Tic Pa Lukwena 7

Pido Pa Citefano inyim Luotkot

1Ka ajwaka madit openyo Citefano ni, “Lok man tye kitmeno?” 21 Ci Citefano ogamo ni, “Omegina ki wegina, wuwinya. Lubanga me deyo yam onyute bot kwarowa Abraim ma onongo pud tye wa i Mecopotamia, ma peya obedo i Karan. 3Ci owace ni, ‘Aa woko ki i lobowu ki ikin wat ma meri, icit i lobo ma abinyuti.’ 42 Ka dong oa woko ki i lobo pa jo Kaldaya, ci obedo i Karan, ka lacen wone oto, ci Lubanga okwanyo en ki kunu, ci okele wa i lobo man ma koni wubedo iye ni. 53 Ento pe omiye oleyo dul lobo mo kany, kadi wa mo marom ki tyen dano, ento ocike me miyo bote me bedo lobone ki pa likwaye ma gibilube, kadi bed onongo latine mo pud peke. 64 Ci Lubanga owaco bote ni, ‘Likwayi gibibedo i lobo pa jo mukene ma kibilokogi gibedo opii, kibitimogi marac pi mwaka miya angwen.’ 75 Ka Lubanga owaco ni, ‘Abimiyo pwod ikom jo ma biunugi, ci lacen gibia ki kunu, ci gibiwora i kabedo man.’ 86 Ci omiyo ki Abraim gicike me lire. Kitmeno Abraim onywalo Icaka ci oliro en inino me aboro me dite; ki Icaka onywalo Yakobo, ki Yakobo onywalo kwariwa apar wiye aryo. 97

Nyeko omako kwariwa ikom Yucepu, ci gucate woko i Ejipt, ento Lubanga onongo tye kwede. 108 Ci olare ki i can ducu, ka omiye gum ki ryeko inyim Parao, rwot me Ejipt, ma oketo en me bedo laloc maloyo lobo Ejipt ki jami ma i ot pa rwot ducu. 119 Ikare ma kec opoto i lobo Ejipt ducu ki i Kanaan, okelo can madwong ma omiyo kit me nongo cam oloyo kwariwa woko. 12Ento ka Yakobo owinyo ni ngano tye i Ejipt, ci ocwalo kwariwa kunu tyen ma okwongo. 1310 Ka dong gudok tyen me aryo, ci Yucepu onyute kekene bot omegine ci Parao ongeyo kaka pa Yucepu. 1411 Ka Yucepu ocwalo dano kalwongo wone Yakobo, ki wadigi ducu, dano weng pyere abiro wiye abic. 15Yakobo ocito i Ejipt, ci oto woko, en kikome ki kwariwa ducu.12 1613 Ci kitingo komgi kidwoko cen i Cekem ci kiyikogi i lyel mayam Abraim owilo ki lim ryal ki bot awobe pa Kamor i Cekem. 1714

Ento ka kare ma kiciko onyiko cok, mayam Lubanga omiyo bot Abraim, ci jowa gumede ki nya i Ejipt, 18nio ka kiketo rwot mo mukene ma pe ngeyo Yucepu. 1915 En ongolo ryeko ikom kakawa, ci odiyo kwariwa me bolo lutinogi wek guto woko. 2016 Ikare meno en aye kinywalo iye Moses. En onongo mwonya mada, ci kibedo ka pite i ot pa wone pi dwe adek. 2117 Ikare ma kikane woko i dog kulu, ci nya pa Parao ononge ci ojule macalo wode kikome. 22Ci Moses kipwonyo ki ryeko ducu pa Luejipt; ci en obedo laco adada i loke ki i tice. 2318

Ka dong mwaka me dite oromo pyere angwen, ci tam obino i cwinye me limo wadine, ma gin Jo Icrael. 24Ka Moses oneno ngat acel ikin gi kitimo marac, ci okonyo dano ma kibwoyo ni, ka oculu kwor ogoyo Laejipt. 25En yam otamo ni gwok nyo omegine gingeyo ni Lubanga oyubu ni kibilarogi pi tice, ento pe guniang. 26Dok orwone otuc botgi ma onongo Luicrael aryo gi da ikin gi; onongo en mito ribo kin gi, ci owaco botgi ni, ‘Wun omego, pingo wutime marac kekenwu?’ 27Ento latim lawote maraci ocwale cen kun waco ni, ‘Anga ma oketo in me bedo langolkop ki lalowa? 28In i mito neka kit ma laworo ineko Laejipt ni?’ 2919 Ci Moses oringo woko pi lok meno, ka ocito odoko labedo i lobo Midian, ci onywalo iye lutino awobe aryo. 3020

