, ci guyete bene. 46Paulo ki Barnaba guloko ki tekcwiny labongo lworo, kun giwaco ni, “Onongo myero kong kikwong tito lok pa Lubanga botwu. Ento macalo dong wucwalo woko cen ni, dong wungolo giwu kenwu ni pe omyero pi nongo kwo ma pe tum. Dong wunen, waloke giwa bot Lurok. 4716 Pien Rwot yam ocikowa kun waco ni,

‘Aketo in me bedo dero bot Lurok,

wek imii lare oo bot jo me wi lobo ducu.’”

48Ka Lurok guwinyo lok man, ci cwinygi obedo yom, gucako pilo wilok pa Lubanga; ci jo ducu ma myero gunong kwo ma pe tum guye Yecu.

49Lok ikom Rwot omede oromo lobo meno ducu. 50Ento Lujudaya gurubu i mon ma giworo Lubanga ma gitye i rwom me dito mamalo, kacel ki ludito me taun madit meno ma giloyo dano, ci gubalo cwinygi woko; gucako yelo Paulo ki Barnaba ka guryemogi woko ki i lobogi. 5117 Ento gutengo apwa tyen gi wek obed caden ikomgi, ka gucito i Ikonio. 52Lupwonye cwinygi obedo yom dok gupong ki Cwiny Maleng.