Tic Pa Lukwena 5

Anania ki dakone Capira

1Ento laco mo ma nyinge Anania ki dakone Capira gucato jamigi. 2Ci en okano dul lim mogo woko ma dakone bene ngeyo, ka okelo dul acel mukene, ci oketo ka tyen lukwena. 3Ento Petero owace ni, “Anania, pingo Catan opongo cwinyi, omiyo ibwolo Cwiny Maleng kun ikano but dul lim ma oa ingomi? 4Ma onongo pe icato ngomi, onongo pe obedo meri giri? Dok madong icato, pe onongo tye giri ite twero ni? Pingo itamo lok macalo meno i cwinyi? Pe ibwolo dano ento ibwolo Lubanga giri!” 5Ka Anania owinyo lok meno, ci en opoto piny oto woko cut, ci lworo madit omako jo ducu ma guwinyo pire. 6Ci awobe mogo gua ci guboyo kome, ka gutere woko ka yike.

7Lacen ka cawa okato kine ka adek, ci dakone Capira obino odonyo i kacoke, kun pe ngeyo gin ma otime ikom cware. 8Ci Petero owace ni, “Tita ka onongo wucato ngomwu i wel marom man.” Ci en ogamo ni, “Eyo,” wacato, “iwel ma rom meno.” 9Ento Petero owace ni, “Pingo wun aryo ducu wuribe ka bwolo Cwiny pa Rwot? Nen, tyen jo muyiko cwari ka tye i dogola, in bene gibiteri woko.” 10Ci dakonu opoto piny katyene, oto woko cut, ka awobe gubino gudonyo i ot, ci gunongo en oto, ci gutere woko, guyike ka nget cware. 11Lworo madit omako lwak jo ma oye Yecu ducu, ki jo ducu ma guwinyo loke.

Lanyut ki tango mapol

12Lwak lanyut ki tango mapol otime ikin dano ki i cing lukwena. Onongo luye gin ducu girwate kacel igure matye ite Baraja pa Solomon. 13Pe tye ngat mo ma pe igure gi ma oete me ribe kwedgi, ento kadi bed kumeno onongo dano guketo woro madit ikomgi. 14Ci lwak jo mapol ma guye gumede ikom jo ma gujolo Rwot, man gubedo co wa ki mon. 15Dong malube ki gin ma lukwena gubedo katiyone, dano onongo gikelo lutwo wa i yoo, ma gipyelogi iwi kitanda ki iwi kabutu, wek ka Petero kato ka ngetgi, ci tipune owok ikom jo mogo ikin gi. 16Lwak dano bene gua ki i taun murumu Jerucalem, ci gucoke kun gikelo lutwo ki jo ma cen maracu yelogi, ci gin ducu gulimo nicang.

Kiunu lukwena

17Ento ajwaka madit oa kacel ki jo ma gitye kwede, ma gin aye dul pa Lucadukayo, ma nyeko onongo makogi matek, 18ci gucako mako lukwena guketogi ibuc. 19Ento idyewor lamalaika pa Rwot oyabo dogola me ot buc, ci okelogi woko kun waco ni, 20“Wucit wucung i Ot pa Lubanga, wutit bot dano lok me kwo manyen man ducu.” 21Ka guwinyo lok man, ci gudonyo i Ot pa Lubanga kwarpiny ci gubedo ka pwonyo dano.

Ka ajwaka madit obino ki jo ma onongo gitye kwede, ci gucoko Luotkot kacel ki ludongo ducu pa jo Icrael, ka gucwalo kwena ka omogi ki ibuc. 22Ento ka ludito pa acikari gucito, pe gunongogi ibuc, ka gudwoko lok ni, 23“Wanongo ot buc giloro maber, kun lukur piny bene gucung i dogola, ento ka wayabo ci pe wanongo ngat mo iye.” 24Ka ladit pa acikari me Ot pa Lubanga ki ajwaka madit guwinyo lok meno, ci tamgi ocung woko, kun gipenye keken gi kit gin ango ma otime ikom lukwena. 25Ka ngat mo obino otitigi ni, “Jo ma wuketogi i ot buc ni, gitye gucung i Ot pa Lubanga ka pwonyo dano.” 26Ci ladit ki acikarine gucito gukelogi, ento pe ki tek mo, pien onongo gilworo ni lwak bicelogi ki got.

27Ka dong gukelogi, ci guketogi inyim Luotkot, ka ajwaka madit openyogi, 281 kun waco ni, “Wan wacikowu matek ni pe wupwony lok mo inying man ento koni wun wukeyo lok man wupong i Jerucalem woko pi pwonywuni, dok wumoko tamwu me kelo remo pa dano man ikomwa.” 29Ento Petero ki lukwena mukene gudok iye ni, “Myero wawiny Lubanga makato dano. 30Lubanga pa kwarowa ocero Yecu ma wun wuneko woko kun wungabe ikom yat. 31Lubanga otinge malo okete malo tung acuc i kabedo me deyo pi bedo Laker ki Lalar, wek jo Icrael gunong kare me ngut ci en owek balgi. 32Wan aye lucaden me lok meno, kacel ki Cwiny Maleng ma Lubanga omiyo bot jo ma giwinye.”

Lok pa Gamaliel

33Ka guwinyo lok man, ci gutuge ki akeca ma gimito nekogi. 34Ento Laparicayo mo ma i Otkot ma nyinge Gamaliel, Lapwonycik ma dano ducu giworo, oa malo ci ociko ni kong kicwalgi woko pi kare manok. 35Ka owaco bot jo mucoke ni, “Jo Icrael, ber wugwoke i gin ma wutimo ikom jo man. 36Pien yam con ikare ca Teyuda otuc ci omiine kene ni en e dano madit, ki jo mogo ma giromo ka miya angwen guribe kwede; ento kineke woko ci jo ma onongo gilube ducu guket woko ata. 37Dok ingeye, Juda ma Lagalilaya dok otuc ikare me kwano wel dano, ci otero jo mukene ma gilube; en bene oto, ci jo ma gilube bene guket woko ata. 38Eyo, ilok man madong tye kombedi atito botwu ni cwinywu oa woko ikom jo man, wuwek gubedi; pien kace yub man nyo tic man pa dano, ci bigik ata. 39Ento ka pa Lubanga, ci pe wubiloyogi, wun bene wubinen calo jo ma wulwenyo ikom Lubanga!”

40Ci gujolo tame, ka kilwongo lukwena gudwogo cen, ci gugoyogi kun kicikogi ni pe dok gulok inying Yecu, ka dong giwekogi gucito. 41Ci gua woko ki inyim Luotkot ma onongo cwinygi yom, pien Lubanga otamo ni gin gupore me nongo lewic pi nying Yecu. 42Dok nino ducu pe guweko pwonyo dano ki tito lok me Kwena Maber ni Yecu en aye Kricito ma Lubanga oyero i Ot pa Lubanga ki i paco pa dano.