Tic Pa Lukwena 10

Petero gin ki Kornelio

1Yam onongo tye laco mo i Cecaria ma nyinge Kornelio, ladit me dul acikari ma kilwongo ni me Itali. 2Laco man onongo woro Lubanga, en ki jo ma i ode ducu. En yam miyo jami mapol me konyo dano bot Lujudaya, kun lego Lubanga jwijwi. 3I kine me cawa abongwen me dyeceng en oneno lamalaika pa Lubanga kun obino odonyo bote, ci olwongo nyinge iwang lek ni, “Kornelio!” 4Kornelio ociko wange ikom lamalaika ki lworo madit, ci owaco ni, “Gin ango ba, ladit?” Ci lamalaika owaco bote ni, “Legani ki moti me kony oito malo obedo gin me po ikomi inyim Lubanga. 5Kombedi dong icwal dano i Jopa, wek gucit guom Cimon ma kilwongo Petero. 6En ogony i ot pa Cimon lanyong pyen, ma ode cok ki dog nam.” 7Ka lamalaika ma oloko kwede ni otyeko wot, ci Kornelio olwongo lutice aryo ki acikari acel ma woro Lubanga ki ikin jo ma gitiyo bote. 8Ka otyeko tito botgi lok ducu, ci ocwalogi i Jopa.

9Orwone ka gitye kawot madong gicok ki Jopa, ci Petero oito iwi ot malo kalega ikine me cawa abicel. 10Kec ocako neke, kun mito ni ecam gin mo, ento onongo pud kitye ka yubu cam ayuba; ci Paulo oneno gin anyuta. 11En oneno ka polo oyabe, ki jami mo olor piny, macalo cuka madit, kun bino piny matye ki twoke angwen. 12Kun onongo tye iye kit kwayi lee ducu, wa kwayi anyai ducu ki winyo me polo. 13Ci dwon obino bote ma waco ni, “Petero, a ineki wek icam.” 14Ento Petero ogamo ni, “Pe, Rwot, peya acamo jami ata me kwer.” 15Ci dwon dok obino bote tyen me aryone ni, “Gin ma Lubanga olonyo in pe ilwong ni obedo me kwer.” 16Man otime tyen adek, ci jami meno kidwoko woko ipolo.

17I cawa meno ka onongo Petero pud tye kalwodo ki i cwinye kun tamo pi telok me gin anyuta man, ci jo ma Kornelio ocwalogi gubedo kapenyo pi ot pa Cimon, kun gucung i dog ot. 18Ci gulwongo lwongo kun gipenyo ka nyo Cimon ma kilwongo Petero ogony kenyo. 19Ikare ma Petero pud tye kalwodo pi gin anyuta man, ci Cwiny Maleng owace ni, “Nen, jo adek gitye kayenyo in. 20Aa, ilor piny iwot kwedgi kun pe ibed ki gung cwiny, pien an aye acwalogi.” 21Ci Petero olor piny bot jo meno kun waco ni, “An aye ngat ma wun wuyenyoni. Wun wubino kany pingo?” 22Ci gugamo ni, “Kornelio ma ladit me acikari en dano ma cwinye atir, dok lworo Lubanga. Jo Lujudaya ducu giloko ki nyinge maber. En oneno lamalaika maleng ma ocike ni ocwal dano boti wek icit wa i ode, wek en owiny gin ma in ibiwaco.” 23Ci Petero olwongogi oterogi i ot, gubedo welone.

Orwone en oa ci ocito kwedgi, ki utmego mogo ma gibedo i Jopa guceto kacel kwede. 24Ka orwone mukene gudonyo i Cecaria. Kornelio obedo kakurugi ma olwongo lutugi ki lureme ma gin cokcok kwede ci gucoke bote. 25Ka Petero oo i dog ot, ci Kornelio oromo kwede, opoto oryebe piny katyene kun wore. 26Ento Petero oile malo, kun waco ni, “Aa malo icung; an bene adano adana.” 27Ka oloko kwede ci odonyo i ot, onongo lwak dano gucoke iye. 28Petero owaco botgi ni, “Wun wungeyo ni bedo me kwer bot Lujudaya me ribe kwedwu, kadi wa limo larok mo. Ento Lubanga otyeko nyutu bota ni pe alwong dano mo ni dano atata nyo ni me kwer. 29Ma omiyo ka kilwonga ci abino labongo pyem mo. An dong apenyo ni, wulwonga pingo?”

30Ci Kornelio ogamo ni, “Tin nino me angwene ikin cawa man, ma onongo atye kalega i oda ikom cawa abongwen, ci nen, laco mo ocung inyima ma oruku bongo maryeny, 31kun waco ni, ‘Kornelio, Legani ki moti me kony oito malo obedo gin me po ikomi inyim Lubanga. 32Ma omiyo in icwal dano i Jopa gupeny pi Cimon ma kilwongo Petero; en tye ogony i ot pa Cimon lanyong pyen i dog nam.’ 33Kitmeno acwalo dano boti cut, ci in bene itimo ber ibino. Kombedi wan ducu watye kany inyim Lubanga pi winyo lok ma Rwot ociki kwede ducu.”

Lok ma Petero otito i ot pa Kornelio

341

Ci Petero ocako lok kun waco ni, “Adada an dong aniang atir ni Lubanga pe poko kin dano. 35Ento en jolo dano ma i rok ducu ma gilworo en ki ma gitiyo gin matye atir. 36Wun wungeyo lok ma Lubanga ocwalo bot Jo Icrael, kun tito lok me Kwena Maber me kuc ma Yecu Kricito okelo; en aye Rwot pa dano ducu. 37Lok man yam kitucu oromo lobo Judaya ducu kun ocake ki i Galilaya inge kare ma Jon otito lok ikom batija. 38Wungeyo kit ma Lubanga owiro kwede Yecu Lanajaret ki Cwiny Maleng ki teko; dok kit macalo en yam wire kwede kun tiyo gin maber dok cango jo ducu ma Catan yelogi; pien onongo Lubanga tye kwede. 39Dok wan lucadene ikom gin ma en otiyo ducu i lobo Judaya ki i Jerucalem. Yam guneke kun kingabe ikom yat. 40Ento Lubanga ocere woko inino me adeke, ci onyute bot dano; 41pe bot dano ducu, ento bot wan jo mayam Lubanga oyero pi bedo lucaden. Wan wacamo dok wamato kwede kacel ikare madong ocer woko ki ikin jo ma oto. 42Dok ocikowa ni watit lok ki dano kun wamiyo caden ni, man aye ngat mayam Lubanga oyero me bedo langolkop pa jo makwo ki pa jo ma oto. 43Lunebi ducu gubedo caden ikome ni, dano ducu ma ye en kibiweko balgi woko pi nyinge.”

Lurok gulimo Cwiny Maleng

44Ikare ma Petero pud tye kaloko lok meno, Cwiny Maleng opye ikom jo ducu ma owinyo loke. 45Lujudaya ma guye Yecu ma onongo gubino ki Petero guuru mada pien mot me Cwiny Maleng dong kionyo wa ikom Lurok. 46Guwinyo ka gin gidumu leb mapatpat kun gipako Lubanga. Ci Petero openyo ni, 47“Ngat mo tye matwero gengo batija pa jo man ki pii, ma kun dong gulimo Cwiny Maleng macalo wan?” 48Ci ociko ni kibatijagi inying Yecu Kricito. Lacen gin gulege ni obed kwedgi pi kare mo.