Tic Pa Lukwena 20

Paulo ocito i Makedonia ki i lobo pa jo Grik

1Ma dong atubatuba ogik, Paulo olwongo lupwonye bote, ocuku cwinygi, ocikogi, ka ocito woko i Makedonia. 2En owok ki i dye lobo meno kun cuko cwiny dano ki lok mapol, ka oo i lobo pa jo Grik. 3Otyeko dwe adek kunu, ento ka oyube me kwango nam pi cito i Ciria, Lujudaya gupiro lok ikome, ci Paulo omoko tame ni dong ebidok ewok ki i Makedonia. 4Copater wod pa Piro me Berea olwoke, kacel ki Aristako ki Cekundo Lutecalonika, ki Gayo Laderobe, ki Temceo, kacel ki jo Acia, Tukiko ki Tropimo. 5Gin gucito anyim, gukuruwa i Teroa. 6Wan wakwang waa ki i Pilipi ma nino madito me Mugati ma Tobi Pe Iye dong okato, ka wakwang pi nino abic ci wao botgi i Teroa, watyeko kunu nino abiro.

Paulo ociko jo Teroa

7Ikom nino ma okwongo me cabit, ka wacoke kacel ka nywako icamo mugati, Paulo obedo kalok kwedgi pien onongo mito wot woko odiko; ci oloko pi kare malac nio wa i cwiny dyewor. 8Mac tara mapol obedo kalyel i kicika kama wacoke iyeni. 9Onongo tye awobi mo ma nyinge Yutiko ma obedo iwang dirica. Ikare ma Paulo orii kalok, ci nino onuru awobinu mada, ci opoto piny nia ki i ot me adeke, ci kitinge ma oto woko. 10Ka Paulo olor piny, ci oryebe ikome okwake, owaco ni, “Pe cwinywu opoti, kwone pud tye.” 11Ka Paulo oito odok malo, ka obaro i mugati ci gucamo. Obedo kalok kwedgi nio kwarpiny, ka opoke kwedgi. 12Gucito ki awobi meno makwo, cwinygi obedo yom matek.

Paulo oa ki i Teroa ocito Mileto

13Wan watelo yo wadonyo i mel, ci wakwang wao i Acco ma wageno ni Paulo bidonyo i mel ki kunu, pien onongo en ociko kitmeno. Paulo onongo oyubu me wok ki iwi tura. 14Ka oromo kwedwa i Acco, ci wagamo en i mel, wacito kwede wa i Mitulene. 15Ka wakwang waa ki kunu ci orwone wakemo Kioc; ka orwone mukene wao wa Camoc, inge nino meno wao i Mileto. 16Pien Paulo onongo omoko ni ebikwang ewok kun ekato Epeco akata, wek pe etyek kare i Acia, pien onongo nene rune wek ebed i Jerucalem ka twere inino me Pentekote.

Paulo oloko ki ludongo me Epeco

17Ikare ma Paulo tye i Mileto, ocwalo kwena i Epeco pi lwongo ludongo pa lwak ma oye Kricito wek gubin bote. 18Ka gin dong guo bote, ci en owaco botgi ni, “Wun ki komwu wungeyo kit mayam abedo kwede ikinwu wun ducu, nia ikare ma tyena okwongo nyono lobo Acia, 19kun atiyo pi Rwot ki mwolo ducu, ki pig wang, ki ayela mupoto ikoma pi Lujudaya ma gupiro lok ikoma. 20An yam pe anguny adok kingeya aweko tucu lok mo botwu matwero konyowu, kun apwonyowu i dye lwak ki i ot ki ot. 21Atito atyer botwu Lujudaya ki bot jo Grik bene ni myero gungut ikom balgi, gudwog cen bot Lubanga, ci guye Rwotwa Yecu Kricito. 22Kombedi an dong abicito i Jerucalem, ma an lamabuc ma Cwiny Maleng aye otita, kun pe angeyo gin ma bipoto ikoma ki kunu. 23I ada ne Cwiny Maleng aye obedo ka tita ki i taun madito ducu ni twec ki can madwong aye tye ka kura. 24Ento kwona dong pe obedo gin me wel ki tung bota, pe pire dong dit ki bota, ento myero an dong acob ngweca keken ki dogtic ma alimo ki bot Rwotwa Yecu, me tito lok me Kwena Maber me kica pa Lubanga. 25Kombedi dong angeyo ni wun ducu mayam abedo kawot ikinwu kun apwonyowu ki lok ikom ker pa Lubanga pe dong wubineno wanga. 26Ma omiyo atito botwu tin atyer ni, ka kwo pa ngat mo ikinwu orwenyo, aline pe tye iwiya. 27Pien pe anguny adok kingeya aweko tucu botwu gin ducu ma Lubanga oyubu. 28Wugwoke kekenwu ki dwol romiwu ducu ma Cwiny Maleng oketowu me bedo lugwokone, wek wukwa lwak pa Lubanga ma en owilogi ki remo me wel madwong pa Wode. 29Angeyo ni ka apoke woko kwedwu, orudi mager bidonyo ikinwu ci pe gibitimo kica bot romi. 30Dok ikin wun ki komwu bene bia iye jo ma gibiloko lok ma ngako dano ci gibwolo luye miyo gilubu korgi. 31Ma omiyo acikowu ni wugwoke, kun wupo ni yam abedo ka pwonyo ngat acel acel ikinwu ma pe aling pi mwaka adek kulu dyeceng ki dyewor kun akok ki pig wanga. 32Kombedi dong amiyowu i cing Lubanga ki i loke me kica matwero miyo wudongo wubedo matek, miyo wunongo dulwu ki ikom gin ma Lubanga oyube me miyo bot jo ducu ma en olonyogi gudoko maleng. 33An yam cwinya pe opuke ikom lim pa ngat mo kadi ki ginarukane. 34Wungeyo kekenwu ni anongo gin ducu mamite pira ki pi jo ma atye kwedgi ki tic ma atiyo ki cinga eni. 35Ikare ducu atyeko nyutu botwu ni pi tiyo tic matek macalo meno myero wakony lugoro kun wapo lok pa Rwotwa Yecu mayam owaco ni, ‘Miyo mot kelo gum makato gamo agama.’”

36Ka otyeko loko lok meno, ci Paulo orumu conge piny olego kwedgi ducu. 37Gin ducu gukok kun gikwako ngut Paulo ki mot me mar. 38Gin ma ocwero cwinygi tutwal makato ducu obedo lok ma en owaco botgi ni pe dok gibineno wange. Ci gulwoke wa i mel.