Tic Pa Lukwena 21

Paulo ocito i Jerucalem

1Ma dong wapoke kwedgi, wacako kwang wakemo yo atir nio wa i Koc. Orwone wao i Rodec, ka dok wa a ki kunu wao i Patara. 2Ka wanongo mel ki kunu ma cito Poiniki, ci wadonyo iye, wacako wot. 3Ka dong wao kama waneno Caiprac, ci wa kwang wadok tung piny, wacito wa i lobo Ciria ka wakato woko iwi tura i Turu, pien onongo omyero kikwany yec woko ki i mel ki kunu. 4Wayenyo jo ma oye ci wari kunu nino abiro. Cwiny Maleng onongo otiyo kwedgi me juku Paulo ni pe ocit i Jerucalem. 5Ka dong kare me wotwa oromo, ci wapoke kwedgi wamede ki wotwa. Gin ducu gulwokowa, mon wa lutino, ci gukelowa wa inge taun madit; ka warumu congwa i dog nam, ci walego, wacike kwedgi. 6Lacen wan wadonyo i mel, ci gin gudok paco.

7Ma watyeko kwang nia ki i Turu, ci wao i Potolemai; ka wamoto utmego, ci wabedo kwedgi pi nino acel. 81 Orwone wapoke kwedgi, wacito i Cecaria. Wadonyo i ot pa Pilipo latit lok me Kwena Maber, mayam en ngat acel ikin jo abiro ca ma kiyero me konyo luye i Jerucalem, ci wabedo bote. 9Yam en tye ki anyirane angwen ma pe kinyomogi, mayam gitito lok me nebi pa Lubanga. 102 Ka wadike i Pilipo pi nino mapolpol, lanebi mo ma nyinge Agabo obino kunu nia ki i Judaya. 11En obino botwa ci okwanyo del pyer Paulo ka otweyo ki tyene ki cinge kekene kun waco ni, “Cwiny Maleng owaco kit man ni, ‘Lujudaya ma i Jerucalem gibitweyo won del pyer man kit man, ci kibimiye i cing Lurok.’” 12Ka wawinyo lok man, ci wan ki jo ma kunu walego Paulo ni pe ocit i Jerucalem. 13Paulo odok iye ni, “Wun wumito gin ango, ma wukok wubalo ki cwinyani? An pe ayube pi buc keken, ento wa pi to i Jerucalem pi nying Rwot Yecu.” 14Ka dong pe oye, ci waweke kun wawaco ni, “Gin ma Rwot mito myero otime.”

15Ka kare meno, ci wayube me cito i Jerucalem. 16Wawoto ki lupwonye mogo ma gua ki i Cecaria, guwoto kwedwa nia ki kunu ci guterowa wa i ot pa Munacon dano me Caiprac, en obedo dano ma yam odoko lapwonye wa con, dok orii iye pi kare malac.

Paulo olimo Yakobo

17Ka wao i Jerucalem, utmego gujolowa ki yomcwiny. 18Orwone Paulo ocito kwedwa bot Yakobo ma onongo ludongo ducu gitye. 19Ka dong omotogi, Paulo otito kore ki kore gin mapol ma Lubanga otiyo ikin Lurok pi tice. 20Ka guwinyo, gupako Lubanga. Ci guwaco bote ni, “Kong inen, ominwa, tye Lujudaya alip adi ma gitye ikin jo madong guye Kricito. Gin ducu gumine tutwal kalubu Cik pa Moses. 21Gin gubedo kawinyo lok ikomi ni ipwonyo Lujudaya ducu ma gitye ikin Lurok ni gubwot Cik pa Moses woko, dok bene ni itito lok botgi kilong ni pe gulir lutinogi, dok pe gulub kitwa. 22Gin ango dong ma myero watim? Pien gin gibiwinyo ni in ibino Jerucalem. 233 Piman myero dong i tim gin ma waciki. Watye ki jo angwen kany mayam gukwongo kwong. 24Ter jo meno ci ilonye kwedgi kacel, ci icul lim mamite pirgi, wek gulyel wigi. Kitmeno dano ducu gibingeyo ni lok ma gibedo kaloko ikomi ni pe kakare, ento in bene itye ka gwoko Cik pa Moses. 254 Ento pi tung bot Lurok ma guye Rwot watyeko cwalo waraga botgi ki lok ma wangolo ni, pe gucam gin ma kityero bot jogi, pe gucam remo, ki ringo lee ma kideyo adeya, gukwer bene tim tarwang.” 26Paulo otero jo meno ci orune olonye kacel kwedgi, ka en ocito i Ot pa Lubanga pi nyutu kare mene ma nino me lonye megi dong bitum, wek kityer tyer pirgi ki acel acel.

Kimako Paulo i Ot pa Lubanga

27Ka onongo nino abiro me lonyegi dong cok tum, Lujudaya ma gua ki i Acia guneno Paulo i Ot pa Lubanga. Gin gutugu lwak ducu, ci gumake. 28Kun gidange matek ni, “Wun jo Icrael, wumii kony. Man aye laco matye ka pwonyo dano i kabedo ducu ki pwony marac, me kwero rokwa ki Cik pa Moses ki kabedo man bene. Ki makato ducu en okelo Lugrik bene i Ot pa Lubanga, opyedo kabedo man maleng woko.” 295 (Pien onongo guneno Tropimo ma Laepeco ma gitye kacel kwede Paulo i taun madit, ci gutamo ni Paulo okele i Ot pa Lubanga.) 30Ci dano ocako wo i taun madit gutware woko, kun guringo kacel. Gumako Paulo, guywaye woko ki i Ot pa Lubanga, ci kiloro dogola woko cut. 31Ma kimito neke woko, ento lok oo bot kapten me mony ni Jerucalem dong otuge woko. 32En olaro kunu ki ngwec ki lumony mapol kacel ki luditogi maloyo dano miya ki miya, ci gujuku lugo Paulo. Ka lwak guneno kapten ki lumony, ci guweko goyo Paulo. 33Kapten ocito ka omake, ci ociko ni kitweye ki nyor aryo. Ka openyo lwak ni en anga, dok obalo gin ango? 34Jo mogo ma gitye ikin lwak gudange ni piman, ki mukene ni piman. Ka kapten dong pe oniang ikom loke kikome pi wo ma obedo madwong, ci ociko ni kitere i gogo. 35Ka guo i rwom me ito malo, lumony gutingo Paulo atinga pi gero pa lwak. 36Pien lwak dano ma otube gulubu korgi kun gidange ni, “Wuneke woko!”

Paulo opido inyim lwak

37Ikare ma onongo gidonyo ki Paulo i gogo, Paulo owaco bot kapten ni, “Atwero loko lok mo boti?” Ci kapten ogamo ni, “In ingeyo leb Grik? 38Pe in aye Laejipt mayam otubu dano ci otero lunek alip angwen woko i tim?” 39Paulo ogamo ni, “An Lajudaya, kinywala i Taruco ma i Cilicia, gang ma ngene mada. Alegi miya alok ki lwak.” 40Ka oye, Paulo ocung i rwom ci ojuku lwak ki cinge. Ka piny oling litik, Paulo ocako lok kwedgi i leb Ibru kun waco ni: