Tic Pa Lukwena 18

Paulo i Korint

1Lacen ki inge man, Paulo oa ki i Atene ci ocito Korint. 2Kunu en onongo Lajudaya mo ma nyinge Akwila ma kinywalo i Ponto, ma pud obino kenyo abina nia ki i Itali kacel ki dakone Pricikila, pien laloc madit Kalaudio onongo ociko ni Lujudaya ducu omyero gua woko ki i Roma. Paulo ocito ka limogi ci obedo botgi, 3pien gin ducu onongo gitiyo kit tic acel, en aye tic me yubu kema. 4En obedo ka laro lok i kacoke i nino me Cabit ducu, kun temo loko tam pa Lujudaya ki jo Grik.

5Ka Cira ki Temceo gua ki i Makedonia, gunongo Paulo onongo ogeto katito lok kun tito bot Lujudaya ni Kricito ma Lubanga oyeroni aye Yecu. 6Ka gilulo ikome, giyete, ci en otengo ginarukane kun waco botgi ni, “Remowu obed iwiwu! An iya gira leng. Cake tin abicito bot Lurok.” 7Ci en oa ki kunu ocito i ot pa laco mo ma nyinge Titio Yucito, obedo larok ma wor Lubanga ode onongo tye cok ki kacoke pa Lujudaya. 8Kuricipo, ladit me kacoke, oye Rwot ki jo ma i ode ducu; ki lwak jo mapol ma i Korint ma guwinyo lok pa Paulo guye bene, ci kibatijagi. 9Rwot onen bot Paulo i gin anyuta idyewor ci owace ni, “Pe ibed ki lworo, ento bed kalok, pe iling, 10pien an atye kwedi, pe tye ngat mo ma bikelo ayela ikomi ki timi marac, pien atye ki lwak jo mapol i taun madit man.” 11Ci obedo kunu mwaka acel ki dwe abicel kun pwonyo lok pa Lubanga ikin gi.

12Ento ikare ma Gallio aye obedo laloyo me lobo Akaya, ci Lujudaya gucoke gutube ikom Paulo, gukele wa inyim kom me ngolo kop. 13Ci gin waco ni, “Laco man tye ka bito dano ni guwor Lubanga i yo ma pe lubu cik.” 14Ento ikare ma Paulo mito ngamo doge kalok, Gallio owaco ki Lujudaya ni, “Ka onongo lok man ocung ikom tim mo marac, nyo kom bal mo marac, kono onongo awiny kokowu, wun Lujudaya. 15Ento kit macalo obedo pyem ikom lok mogo nyo nying mogo ma dok ikom cik ma mewuni, wun aye wunen giwu kite; an akwero bedo langolkop i lok macalo meno.” 16Ci oryemogi woko ki inyim kom me ngolo kop. 17Ci cutcut gin ducu gumako Cocitene, ladit me kacoke, ci gugoye inyim kom me ngolo kop. Ento Gallio pe oketo iye cwinye.

Paulo odok cen i Antiokia

181

Lacen ka man otum, Paulo dok obedo odike ikin luye me Korint pi kare malac, ka oa ki kunu oweko utmego ci en okwango nam ocito i lobo Ciria ma kun Pricikila ki Akwila gunywako yoo kwede. Ci Paulo olyelo wiye i Cenkeria, pien onongo en okwongo kwong.2 19Ka gucito i Epeco, ci oweko Pricikila ki Akwila kunu; ento en ocito i kacoke, olaro lok ki Lujudaya. 20Ka gulege ni kong obed kunu pi kare malac, ci en okwero woko. 21Ento ikare ma en tye ka a ki botgi, ocikogi kun waco botgi ni, “Abidwogo botwu ka Lubanga biye,” ci en ocako kwang nia ki i Epeco.

22Ka dong otyeko o i Cecaria, ci omede ki wote ocito wa i Jerucalem ka moto jo ma oye Kricito, ka dong olor piny ocito wa i Antiokia. 23Paulo odike kong kunu, ka lacen dok oa olimo kabedo ducu ma i lobo Galatia ki Perugia kun jingo cwiny luye ducu.

Apolo otito lok i Epeco

24Lajudaya mo ma nyinge Apolo ma kinywalo i Alekijanderia yam obino i Epeco. En laco ma ngeyo lok maber tutwal, dok tye kingec matut i ginacoya. 25Onongo yam kipwonye i Yo pa Rwot, dok loko ki miti ma i cwinye ducu, ma pwonyo lok ikom Yecu atir dok kikore, kadi bedi onongo ngeyo lok me batija pa Jon keken. 26En yam oloko ki tekcwiny labongo lworo i kacoke, ento ka Pricikila ki Akwila guwinyo loke, ci gutere gumiye pwony matut ikom Lubanga ma niange makato. 27Ikare ma Apolo mito kwang cito i Akaya, utmego gujingo cwinye, ka gucoyo waraga bot lupwonye wek gujole. Ka en oo kunu, ci okonyo jo mayam gulimo gum me niye mada. 28Pien en oloyo tam pa Lujudaya atyer inyim lwak kun nyutu ki i ginacoya ni Kricito ma Lubanga oyero aye Yecu.