Tic Pa Lukwena 6

Kiyero lukony abiro

1Ikare meno ka wel lupwonye obedo ka mede, ci Lujudaya ma giloko leb Grik gubedo ki nguru ikom Lujudaya ma giloko leb Ibru, ni nino ducu ka kipoko lim pe giparo pi mon to gi. 2Ka lukwena apar wiye aryo gulwongo lupwonye ducu kacel ci guwaco botgi ni, “Pe omyero wabwot tito lok pa Lubanga pi tic me poko cam. 3Pieno, utmego, wuyer ikinwu jo ma kiloko nyingi maber, en jo ma gupong ki Cwiny Maleng ki ryeko, ma myero waketgi i dog tic man. 4Ento wan wabimine kalega ki tito lok.” 5Lokgi oyomo cwiny lwak ducu, ci guyero Citefano, en dano ma opong ki niye ki Cwiny Maleng, kacel ki Pilipo, Porokulo, Nikanori, Timon, Parmena, ki Nikolao ma en aye dano me Antiokia mayam oloke i dini pa Lujudaya. 6Ci kiketogi inyim lukwena, ka dong lukwena gulego ci guketo cinggi iwigi.

7Ci lok pa Lubanga omede ki nya; ki wel lupwonye bene onya omede madwong tutwal i Jerucalem, ki lwak ajwaki pa Lubanga mapol bene gujolo niye.

Kimako Citefano

8Ka Citefano opong ki kica ki teko pa Lubanga, obedo katiyo tango ki lanyut ikin lwak. 9Ci jo mogo ma gua ki i kacoke ma kilwongo ni kacoke pa jo ma kigonyogi ki i opii, kacel ki jo mogo me Cirene ki me Alekijanderia, ki jo ma gua Cilicia ki Acia, gubedo ka pyem ki Citefano. 10Ento ryekone oloyogi, pien loko ki tek pa Cwiny Maleng. 11Ci gupiyo dano i mung kun giwaco ni, “Wawinyo en kaloko kun yeto Moses ki Lubanga.” 12Ci gutugu lwak ki ludongo ki Lupwonycik, ka gubino gumake ci gutere inyim Luotkot. 13Ci gukelo lucaden me goba ma giwaco ni, “Laco man pe weko loko lok marac ma kemo kabedo man maleng ki Cik pa Moses. 14Wan wabedo kawinyo en ka loko ni Yecu man me Najaret bimuku ot man woko, ka dok biloko Cik ma Moses omiyowa me aluba.” 15Ci jo ducu ma gubedo i Otkot guciko wangi ikome, ci guneno wange calo wang lamalaika.