Tic Pa Lukwena 2

Bino pa Cwiny Maleng

11

Ka nino me Pentekote dong oromo, ci jo muye Kricito ducu onongo gucoke kacel i kabedo acel. 2Cutcut wo owinye kun oa ki ipolo macalo yamo ma kodo mager, ci opongo i ot ducu kama gubedo iye. 3Ci gin mo onen botgi macalo leb mac ma opoke ci opye iwi ngat acel acel ma ikin gi. 4Ka dong gin ducu gupong ki Cwiny Maleng, ci gucako loko leb mukene mapatpat macalo Cwiny Maleng omiyogi me lokone.

5Onongo tye Lujudaya ma gibedo i Jerucalem, ki jo ma giworo Lubanga ma gua i rok ducu matye iwi lobo. 6Ka wo meno owinye, ci lwak ducu gucoke kun wigi ocung woko, pien onongo ngat acel acel winyogi ka giloko leb tugi kikome. 7Ci guuru matek tutwal ma kun giwaco ni, “Jo ma giloko ni mono pe gin ducu Lugalilaya? 8Pingo wan ducu dok wawinyogi kun ngat acel acel tye kalok i lebwa kikome ma kinywalowa iye? 9Wan Lupartia, jo Media, jo Elam, ki jo ma gibedo i Mecopotamia, Judaya ki Kapadokia, Ponto ki Acia, 10Purugia ki Pampulia, Ejipt ki lobo Libya ma dok tung Cirene, ki welo ma gua ki i Roma ma gin Lujudaya ki jo ma guloke gudonyo i diniwa, 11Lukurete ki Luarab, wan ducu wawinyogi ka kitito pi tic madito me twero pa Lubanga i leb tuwa kikome.” 12Gin ducu guuru loke pien pe gitwero niang, ma guloko loke keken gi ni, “Man teloke ango?” 13Ento jo mukene gunyerogi anyera kun giwaco ni, “Joni gumer ki kongo bwino manyen.”

Lok ma Petero otito

14Ento Petero ocung kacel ki lukwena apar wiye acel, ci odange ki dwon madit kun waco botgi ni, “Wun co me Judaya, ki wun jo ducu ma wubedo i Jerucalem, ber wunge lok man, dok wucik itwu kawinyo loka. 15Jo man pe gumer, macalo wun wutamo, pien cawa pud adek keken me odiko. 16Ento man aye lok mayam lanebi Joel oloko pire kun waco ni, Lubanga owaco ni, 172

‘Ikare me agiki abionyo Cwiny mera Maleng ikom jo ducu;

lutino awobewu ki anyirawu gibitucu lok nebi,

awobewu gibineno ginanyuta,

jowu ma otii gibileko lek.

18Eyo, ikare meno abionyo Cwiny mera

wa ikom lutica ma co ki ma mon,

ci gibitucu lok nebi.

19Abinyutu tango malo ipolo

ki lanyut mapatpat piny iwi lobo,

remo ki mac ki yito ma duny.

20Ceng bicido woko macol,

dwe bidoko makwar calo remo,

ma nongo nino pa Rwot peya obino,

nino madit ki me deyo madwong.

21Ikare meno jo ducu ma gilwongo nying Rwot kibilarogi.’

22Wun Jo Icrael, wuwiny lok man: Yecu Lanajaret obedo dano ma Lubanga aye onyutu botwu kun moko ki tic madito me twer, ki tango ki lanyut mapol ma Lubanga otiyo kacel kwede ikinwu, macalo wun wungeyo. 233 Yecu man ma kimiyo botwu macalo Lubanga yam onongo oyubu kun ongeyo gin ma bitime i anyim, ci wun wugure ikom yatariya, wuneke ki cing lubalo. 244 Ento Lubanga ocero en woko, kun gonye woko ki i arem me to, pien to pe twero moko ikome. 255 Pien Daudi yam oloko ikome ni,

‘Aneno Rwot tye kweda Kare ducu;

pe kibidira woko cen, pien en tye tung cinga ma lacuc.

26Pimeno omiyo abedo ki yomcwiny madwong,

leba bene loko ki yomcwiny,

nino ducu abedo maber kun atye ki gen.

27Pien in pe ibitenya ata i lobo pa jo ma oto,

pe ibiweko kom danoni ma geni top woko.

28In dong inyuta yo ma tera i kwo;

bedoni kweda bimiyo abedo ki yomcwiny madwong mada.’

29Utmega jo Icrael, omyero alok botwu ikom kwarowa Daudi atir ni yam en oto dok kiyiko kome, watye ki lyele botwa kany nio wa tin. 306 Onongo yam en lanebi, ci ongeyo ni Lubanga yam okwongo kwong bote ni ebiketo dano mo ma ikin likwaye ma bedo iwi komkere. 31En yam oneno gin ma bitime i anyim ka oloko bene ikom cer pa Kricito ma Lubanga oyero ni, pe kitenye ata i lobo pa jo ma oto, kome bene pe otop. 32Man en Yecu ma Lubanga ocero woko, wan ducu wacaden ikom lok meno. 33Ka kitinge malo wek obed inget Lubanga tung acuc i kabedo me deyo, ci ogamo Cwiny Maleng ki bot wone kit mayam Lubanga ociko, ci oonyo ikomwa gin man madong wuneno dok bene wuwinyoni. 347 Pien Daudi yam pe ocito ipolo; ento en aye owaco ni:

‘Rwot owaco bot Rwoda ni,

Bed ingeta tung acuc i kabedo me deyo,

35nio ka abimiyo lukwori doko kom laten tyeni.’

36Myero jo me ot pa Icrael ducu gunge atika ni, Lubanga otyeko keto en me bedo Rwot dok Kricito ma Lubanga oyere, en Yecu man ma wun wuguru ikom yatariya ni.”

37Ka guwinyo man, cwinygi oton, ci guwaco bot Petero ki lukwena mukene ni, “Utmego, wabitimo ango?” 38Ci Petero owaco botgi ni, “Wungut, wek kibatijawu ngat acel acel ki ikinwu inying Yecu Kricito, wek Lubanga owek balwu; ci omiwu Cwiny Maleng. 39Pien lok man kiciko pirwu ki pir lutinowu ki pir jo ducu ma Rwot Lubangawa bilwongogi bote.” 40Ka dok otito botgi lok mukene mapol, ma tucu matek dok cuko cwinygi kun waco ni, “Wulare kenwu wua woko ki bot yalwak man mungaki wek wubwot ki i pwod ma bibino ikomgi.” 41Ci jo muye lok ma en owaco botgi kibatijagi, ci gumede inino meno jo maromo alip adek. 42Gin gumine ken gi kawinyo pwony pa lukwena, ki ribe kacel ki jo ma guye Yecu, ki nywako kacel icamo mugati ki kalega.

Kwo ikin jo ma guye Yecu

43Ci lworo omako dano ducu; ci lukwena gubedo katiyo lwak tango ki lanyut mapol. 448 Jo ma guye Yecu gumede ki coke kacel, kun ginywako jami ducu kacel. 45Gucato lonyogi ki jamigi, ka gupoko ki jo ducu kit macalo mite bot ngat acel acel. 46Nino ducu gubedo kacoke i Ot pa Lubanga ki nywako kacel icamo mugati i pacogi, kun gicamo kacel ki yomcwiny ki cwiny acel, 47kun gipako Lubanga, ma dano ducu pwoyogi, ci Lubanga obedo ka medo ikomgi jo ma gulare nino ducu.