Tic Pa Lukwena 16

Temceo onywako wot ki Paulo ki Cira

1Paulo oo wa i Derube ki Licitra. Lapwonye mo onongo tye kunu ma nyinge Temceo, wod pa dako mo ma Lajudaya ma oye Kricito, ento wone aye Lagrik. 2Utmego ma i Licitra ki Ikonio giloko ki nying Temceo maber. 3Paulo onongo mito wot kwede; ci otere, olire, pi Lujudaya ma gitye kunu, pien gin ducu onongo gingeyo ni wone Lagrik. 4Ikom wotgi ducu ma giwoto iye i taun mapatpat gubedo kamiyo bot dano ma guye Kricito cik me aluba mayam lukwena ki ludongo gumoko ki Jerucalem. 5Kitmeno lwak ma oye Kricito i kabedo acel acel gumoko matek i niye, gubedo ka mede mapol nino ducu.

Gin ma Paulo oneno i Teroa i gin anyuta

6Ka guwoto gubaro i lobo Perugia ki Galatia, ci Cwiny Maleng ogengogi ni pe gulok lok pa Lubanga i Acia. 7Ka guo ma gukemo Micia, ci gutemo dok tung Bitinia, ento Cwiny pa Yecu pe oye ki gin. 8Ma omiyo gukato ki i Micia, gucito piny i Teroa. 9Paulo oneno gin anyuta idyewor meno, kun laco mo me Makedonia ocung inyime, obako doge bote kun waco ni, “Kwang nam ibin i Makedonia ikonywa.” 10Ka otyeko neno man i gin anyuta, ci wayube oyotoyot me cito i Makedonia, kun watamo ni Lubanga aye olwongowa pi tito lok me Kwena Maber bot jo ma kunu.

Ludiya oloke bot Kricito

11Wacako kwango nam ki i Teroa, wakwang atir nio wa i Camotrake, ci orwone wao i Neapoli. 12Ki kunu wacito i Pilipi taun madit maloyo pa Jo Roma i lobo Makedonia. Ci wabedo i taun madit meno pi kare manok. 13I ceng Cabit wacito woko inge taun madit meno i kabedo mo ma i dog kulu, ma watamo ni gwok nyo kalega tye kunu; ci wabedo piny kalok ki mon ma gugure. 14Ngat acel ma obedo kawinyo lokwa en aye dako ma nyinge Ludiya ma oa ki i taun madit ma kilwongo Tuatira. En lacat bongo ma lamar lamar, dano ma woro Lubanga. Rwot oyabo tame omiyo oketo cwinye kawinyo lok ma Paulo waco. 15Ka dong kibatija en kacel ki jo ma i ode, en obako doge botwa kun waco ni, “Ka wuneno ni an lagen bot Rwot, ci wubin wubed i oda,” nio ka en oridowa, wadoko welone.

Kitweyo Paulo gi i buc i Pilipi

16Ikare ca ka ceng watye kacito i kabedo me lega, ci warwate ki nyako mo ma angeca matyeto tyet ki jok matye ikome, kun kelo lwak lim mapol bot luditone pi lok ma en tyeto. 17En obedo kalubu korwa, kun dange ni, “Jo man gin aye lutic pa Lubanga Mamalo Twal ma gitucu botwu yo me lare.” 18En obedo katimo kitmeno nino mapol. Ento kiniga omako Paulo, ci oloke owaco ki jok ni, “Aciko in inying Yecu Kricito, a woko ki ikome.” Ci jok oa woko ki ikome i cawa meno cut.

19Ento ka luditone guneno ni gen me nongo lim dong oa woko, gumako Paulo ki Cira guywayogi guterogi wa i cuk inyim luloc. 20Ka guketogi inyim lungolkop, ci guwaco ni, “Jo man gin Lujudaya, ma gin tye ka rubu taun wa maditi woko. 21Gin gipwonyo kit mogo ma cikwa pe ye ni wagam nyo walubgi, pien wan Luroma.” 22Ci lwak guribe kalweny ikomgi; lungolkop bene guyeco ginarukagi ki ikomgi ci lungolkop guciko ni kipwodgi ki odo. 23Ka kityeko pwodogi matek, ci gucwalogi ibuc, kun kiciko lalo mabuc ni ogwokgi maber. 24Ka dong owinyo cik ma kitmeno, oketogi i kicika ma i tyelo, oroyo okol i tyen gi.

25Ento i cwiny dyewor Paulo ki Cira gubedo kalega ki kawero wer bot Lubanga ma lumabuc mukene bene giwinyogi. 26Ci lobo ocako yenge matek, guti me ot buc oyenge, ci dogola ducu guyabe woko cut, ki nyor pa ngat acel acel ogony woko. 27Ka lalo mabuc oco ci onongo ni dog ot buc oyabe woko tye twolo, owoto pala lucwane kun mito neke kekene, pien otamo ni lumabuc gulwi woko. 28Ento Paulo odange ki dwone matek ni, “Pe itime kekeni marac, wan ducu watye kany.” 29Lalo ot mabuc ociko ni kikel mac, ci odonyo i tyelo oyot kun kome myel ki lworo, oryebe piny inyim Paulo ki Cira. 30Ka en okelogi woko ci owacigi ni, “Luditona, myero atim ango wek alare?” 31Guwaco bote ni, “Ye Rwot Yecu, ci ibilare, in ki jo ma i odi ducu.” 32Ci guloko lok pa Rwot bote ki bot jo ducu ma i ode. 33I dyewor i cawa meno kikome oterogi olwoko wang retgi, ci kibatija en cut ki jo me ode ducu. 34Ka oterogi i ode, omiyogi cam; cwinye obedo yom ki jo me ode ducu, pien dong otyeko ye Lubanga.

35Ka piny dong oru, lungolkop gucwalo acikari ka waco ni, “Wek jo meno dong guciti.” 36Ci lalo mabuc otito ki Paulo ni, “Lungolkop gucwalo lok ni myero wuciti. Wukat woko kombedi wuwot ki kuc.” 37Ento Paulo owaco botgi ni, “Kityeko goyowa inyim lwak, ma peya kingoliwa kop, ma kun wan Luroma, dong kitweyowa ibuc, ka kombedi dok kigonyowa i mung? Pe, wek gin aye gubin gugonywa pirgi ken gi.” 38Ci acikari gutito lok man bot lungolkop, ci gubedo ki lworo ka guwinyo ni gin Luroma. 39Ka dong gubino gubako dogi botgi, ka gukwanyogi woko, gucikogi ni gua woko ki i taun madit meno. 40Ka gukato woko ki ibuc, gucito i ot pa Ludiya; ka dong gutyeko neno utmego, ci gucuku cwinygi, ka dong gucito.