Tic Pa Lukwena 3

Petero ocango laput

1Inino mo acel Petero ki Jon gucito i Ot pa Lubanga i cawa me lega, ikom cawa abongwen. 2Onongo tye dano mo ma laput nia ikare ma kinywale. Ma kitingo nino ducu kiketo idogola Ot pa Lubanga ma kilwongo ni Dogola ma Mwonya, pi lego kony ki bot jo ma gidonyo i Ot pa Lubanga. 3Ka en oneno Petero ki Jon kun gimito donyo i Ot pa Lubanga, ci en olegogi ni gumiye kony. 4Ka Petero kacel ki Jon guciko wangi ikome, ci Petero owaco ni, “Nen komwa.” 5Ci oketo cwinye ka nenogi, kun geno ni gibimiye gin mo. 6Ento Petero owace ni, “Pe atye ki lim mo, ento amii gin ma atye kwede; inying Yecu Kricito Lanajaret, a malo i woti.” 7Ka omako bade lacuc ci otinge kwede malo; ci tyene ki odilo tyene ocako ojing omoko woko matek cut. 8Ci laputi oa, otire ocung, owoto odonyo kwedgi i Ot pa Lubanga, ma woto kun pye, dok pako Lubanga. 9Lwak jo mapol ducu gunene ka woto kun pako kwede Lubanga, 10ci guniang ni en dano mayam lego kony i Dogola ma Mwonyani. Guuru matek ma doggi otwo woko pi gin ma otime ikomeni.

Lok ma Petero otito

11Ka pud omoko ikom Petero ki Jon, ci lwak dano ducu guringo gucoke botgi ite baraja ma kilwongo ni Baraja pa Solomon. 12Ka Petero onenogi, ci owaco bot lwak ni, “Wun jo Icrael wuuru lok man pingo? Pingo wuciko wangwu ikomwa calo wan aye ma watiyo lok man ki tekwa, nyo ni pien wan wa bedo jo ma lworo Lubanga omiyo dano ni owoto? 131 Lubanga pa Abraim, ki pa Icaka ki pa Yakobo, Lubanga pa kwarowa, yam oketo deyo ikom latice Yecu ma wun wumiyo i cing Pilato kun wukwere woko ikare ma Pilato oyube me gonyo en. 142 Ento wun wukwero en Ngat Maleng ma Kite Atir, kun wulego ni Pilato ogony omii botwu laneko. 15Ci wuneko ngat mamiyo kwo. Ento Lubanga ocere woko ki ikin jo ma oto, wan lucaden ikom lok man. 16Pi tek matye inyinge, ki pi ye nyinge, en aye omiyo kom laco man ojing odoko tek macalo wuneno dok wungeyo; pi ye Yecu omiyo laco man olimo yotkom inyimwu ducu.

17Eyo, utmega, angeyo ni yam wutimo man ma onongo wukwiya, macalo luditowu bene. 18Ento kit macalo yam Lubanga oloko i dog lunebine ducu ni Kricito mere myero onen can, ci dong omiyo loke ocobe kakare kumeno. 19Piman dong wungut, wudwog cen bot Lubanga, wek balwu kijwa woko, wek nino me yweyo ma a ki bot Rwot obino botwu. 20Wek wunong keru me cwiny inyim Rwot, ci en bicwalo botwu odoco Kricito ma oyero pirwu, en aye Yecu, 21ma myero kijole ipolo nio ka kare oromo me roco jami ducu kakare, mayam Lubanga oloko pire i dog lunebine maleng nia wa con. 223 Moses yam owaco ni, ‘Rwot Lubanga bicwalo lanebi mo pirwu ma bia ki ikin utmegiwu macalo ocwalo an. Wubiwinyo en i lok ducu ma bititiwu. 234 Dok ka obinen, dano mo ma pe biwinyo lanebi meno, kibipoke woko ki ikin jo pa Lubanga, ci kibityeke wange birwenyo woko ki ikin lutugi.’

24Ci Petero omede ki titoni, lwak lunebi ducu yam guloko lok kun gitito pi gin ma bitime ikare man, cake wa ikom Camuel ki jo ma gulubu kore. 255 Wun aye jo mujolo gin ma Lubanga ociko nia ki i dog lunebi, dok wun aye lule gicike mayam Lubanga omiyo bot kwariwu, kun waco bot Abraim ni, ‘Rok ducu gibilimo gumgi ki ikom likwayi.’ 26Ka dong Lubanga otyeko keto latice, ci okwongo cwale botwu pi keliwu gum mamiyo ngat acel acel loke weko timo bal.”