Tic Pa Lukwena 9

Caulo oloke oye Yecu

(Tic 22:6-16; 26:12-18)

1Ikare meno Caulo onongo pud mede ameda ki unu lupwonye pa Rwot kun mito nekogi. En ocito bot ajwaka madit pa Lubanga, 2ka olege waraga me cito i kacoke ducu matye i Damaciko, wek ka enongo dano ma lubu Yo pa Rwot ma gitye kunu, co wa ki mon, ci etwegi, ekelgi i Jerucalem. 3Ikare ma en pud tye kawot, madong onyiko cok ki Damaciko, ci dero oa ki ipolo oryeny ocaro kome. 4Ka opoto piny ci owinyo dwon ma waco bote ni, “Caulo, Caulo, iyela pingo?” 5Caulo ogamo ni, “In anga, Rwot?” Ci owace ni, “An aye Yecu, ma itye ka yelone ni. 6Ento a idony i taun madit, ci kibititi gin ma omyero itii.” 7Jo mayam guwoto kwede gucung laling, ma kun giwinyo dwon ento pe guneno ngat mo. 8Caulo oa malo ki kama opoto iye piny ingomi, ento ka oyabo wange, ci pe oneno gin mo. Ci kipeye ki cinge kikele i Damaciko. 9Paulo obedo nino adek ma pe neno piny pe camo dok pe mato bene.

10Onongo tye lapwonye mo i Damaciko ma nyinge Anania. Rwot owace iwang lek ni, “Anania.” Ci en ogamo ni, “An a en, Rwot.” 11Ci Rwot owaco bot Anania ni, “A ilub yoo ma kilwongo ni Atir, ci ipeny i ot pa Juda laco mo ma nyinge Caulo me Taruco; en kombedi tye kalega. 12En oneno dano mo ma nyinge Anania i gin anyuta ka donyo bote kun keto cinge iwiye wek wange oyabe.” 13Ento Anania odok iye ni, “Rwot, yam awinyo lok ikom dano man ki bot jo mapol, kit ma otimo kwede joni marac i Jerucalem. 14En obino kany bene ki twero pa ajwaki madito me mako jo ducu ma gilwongo nyingi.” 15Ento Rwot owace ni, “Citi, pien en aye gin tica madong ayero pitero nyinga inyim Lurok ki luker ki jo Icrael. 16An ki koma abinyute can madwong ma en omyero ocir pi nyinga.” 17Ci Anania oa ocito odonyo i ot. Oketo cinge iwiye kun waco ni, “Omera Caulo, Rwot Yecu ma onyute boti i wanga yoo ma i tye kabinoni ocwala boti wek wangi oyabe, wek ipong bene ki Cwiny Maleng.” 18Ci gin mo macal ki pok rac opoto ki i wange cut, ci ocako neno piny. Ka oa malo ci kibatija en, 19ka lacen ocamo cam ci olimo teko.

Caulo otito lok ikom Yecu i Damaciko

Caulo obedo kunu pi kare manok ki lupwonye ma i Damaciko. 20Ci ocako tucu lok ikom Yecu i kacoke cut kun waco ni, “Yecu en Wod pa Lubanga.” 21Ci jo ducu ma guwinyo loke guuru, kun giwaco ni, “Man pe en aye laco mayam onongo tye ka neko jo ma gilwongo ki nying Yecu i Jerucalemi? Dok en bene obino kany pi lok meno, pi mako dano wek etergi bot ajwaki madito.” 22Ento teko pa Caulo omede ameda, omiyo lewic omako Lujudaya ma gibedo i Damaciko, pien en onyutu atir ni Yecu en aye Kricito ma Lubanga oyero.

Caulo obwot ki i cing Lujudaya

231

Ka nino okato mapol, ci Lujudaya gucoke, gupiro lok me neke. 24Ento Caulo owinyo pi lok ma kiyubu ni. Onongo gin kiye i dogcel me Damaciko dyeceng ki dyewor wek kineke woko. 25Ento lupwonyene gutinge ki aduku ki i dyewor, ci gucwale piny ki i apiding ma ikom cel.

Caulo ocito Jerucalem

26Ka Caulo obino oo i Jerucalem ci otemo ribe ki lupwonye; ento gin ducu gulwore, pien onongo peya guye ni en lapwonye pa Yecu. 27Ento Barnaba otere, ci okele bot lukwena. Ci otito botgi kit ma Caulo oneno kwede Rwot i wangayo, kun oloko kwede, ki dok bene obedo i Damaciko katito lok ki tekcwiny labongo lworo inying Yecu. 28Ci en obedo kawire kacel kwedgi i Jerucalem, kun bene tito lok ki tek cwiny inying Yecu. 29En oloko bene ki Lujudaya ma giloko leb Grik, kun pyem kwedgi; ento gin guyenyo yo me neke. 30Ka luye gungeyo loke, ci gilaro kwede i Cecaria, ci gucwale i Taruco.

31Lwak ma oye Yecu ma i Judaya ducu ki Galilaya ki Camaria dong gubedo ki kuc, ci wel luye omede, kun giworo Rwot i kwogi me nino ducu. Cwiny Maleng obedo ka jingo cwinygi, dok welgi bene omede ameda.

Petero i Lida ki i Jopa

32Ikare meno Petero obedo kawire ikin gi ducu, ci ocito bot jo pa Lubanga ma gin bedo i Lida. 33Kunu en onongo iye dano ma nyinge Ainea, mayam orii iwi kitanda mwaka aboro ma twoyo two akweya. 34Ci Petero owaco bote ni, “Ainea, Yecu Kricito cango twoni woko; a malo ipet kabutuni.” Ci otugi a malo cut. 35Jo ducu ma gibedo i Lida ki Caron gunene, ci guloke bot Rwot.

36I Jopa yam onongo tye iye lapwonye mo ma dako ma nyinge Tabica, ma i leb Grik kilwongo ni Dorka. (Dorka teloke ni Lajwa.) En yam tiyo tic mabeco mapol mada, dok konyo lucan. 37Ikare meno two omake ci oto woko. Ka gutyeko lwoko kome ci gupyelo i kicika malo. 38Macalo Lida cok ki Jopa, ka lupwonye guwinyo ni Petero tye kunu, ci gucwalo dano aryo bote, gulege ni, “Tim ber, ibin oyot botwa, pe igale.” 39Ci Petero oa, owoto kwedgi; ka oo kunu, ci gutere i kicika malo. Mon to ducu gucung kun gikok ka ngete, ma ginyutu koti ki bongi mukene ma Dorka okwoyo ma onongo pud tye botgi. 40Ento Petero ocwalogi ducu woko, ka orumu conge piny ocako lega. Lacen oloke bot lato kun waco ni “Tabica, a malo.” Ci Tabica oyabo wange; ka oneno Petero ci oa obedo abeda. 41Ci Petero ocwalo cinge omake, ka okonye me a malo. Ka olwongo jo pa Lubanga ki mon to, ci omiye botgi makwo. 42Loke oywek i Jopa ducu, ma omiyo jo mapol guye Rwot. 43Petero obedo i Jopa pi nino mapol i gang pa dano mo ma nyinge Cimon, lanyong pyen.