Tic Pa Lukwena 19

Paulo i Epeco

1Ikare ma Apolo tye i Korint, Paulo owoto ongolo dye lobonu ari ci oo wa i Epeco. En onongo lupwonye mogo kunu, 2ci openyogi ni, “Wun yam wulimo Cwiny Maleng ikare ma wuye Kricito?” Gugamo ni, “Pe, wan peya wawinyo ni Cwiny Maleng bene tye.” 3Ci Paulo owaco botgi ni, “Con kibatijawu ki kit batija ango?” Gugamo ni, “Ki batija pa Jon.” 41 Paulo ogamo ni, “Jon yam obatija dano pi ngut ikom balgi, kun tito bot jo Icrael ni guye ngat ma bibino lubu koreni, ma en aye Yecu.” 5Ka guwinyo lok man, ci kibatijagi inying Rwot Yecu. 6Ka Paulo oketo cinge iwigi, ci Cwiny Maleng obino ikomgi; gin gucako dumu leb mapatpat kun gitito lok pa Lubanga. 7Gin ducu welgi nongo romo ka apar wiye aryo.

8Paulo obedo ka odonyo i kacoke pa Lujudaya kun loko botgi ki tekcwiny labongo lworo pi dwe adek, dok laro lok ki bako doge pi lok ma mako ker pa Lubanga. 9Ento jo mogo ma pe guye ma guding gucako loko lok marac ikom Yo meno inyim lwak, ci Paulo opoke woko kwedgi, kun woto kacel ki jo ma guye. Paulo obedo kalaro lok nino ducu i ot pwonye pa Tirano.2 10Man omede otyeko mwaka aryo, ma omiyo jo ma gibedo i Acia guwinyo lok pa Rwot, Lujudaya ki Lugrik ducu.

Awobe pa Cekewa

11Ci Lubanga obedo katiyo tango madongo ki i cing Paulo. 12Kadi wa latambarane nyo bongine me tic yam kikwanyo woko ki bote ka kitero bot lutwo, ci two cang woko, ki cen bene a woko ki ikom dano. 13Lujudaya mogo ma woto ikin piny, ma gin luryem cen, gucako tucu nying Rwot Yecu inyim jo ma cen omakogi kun gin waco ni, “Akwongowu ki nying Yecu ma Paulo tito pireni.” 14Yam tye Lajudaya mo ma obedo ajwaka madit pa Lubanga ma nyinge Cekewa, ma awobene abiro gubedo katimo kitmeno. 15Ento cen odok iye botgi ni, “Yecu angeyo, ki Paulo bene angeyo; ento wun kono angagi?” 16Ci laco ma cen omakoni okato ikomgi ci obwoyogi woko ducu. Oryemogi, ci gumwome woko ki i ot kun gitye munero ki ret ikomgi. 17Lok man ongene bot jo ma gin bedo i Epeco ducu, Lujudaya ki Lugrik bene. Ci lworo omakogi ducu, ci guworo nying Rwot Yecu. 18Lwak jo madong guye Yecu gubino kun gin ngut atyer ikom tim tyetgi ducu. 19Ki jo mayam timo tic tangotango gukelo buk tyetgi guguru kacel guwangogi woko inyim lwak ducu. Ka kikwano welgi ci kinongo ni romo lim ryal alip pyere abic kulu.3 20Kitmeno lok pa Rwot odongo omede ki kero madwong.

Tubu dano ma otime i Epeco

21Lacen ki inge meno, Paulo otamo ki i cwinye me cito i Makedonia ki i Akaya ka ekat kwede i Jerucalem, kun waco ni, “Myero acit anen wa Roma bene.” 22Ci ocwalo lukonye aryo i Makedonia, Temceo ki Eracto; en kikome odong i Acia pi kare manok.

23Ikare meno atubatuba magwa ocake ikom Yo pa Rwot. 24Laco mo ma nyinge Demetrio latet ryal, yam teto ryal timo kwede cal ot jok ma dako ma nyinge Atemi makelo kwede lim madwong bot ludiro tice. 25En ocokogi ogurugi kacel ki jo mukene ma gin tiyo kit tic acelu, ci owaco botgi ni, “Lutuwa, wun wungeyo ni lonyowa a i tic man. 26Dong wuneno dok wuwinyo bene ni Paulo man tye ka bito dano, pe i Epeco keken ento oromo i Acia ducu. Tye kaloko jo mapol me lubu kore, kun tito botgi ni lubangagu ma kitiyo ki cing pe gin lubanga. 27Tye ni gin marac binen, pe ikom ticwa man keken ma kilanyo pire, ento wa ot me woro lubangawa madit. Atemi, bene pire dong biboto woko, ki deyone bene kibikwanyo woko. En Atemi ma dano i lobo Acia ki me lobo ducu giworoni.”

28Ka guwinyo lok man ci gutware malo ki kiniga gucako wo matek ni, “Atemi pa jo Epeco dit mada.” 29Kitmeno taun madit meno iye orube woko; gin ducu guringo i kabedo kama kinyutu iye tuku kun giywayo Gayo ki Aristako, Lumakedonia mayam guwoto kacel ki Paulo. 30Paulo onongo mito cito ka donyo i dye lwak, ento lupwonye pe guye. 31Ludito me lobo Acia mogo bene ma gin lureme gucwalo lok bote ni pe otem donyo i kabedo me nyutu tuku. 32Jo mogo gudange mapat ki jo mogo guloko pat, pien lwak mucoke ducu dong gukeco woko, pol pa dano bene pe gingeyo lok ma ogurugi kacel. 33Jo mogo ma i lwak gutamo ni loke otiko Alekijanda, pien Lujudaya gukete inyim lwak ma ocoke, ci Alekijanda ojukugi ki cinge kun mito pido lok inyim lwak. 34Ento ka guniang ni en Lajudaya, gucako wo awoya ci gudange ki dwon acel pi cawa aryo kulu ni, “Atemi pa Jo Epeco dit mada.”

35Lacen ladit ma en aye karan me taun madit meno ojuku dano ci owaco botgi ni, “Wun jo Epeco, anga ma pe ngeyo ni taun madit me Epeco aye lagwok ot woro Atemi madit, ki got maleng mayam opoto ki ipoloni? 36Lok man pyem mo peke iye, wun dong omyero wubed mot, pe wutim gin mo ki kurukuru. 37Wun wukelo jo man ma pe guyako gin mo ki i ot jok, pe bene guyeto lubangawa ma dakoni. 38Kace Demetrio ki lutet luwote gitye ki lok adot ikom ngat mo, otkot tye, luloyo bene gitye; wek gupide ki kunu. 39Ento ka tye lok mukene ma wumito, meno kibityekone i coke me kare ducu macalo cik tye. 40Pien watwero poto i can pi gin ma otime tin ni kun giwaco ni watimo bwami, pien pe tye tyen lok mo ma watwero nyutu pi kit wo ma otime tin.” 41Ka otyeko loko lok man, ci oketo ocoke woko.