Tic Pa Lukwena 12

Unu Lukwena omede

1Ikare meno rwot Kerode oketo aun ikom jo mogo ikin jo ma oye Kricito. 2Ci oneko Yakobo omin Jon ki pala lucwan. 3Ka dong oneno ni oyomo cwiny Lujudaya, ci omako Petero bene. Man otime ikare me nino madito me Mugati ma Tobi pe Iye. 4Ka dong omake, ci okete ibuc, ci omiye bot lukur piny matye i dul angwen mapatpat kun dul acel acel tye iye lukur piny angwen angwen wek gukure, kun mito ni gipid lok ikome inge nino madito me Karama me Kato. 5Gin gubedo ka kuru Petero i ot buc kitmeno. Ento lwak jo ma oye Kricito gubedo kalego Lubanga pire matek.

Kilaro Petero ki i buc

6I dyewor ma orune Kerode dong mito kelo Petero wokoni, onongo Petero obutu onino ikin acikari aryo, ma gutweye woko ki nyor aryo, ki lukur piny bene onongo gitye ka kuru dog ot buc. 7Ci Nen, lamalaika pa Rwot onen, ci dero ocaro i kicika. Ogoyo but Petero ocoye woko, kun waco bote ni, “A malo oyot.” Ci nyor opoto woko ki i cinge. 8Ci lamalaika owace ni, “Ruk ginarukani, irwak war i tyeni,” ci otimo kitmeno. Dok owace ni, “Dwal kanyini ikomi ci ilub kora.” 9Ci okato woko, olubu kore. En pe ongeyo ni gin ma lamalaika timo ni tye me ada; ento otamo ni etye ka lek. 10Ka dong gukato lukur piny ma okwongo ki me aryone, ci guo i dog ot ma giloro ki nyonyo ma kikato kwede woko i dye gang. Dogola oyabe kene, ci gukato gucito woko, gulubu yoo ka acel, ci lamalaika oweke woko. 11Ka Petero ocako niang pire kene kun waco ni, “Dong atyeko niang kombedi ni Rwot ocwalo lamalaikane olara woko ki i cing Kerode ki ikom gin ducu ma Lujudaya gigeno ni bitime ikoma ni.”

12Ka dong oniang, ci ocito i ot pa Maliam min Jon ma nyinge mukene Marako, kama jo mapol gugure iye, ma gitye kalega. 13Ka odwongo dog gang ma i yoo, ci angeca ma nyinge Roda obino ka niang ikome. 14Ka oniang dwon Petero, ci yomcwiny ogenge yabo doggang woko, ento oringo omwome i ot owaco ni, “Petero tye ocung woko i dog gang.” 15Gin guwace ni, “In lapoya.” Ento en orido ni tye ada. Gugamo ni, “Meno lamalaikane!” 16Ento Petero dok omede ki dwongo doggang, ka guyabo, ci guneno en, ci guuru. 17Ka ojukugi ki cinge ni guling, ci otito botgi kit ma Rwot okwanye kwede ki ibuc, kun waco ni, “Wutit lok man bot Yakobo ki bot utmego.” Ka oa woko ki kenyo, ocito woko kamukene.

18Ka piny oru, ci piny ocako lyeti woko ki bot acikari, ni Petero man otime ningning. 19Ka Kerode oyenye ci pe ononge, ka openyo acikari ma lukur piny, ci ociko ni kinekgi woko. Inge man Kerode oa woko ki i Judaya ocito i Cecaria, obedo kong kunu.

To pa Kerode

20Kiniga omako Kerode ikom jo Turu ki Cidon; ci gucoke gubino bote ma onongo gimer ki Blacito, ladit maloyo ot pa rwot. Ci gupenyo ni gimito kuc, pien lobogi limo cam ma a ki i lobo pa rwot Kerode. 21Ikom nino ma kiciko, Kerode oruku iye jor me kere, oito obedo kwede iwi komkere, ka dong ocako lok botgi. 22Ci lwak guwoo matek ni, “Man dwon lubanga, pe dwon dano!” 23Lamalaika pa Lubanga ogoye woko cut, pien pe omiyo deyo bot Lubanga; ci kwidi ocamo kome ci oto woko.

24Ento lok pa Lubanga onya omede ameda.

25Barnaba ki Caulo gudwogo i Jerucalem ma onongo dong gucobo tic ma kiorogi iye, ci gukelo Jon ma nyinge mukene Marako.