Tic Pa Lukwena 4

Kitero Petero ki Jon inyim jo me Otkot

1Ka Petero ki Jon pud gitye kalok ki dano, ci ajwaki ki ladit maloyo acikari me Ot pa Lubanga ki Lucadukayo gubino botgi. 2Gin onongo igi pe yom, pien onongo Lukwena aryoni gipwonyo lwak kun gititoni Yecu ocer ki ikin jo ma oto, kitmeno bene jo ma oto gibicer. 3Ka gumakogi ci guketogi ibuc nio wa odiko, pien onongo piny dong oyutu woko. 4Ento lwak jo mapol ki ikin jo ma guwinyo lokgi guye, ci wel dano omede oo kakine alip abic.

5Ka piny oru, ci lulocgi ki ludongo ki Lupwonycik gucoke i Jerucalem, 6kacel ki Anac ma ajwaka madit, ki Kayapa ki Jon ki Alekijanda, ki lwak ducu ma gitye i dogola pa ajwaki madito. 7Ka kiketogi idyere, ci gupenyogi ni, “Wun wutiyo man pi kit tek ango, nyo pi nying anga?” 8Ka Petero opong ki cwiny Maleng, ci owaco bot ludongo ki lulo lwak ni: 9“Ka tin kipenyowa lok mudok ikom gin maber ma otime ikom laput, ki kit ma dano man ocang kwede, 10ci wek ongene botwu ducu ki bot lwak jo Icrael ducu ni, pi nying Yecu Kricito Lanajaret, ma wun wuguru ikom yatariya, ma Lubanga ocero woko ki ikin jo ma otoni aye laco man ocung inyimwu ma kome yot. 111 Yecu aye ngat mayam kicoyo i ginacoya ni: ‘Man aye got ma wun lugedo wukwero woko ento ma odoko got madit mapire tek.’ 12Pe tye lare i ngat mo mukene, pien pe tye nying mo mukene iwi lobo man ma kimiyo ki wan dano ma myero walare iye.”

13Ka dong ludito Otkot guneno tekcwiny pa Petero ki Jon, ma guniang bene ni gin jo mogo ata ma pe gupwonye, ci guuru; ka dong guniang ni gin yam bene gubedo kacel ki Yecu. 14Ento ka guneno laco ma kicangoni ocung ka ngetgi, ci lok mo marac ma myero guwac dong obedo peke. 15Ka guciko Petero ki Jon ni kong gukat woko ki i Otkot, ci guyubu lok keken gi, 16kun giwaco ni, “Wabitimo jo man ningning?” Dok guloko keken gi ni, “Pien dong gutyeko tiyo lanyut ma kome nen bot dano ducu ma gibedo i Jerucalem, wan bene pe watwero kwerone. 17Ento pi kit me juku lok man wek pe oket orom kin dano, ber wajukugi ni pe gumede ki tito bot ngat mo i nying Yecu.” 18Ci gulwongogi ka gucikogi ni pe gutit dok bene pe gupwony lok mo inying Yecu kadi matidi mo. 19Ento Petero ki Jon gugamo ni, “Wun aye wungol kace nen ber iwang Lubanga me winyowu makato winyo Lubanga. 20Pien wan pe watwero weko tito pi gin mayam waneno ki ma wawinyo.” 21Ka dong guburugi matek, ci guwekogi gucito; pien pe gunongo kit yo mo keken me keto can ikomgi pi lwak dano, pien gin ducu gubedo ka pako Lubanga pi gin ma otimeni. 22Dano ma lanyut me twer me cango dano otime ikomeni onongo dong mwaka me dite kato ka pyere angwen woko.

Jo ma guye Yecu gulego pi tekcwiny

23Ka kigonyo Petero ki Jon, ci gucito bot luremgi ka gutito botgi gin ma ajwaki madito pa Lubanga ki ludongo guwaco botgi. 242 Ka guwinyo, ci gulego ki dwon gi malo kacel bot Lubanga kun giwaco ni, “Ai Rwot Lubanga, in mayam icweyo polo ki lobo ki gigu ducu matye i igi, 253 con iloko i dog kwarowa Daudi ma latici i tek pa Cwiny Maleng ma owaco ni,

‘Pingo Lurok gudoko ger,

dok pingo rok mapol gipiro lok ma konye peke?

26Luker me lobo guyube pi lweny,

ki luloc bene gucoke gugure kacel ikom Rwot ki ikom ngat ma en oyero ka dong owiro.’ 274

Adada Kerode ki Pontio Pilato, kacel ki Lurok ki jo Icrael ducu gucoke kun gugure kacel i gang man ikom latici maleng twal Yecu, en ma in iwiro ki moo. 28Gin gugure pi tiyo gin ducu mayam iyubu pi tweroni ki miti ni myero otime. 29Eyo, Rwot, dong inen bura megi, ci imii wan lutici watit loki ki tekcwiny labongo lworo mo. 30Dong iryeyo cingi me cango dano, wek lanyut ki tango mapol otime inying latici maleng twal en Yecu.” 31Ka gutyeko lega, ci kabedo ma gugure iyeni oyenge, gin ducu gupong ki Cwiny Maleng, ci gutito lok pa Lubanga ki tekcwiny labongo lworo.

Luye gunywako jami ducu kacel

325

Lwak jo ma oye ducu gubedo ki cwiny acel ki tam acel, kun pe tye ngat mo ma waco ni lim ma etye kwede ni mere kene, ento gunywako jamigi ducu kacel. 33Lukwena gutito cadengi ma moko lok ikom cer pa Yecu ki tek, ci Lubanga onyo gum madit opoto ikomgi ducu. 34Pe tye ngat mo ikin gi ma gin mo orem ki bote, pien jo ma gitye ki potigi nyo odigi gucatogi woko, ka gukelo lim ma oa iye, 35guketo ka tyen lukwena kun miyo botgi, ka gupoko kit ma mite bot ngat acel acel. 36Kitmeno Yucepu ma Lalevi ma kinywalo i Caiprac, ma nyinge me aryone lukwena gucako ni Barnaba (ma te loke ni ngat ma jingo cwiny dano), 37ocato potone ma en tye kwede, ci okelo lime oketo ka tyen lukwena kun miyo botgi.