Tic Pa Lukwena 17

Woo ma obedo i Tecalonika

1Ka Paulo ki Cira guwok ki i Ampipoli ki Apolonia, ci guo i Tecalonika, kama kacoke pa Lujudaya onongo tye iye. 2Paulo obedo ka donyo ikacoke macalo kite tye, ci orii kunu pi cabit adek kun obedo ka laro lok ikom ginacoya kwedgi iceng Cabit adek meno ducu. 3Paulo obedo katito lok kore ki kore ma moko ni Kricito myero onen can ki bene ocer woko ki ikin jo ma oto. En owaco ni, “Yecu man ma atito pire botwu ni en aye Kricito ma Lubanga oyero.” 4Ci jo mukene ikin gi lok ocobo cwinygi, guribe ikom Paulo ki Cira, ki lwak jo Grik mapol ma giworo Lubanga, kacel ki mon ma lutela mapol. 5Ento Lujudaya nyeko omakogi, gukelo jo ma tubu kin dano atata, ci gucoko dano mekelo wo matek i taun madit meno, ci gurumu ot pa Yacon kun giyenyo Paulo ki Cira pi kelogi woko bot lwak ki tek. 6Ka nongo Paulo ki Cira oloyogi, ci guywayo Yacon ki utmego mogo guterogi inyim luloc me taun madit meno kun gidange ni, “Jo man gitito gin mapat, gitye kaloko tam pa dano me lobo woko, gubino kwede wa kany. 7Yacon aye ojologi; gin gitye ka balo cik pa Cecar ma giwaco ni tye rwot mukene, ma nyinge Yecu.” 8Ka lwak dano ki luloc me taun madit meno guwinyo lok man, ci gucako tuge. 9Luloc gumiyo Yacon ki utmego mukene gujengo lim, ka lacen guwekogi gucito.

Lukwena gucito Berea

10Utmego gucwalo Paulo ki Cira gucito woko i dyewor meno wa i Berea cut; ka guo ci gucito i kacoke pa Lujudaya. 11Lujudaya ma Berea onongo yam gin jo ma kitgi beco makato jo ma i Tecalonika. Gujolo lok ma kitito botgi ki cwinygi ducu kun gingiyo ginacoya mayam kicoyo nino ducu pi neno kalok ducu ma Paulo titoni tye lok ada. 12Ma omiyo lwak jo mapol guye Yecu, ki lwak mon madito ma Lugrik ki co mapol. 13Ento ka Lujudaya ma i Tecalonika guwinyo ni Paulo ki Cira gitye katucu lok pa Lubanga i Berea bene, gin bene gubino kunu, gurubu dano dok gutugu lwak. 14Utmego gucwalo Paulo woko oyot i yoo macito i dog nam, ento Cira ki Temceo gudong. 15Jo ma gulwoko Paulo ni gutere wa i Atene; ci Paulo ocikogi pi Cira ki Temceo ni gulub kore oyotoyot, ka dong gua, gudok i Berea.

Paulo i Atene

16Ikare ma Paulo tye ka kuru Cira ki Temceo i Atene, en oneno taun madit meno opong ki cal jogi, ci olyeto cwinye mada. 17Obedo ka laro lok ki Lujudaya ki jo ma giworo Lubanga i kacokegi, ki i cuk bene ki jo ma en rwate kwedgi jwijwi. 18Luryeko mogo me dul pa Luepikurea ki Lucitoiki 1 bene gurwate kwede. Jo mukene guwaco ni, “Lalok atata ni mito tito lok ikom gin ango?” Jo mukene guwaco ni, “En nen calo tito lok ikom jogi mogo ma welo,” pien onongo en tye katito lok me Kwena Maber ikom Yecu ki ikom cer ki ikin jo ma oto. 19Pimeno gumake ci gutere inyim kacoke mayam rwate iwi got ma kilwongo Areopago, kun giwaco ni, “Wamito ngeyo kit pwony manyen ma ikelo ni, 20pien in dok ikelo lok ma welo tutwal i itwa, ci wamito niang tere.” 21Ikare meno lwak jo Atene ducu ki welo ma gibedo kunu gityeko karegi ducu katito lok ki winyo lok ikom gin manyen.

22Ka Paulo ocung i dye kacoke me Areopago, ci owaco ni, “Wun jo Atene, aniang atir ni ikit ducu wun ludini mada. 23Pien ikare ma awoto i dye taunwu madit aneno keno tyer mo ma kicoyo ikome ni, ‘Pa lubanga ma pe ngene.’ Gin ma wuworo ma pe wungeyo, man aye a tye katucu botwuni. 242 Lubanga mayam ocweyo lobo ki jami ducu matye iye ni, en aye Rwot me polo ki lobo, pe bedo i ot abila ma dano gutiyo ki cinggi. 25En bene pe mito ni dano guwore ki gin ma gutiyo atiya ki cinggi, macalo gin mo orem bote, pien en kikome aye miyo kwo ki dano ducu wa ki yweyo ki jami ducu. 26En yam ocweyo rok ducu nia ki ikom dano acel wek gubed iwi lobo ma onongo en omoko kare kikome kama myero gubed iye, ki wang apoki lobo me kabedogi. 27En otumu wek gubed kayenyo Lubanga, wek ka gibongo abonga gwok nyo gugud kome ci ginonge, pien en pe tye cen kamabor ki bot ngat acel acel ikinwa. 28Macalo ngat acel yam ocoyo ni, ‘Wakwo i en, wawoto i en, wabedo i en.’ Ngat acel ikin lucocwu bene ocoyo ni, ‘Wan bene wan lutinone.’ 29Kitmeno ka wan lutino pa Lubanga, pe myero watamu ni Lubanga cal ki cal mo me jabu nyo ryal nyo got ma kipayo ki diro ki tam pa dano. 30Ikare me kwiya piny Lubanga yam pe oparo pire, ento ikare man en dong ociko ni dano ducu myero gungut ikom balgi. 31Pien Lubanga dong otyeko moko nino ma en bingolo iye kop ikom dano ducu ma i lobo ikit ma atir, kun dong oyero ngat ma myero ongol kop ma kakare. Lubanga omiyo bene lanen ma nyutu ni man bitime pi cero dano meno ki ikin jo ma oto.”

32Ka guwinyo Paulo kaloko lok ikom cer ki ikin jo ma oto, jo mogo gucako caye ki jo mukene guwaco ni, “Wamito imed tito lok man botwa kare mukene.” 33Ci Paulo okato woko ki ikacoke. 34Jo mukene ma guye loke guribe kwede. Ikin gi onongo tye Dionecio ma dano me Areopago, ki dako mo ma nyinge Damali, ki jo mukene bene.