Tic Pa Lukwena 8

1Caulo bene opwoyo tone apwoya.

Caulo ounu lwak ma oye Yecu

Inino meno kikome aye ayelayela madwong opoto kwede ikom jo ma oye Yecu ma i Jerucalem; ci gin ducu guket woko ata i lobo ducu me Judaya ki Camaria, kono lukwena keken aye gudong. 2Jo ma giworo Lubanga aye guyiko Citefano, kun gukoke matek tutwal. 31 Ento Caulo onongo tye katimo aranyi ikom lwak jo ma oye Kricito; kun donyo i ot ki ot ci ywayo co wa ki mon ka tweyogi ibuc.

Pilipo otucu Kwena Maber i Camaria

4Jo ducu ma guket ata guwoto kun gin tito lok me Kwena Maber. 5Pilipo ocito i taun madit mo me Camaria ci otucu botgi pi Kricito ma Lubanga oyero. 6Ci lwak ma gucoke gujolo lok ma Pilipo otito botgi ki cwinygi acel ikare ma guwinyo kun gineno bene lanyut ma en otiyo. 7Pien jo mapol ma cen maracu omakogi, cen oa woko ki ikomgi kun gidange ki koko matek; ki lwak lutwo akweya ki lungolo bene gucang woko. 8Kitmeno yomcwiny obedo dwong i taun madit meno.

9Ento yam onongo tye dano mo i taun madit meno ma nyinge Cimon ma en lajok. En oweko jo me Camaria ure mada kun en waco kekene ni en e dano madit. 10Gin ducu guketo cwinygi i lok ma en waco, lutino wa ludito bene, kun giwaco ni, “Man aye dano matye ki tek pa Lubanga ma kilwongo ni Maditi” 11Gubedo kaketo cwinygi kawinyo loke, pien obedo kwedgi pi kare malac kun miyo giuru tim jokjokeni. 12Ento ka guye lok me Kwena Maber ma Pilipo otito ikom ker pa Lubanga ki ikom Yecu Kricito, ci kibatijagi, co wa ki mon. 13Kadi wa Cimon bene oye, ka kibatija en ci omede obedo kacel ki Pilipo kun neno lanyut ki tango madito ma en tiyo, ci ouru mada.

14Ka lukwena ma gitye i Jerucalem guwinyo ni Lucamaria guye lok pa Lubanga, ci gucwalo botgi Petero ki Jon. 15Gin bene ka gucito kunu, ci gulego pirgi wek gulim Cwiny Maleng. 16Pien onongo peya Cwiny Maleng obino ikom ngat mo ikin gi, ento yam kibatijagi inying Yecu keken. 17Ka guketo cinggi iwigi, ci gulimo Cwiny Maleng. 18Ikare ma Cimon oneno ni gulimo Cwiny Maleng malube ki keto cing pa lukwena iwigi, ci okelo lim botgi 19kun waco ni, “Wumiya tek man bene, wek an bene ka aketo cinga iwi dano mo wek olim Cwiny Maleng.” 20Ento Petero owace ni, “Cente ni omyero orweny woko matwal, kacel ki in, pien itamo pi wilo mot pa Lubanga ki lim! 21In pe itye ki gin mo nyo dul mo i lok man, pien cwinyi pe opore inyim Lubanga. 22Dong ingut ikom bali man, dok ileg Rwot, wek ka twere lok matye i cwinyini kitimi iye kica. 23Pien aneno cwinyi kec calo keda, bal otweyi woko idoko lamabuce.” 24Ci Cimon odok iye ni, “Wuleg Rwot pira wek gin ma wuwaconi pe opot ikoma.”

25Ka gutyeko tito lok me caden ki tucu lok pa Rwot, ci gudok i Jerucalem, kun gitito lok me Kwena Maber i paco mapol ma i Camaria.

Pilipo ki latic madit me Etiopia

26Ento lamalaika pa Rwot owaco ki Pilipo ni, “A iwot idok tung kupiny i yoo ma aa ki Jerucalem dok piny i Gaja.” Yoo ma wok ki i tim. 27Ci Pilipo oa ocito. Ci nen, laco mo ma Laetiopia, ma kikolo, oa ka woro Lubanga i Jerucalem. En onongo latic madit ma obedo ladit ma lakan jami ducu pa Candace, rwot ma dako me lobo Etiopia. 28Ikare ma dok i lobo tugi, en onongo obedo i gadigadine kun kwano buk pa lanebi Icaya. 29Cwiny Maleng owaco bot Pilipo ni cit i, “Nyik cok, irwate ki gadigadi man.” 30Ka Pilipo oringo bote, ci owinyo en ka kwano buk pa lanebi Icaya, ci openye ni, “In iniang lok ma ikwano ni?” 31Ci en ogamo ni, “Aniang ningning kono, ka ngat mo pe okonya?” Ci olwongo Pilipo ni obed kwede kacel. 322 Dul ma en obedo ka kwanone onongo tye kit man:

“Calo romo ma kitero ka nekone,

nyo latin romo ma oling inyim lanyar yere,

kitmeno en pe ongamo doge kalok.

33Kilanye dok bene pe kingole kop ma atir.

Anga matwero tito kit yalwak mere?

Pien kwone dong kikwanyo woko ki i lobo.”

34Ci laco ma kikolo owaco bot Pilipo ni, “Alegi, tita, lanebi oloko lok man ikom anga, ikome kene nyo ikom ngat mukene?” 35Ci Pilipo ocako lok. Ocako ki lok man mayam kicoyo kun tito lok me Kwena Maber ikom Yecu. 36Ka gumede ki wot kacel i yoo, ci guo kama pii tye iye. Ci laco man ma kikoloni owaco ni, “Nen pii dong ene! Gin ango ma genga limo batija?” 37Ci Pilipo owace ni, “Ka iye ki cwinyi ducu ci itwero.” En odok iye ni, “An aye Yecu Kricito, ni en Wod pa Lubanga.”3 38Ci ociko ni gadigadi omyero ocung; ci gin ducu gulor i pii, Pilipo ki laco man ma kikoloni, ci Pilipo obatija en. 39Ka gukati woko ki i pii, ci Cwiny pa Rwot otingo Pilipo, otero woko. Laco man ma kikoloni pe dok onene, ci owoto wote ki yomcwiny. 40Ento Pilipo otuc wa i Ajota kun wire katucu lok me Kwena Maber i taun ducu nio ka obino wa i Cecaria.