Ka mwaka okato pyere angwen, ci lamalaika onen bote i tim ma inget got Cinai i leb mac ma lyel i caka. 31Ka Moses oneno, ci ouru kite. Ka onyiko cok kaneno, ci dwon obino ni, 32‘An Lubanga pa kwariwu, Lubanga pa Abraim, ki pa Icaka, ki pa Yakobo.’ Ci kom Moses omyel, lworo ogenge nenone woko. 33Ka Rwot owaco bote ni, ‘Luny war woko ki i tyeni, pien kabedo ma in icung iyeni ngom maleng. 34Adada an dong aneno atwom pa jona ma gitye i Ejipt, awinyo wa cur meggi, an dong alor piny ka larogi. Bin dong acwali i Ejipt.’ 3521

En Moses aceli mayam gukwero wokoni kun gipenye ni, ‘Anga muketo in me bedo lalowa ki langolkopwa?’ En aye Lubanga ocwale macalo laloc ki lalar ki i cing lamalaika ma onen bote i cakani. 3622 Ci okwanyogi woko ki i Ejipt kun tiyo tango ki lanyut mapol i Ejipt ki i Nam Makwar ki i tim pi mwaka pyere angwen. 3723 Moses man aye ceng otito bot Jo Icrael ni, ‘Lubanga bicwalo lanebi pirwu ma bia ki ikin utmegiwu macalo ocwalo an ni.’ 3824 Man aye ngat ma onongo yam tye ikin lwak ma i tim kacel ki lamalaika ma oloko kwede i got Cinai, ma oloko bene ki kwariwa; kunu en olimo iye lok ma pwonyo wa me nongo kwo ma labednaka me akela botwa. 39Kwariwa yam gukwero winyo loke ento gucwale woko cen, dok cwinygi ogomo me dok cen i Ejipt. 4025 Ci guwaco bot Aron ni, ‘Yub ki wan lubanga ma bitelo wiwa, pien Moses man ma okwanyowa woko ki i lobo Ejipt, pe dong wangeyo kama odok iye,’ 4126 Ci guyubu cal wod twon ikare meno, gucako tyero gitum bot cal lubanganu, ma cwinygi obedo yom ikom tic me cinggi. 4227 Ci Lubanga oloke omiyo ki gin kare me woro lakalatwe, kit mayam kicoyo i buk pa lunebi ni,

‘Wun Jo Icrael,

yam onongo pe wuneko lee me gitum ki an aye i tim

pi mwaka pyere angwen

43Wun yam Wutingo kema pa jok Molok aye,

ki cal lakalatwe pa lubangawu ma nyinge Repan,

ma gin cal jogiwu ma wuyubugi me awora.

Pimeno an bene abicwalowu woko cen wa inge Babilon.’ 4428

Kwariwa yam gitye ki kema me caden ma nyutu pi tye pa Lubanga i tim, ma Lubanga yam oloko ki Moses ni oyubi kun lubu cal ma en oneno. 4529 Gin bene gukelo kema meno ikare ma gubino ki Yocwa me leyo lobo pa rok mapol ma Lubanga oryemogi woko ki inyimgi. Dok bene kema meno obedo botgi nio kwede wa ikare pa Daudi, 4630 ma olimo gum ma oa ki bot Lubanga dok openyo ni kiwek eyub kabedo pi Lubanga pa Yakobo. 4731 Ento Solomon aye ogero ot pire.

48Kadi bed kitmeno, en Ngat Mamalo Twal pe bedo i ot ma kitiyo ki cing; macalo yam lanebi owaco ni, 4932

‘Polo aye komkera, man Rwot aye ma owaco,

ki lobo obedo kom me teno tyena.

Kit ot ango ma ibigero pira?

Ka yweyona kono onongo bedo kwene?

50Pe cinga aye otiyo lwak jami ni ducu?’ 5133

Wun jo ma ludingo, dok bene pe wungeyo Lubanga i cwinywu, ma itwu bene oding, wun wulwenyo ki Cwiny Maleng jwijwi; macalo yam kwariwu gutiyo, wun bene wutiyo kitmeno. 52Lanebi mene mayam kwariwu pe guunu? Dok guneko jo mayam gutucu con pi bino pa Ngat ma Kite Atir ni ma wun wuketo roro ikome ci wuneko woko. 53Wun jo ma kimiyowu Cik pa Lubanga ma lumalaika yam gukelo, ci pe wulubu.”

Kicelo Citefano ki got

54Ka guwinyo lok meno, ci gutuge ma gukayo lakgi woko liking. 55Ento Citefano ma onongo opong ki Cwiny Maleng, ociko wange ipolo ci oneno deyo pa Lubanga, kun Yecu ocung inget Lubanga tung acuc. 56Ci en owaco ni, “Nen, aneno polo oyabe ki Wod pa dano ocung inget Lubanga tung acuc.” 57Ci gin gudange, kun giwoo ki dwon gi matek ma gudingo itgi woko, ci gucore ikome kacel. 58Ka gubole woko inge gang, ci gucele ki got, ka lucaden gupyelo ginarukagi katyen awobi mo ma nyinge Caulo. 59Ikare ma kitye kacelo Citefano ki got, en olego ni, “Rwot Yecu, gam cwinya,” 60Ka orumu conge piny, ci odange ki dwone matek ni, “Rwot, pe iket bal man ikomgi.” Ka otyeko lok kit man, ci oto.