Tic Pa Lukwena 11

Petero odwoko lok bot jo muye Yecu i Jerucalem

1Ikare meno lukwena ki jo ma guye ma gitye i Judaya guwinyo ni Lurok bene dong guye lok pa Lubanga. 2Ka Petero ocito i Jerucalem, ci dul pa jo ma mito ni jo ma oye Kricito myero kong kilirgi gucako ngono en. 3Ci guwaco ni, “Pingo nene icito bot jo ma pe kilirogi ci icamo kwedgi?” 4Ento Petero ogamo lok man, kun tito botgi kore ki kore ni: 5“Ikare ma abedo i taun madit me Jopa ma abedo kalega, ci aneno gin anyuta. Aneno gin mo ma lor piny macalo cuka madit, kun bino piny matye ki twoke angwen, ci olor wa piny macok kweda inyima. 6Ka angiyo kome cok, ci aneno iye lee, nguu ki kwayi anyai ducu ki winyo mapatpat. 7Ci awinyo dwon ma waca ni, ‘Petero, a malo inek wek icam.’ 8Ento agamo ni ‘Pe, Rwot, pien peya jami ata ki me kwer odonyo idoga.’ 9Ento dwon odok iye ki ipolo ni, ‘Gin ma Lubanga olonyo in pe ilwong ni obedo me kwer.’ 10Man otime tyen adek, ci jami meno kidwoko woko ipolo. 11I cawa meno kikome en aye jo adek ma kicwalogi bota ki i Cecaria guo kwede i ot mayam watye iye. 12Ci Cwiny Maleng otita ni a i wot kwedgi, ma pe ipoko kin dano. Ci an aa awoto ki utmego man abiceli, ka wadonyo i ot pa dano meno. 13Ci en otito botwa kit ma eneno lamalaika ocung kwede i ode kun wace ni, ‘Cwal dano i Jopa wek guom Cimon ma kilwongo ni Petero. 14Dano man aye bititi lok ma bilaro in ki jo ma i odi ducu.’ 15Ikare ma acako lok, ci Cwiny Maleng opye ikomgi kit ma con okwongo pye ikomwani. 161 Ci apo lok mayam Rwot owaco, ni, ‘Jon yam obatija dano ki pii, ento wun kibibatijawu ki Cwiny Maleng.’ 17Kace Lubanga omiyogi mot marom aroma kit ma omiyowa ikare ma waye iye Rwot Yecu Kricito, ci an anga ma atwero pyem ki Lubanga?” 18Ka guwinyo lok man, ci guling litik, ka gucako pako Lubanga kun giwaco ni, “Lurok bene Lubanga dong omiyogi ngut me donyo i kwo.”

Lwak jo muye Kricito i Antiokia

192

Jo mayam guket ikare me nek ma ocake ikom Citefano ni guwoto nio wa Poiniki ki Caiprac ki Antiokia, kun pe gitito lok bot ngat mo, kono bot Lujudaya keken. 20Ento jo mukene ikin gi, jo me Caiprac ki me Cirene, ka guo i Antiokia ci guloko ki Lugrik bene kun gitito pi Rwot Yecu. 21Teko pa Rwot onongo tye ikomgi, ci lwak jo mapol guloke bot Rwot. 22Lok man owinye bot jo muye Kricito ma i Jerucalem, ci gucwalo Barnaba i Antiokia. 23Ma en oo kunu, oneno tic me kica pa Lubanga, ci cwinye obedo yom iye. Ci ocuku cwinygi me moko ikom Rwot matek ki cwinygi ducu. 24Barnaba onongo dano maber ma opong ki Cwiny Maleng ki niye. En oweko lwak jo mapol guloke bot Rwot.

25Ci Barnaba ocito Taruco kayenyo Paulo. 26Ikare ma ononge ci okele i Antiokia. Ci gubedo kacel ki jo ma oye Kricito pi mwaka kulu kun gipwonyo lwak jo mapol. Ki i Antiokia aye kikwongo lwongo jo ma oye Kricito ni lukricitayo.

27Ikare meno lunebi mogo gua ki i Jerucalem gucito i Antiokia. 28Ngat acel ki ikin gi ma nyinge Agabo ocung ci otito lok ma Cwiny Maleng onyute lok ma bitime i anyim, ni wang mo kec bipoto i lobo ducu. Man otime ikare pa Kalaudio ma laloc madit. 29Pieno lupwonye gumoko ni ngat acel acel omii kony kit ma en twero bot utmego ma gibedo i Judaya. 30Ci gutimo kitmeno, ka gucwalo bot ludongo kun Barnaba ki Caulo aye gitero.