Tic Pa Lukwena 22

1“Utmego ki wego, wuwiny pido ma akelo inyimwu.” 2Ka guwinyo en kaloko kwedgi i leb Ibru, gumede ki ling mot, ci Paulo omede ki loke: 31

An Lajudaya, kinywala i Taruco i Cilicia, ento adongo i taun madit man me Jerucalem, lapwonya obedo Gamaliel. Kipwonya ki Cik pa kwarowa kun amiine bene tutwal me lubu Cik; dok abedo ki nyeko pi Lubanga macalo wun bene wutye kwede tin. 42 Abedo kalibo jo me Yo man, anekogi bene. Atweyogi, aterogi wa i mabuc, co ki mon; 5Ajwaka madit pa Lubanga ki kacoke pa ludongo gin aye cadena ikom lok man. Alimo waraga ki botgi pi utmego, ci acako wot me cito i Damaciko kamako jo ma gitye kunu ki tweyogi me akela kany i Jerucalem wek kiket can ikomgi.

Paulo otito kit ma en eloke kwede eye Yecu

(Tic 9:1-19; 26:12-18)

6Ikare ma atye kawot madong anyiko cok ki Damaciko, i cwiny dyeceng, ci dero madit oa ki ipolo, oryeny ocaro koma. 7Ka apoto piny, ci awinyo dwon ma waca ni, “ ‘Caulo, Caulo, pingo itye ka yela?’ 8An agamo ni, ‘In anga, Rwot?’ Ci owaca ni, ‘An aye Yecu me Najaret ma itye ka yelani.’ 9Jo ma guwoto kweda guneno dero, ento pe guwinyo dwon ngat matye kalok kwedani. 10Ci agamo ni, ‘Atim gin ango, Rwot?’ Ci Rwot owaca ni, ‘A malo iciti idony i Damaciko, ci kibititi ki kunu gin ducu mayam kiyubu ni myero itii.’ 11Kit macalo onongo dong pe aneno piny pi dero meno ma ocaro wanga, ci jo ma gitye kweda gupeya ki cinga nio wa i Damaciko.

12Ngat mo ma nyinge Anania, dano ma woro Lubanga kun lubu cike ducu, ma Lujudaya ducu ma gitye kunu giloko nyinge maber, 13obino bota, ci ocung ka ngeta, owaca ni, ‘Omera Caulo, wek wangi dong oyabe!’ Ci wanga oyabe woko i cawa meno cut, ci aneno kome. 14En owaca ni, ‘Lubanga pa kwarowa oyero in wek inge gin ma en mito, inen Ngat ma Kite Atir, iwinye bene ka en loko ki doge. 15Pien in i bibedo cadene bot dano ducu pi gin ma ineno ki ma iwinyo. 16Man dok pud ikuru gin ango? Dong ia malo kibatija in, kilwok bali woko kun ilwongo nyinge.’

Lubanga ooro Paulo bot Lurok

17Ka atyeko dwogo i Jerucalem, ikare ma atye kalega i Ot pa Lubanga, awile woko, 18ci anene. En owaca ni, ‘Rune oyot, i a woko ki i Jerucalem, pien pe gibiye lok me caden ma itito pira.’ 19Agamo ni, ‘Rwot, gin ki komgi gingeyo ni i kacoke acel acel abedo ka pwodo dano ma guye in, atweyogi bene ibuc. 203 Dok ikare ma kineko lacaden ni Citefano an onongo acung kunu apwoyo gin ma otime, dok agwoko bene bongi pa jo ma guneke.’ 21Ci Rwot owaca ni, ‘A woko ki kany, pien abicwali kamabor bot Lurok.’ ”

22Gin lwak gubedo kawinyo Paulo nio wa i lok man; ento ka dong en oloko, ci gucako dange ki dwon malongo ni, “Wutere, wuneke woko! Dano macalo meno pe romo bedo i lobo!” 23Gubedo ka dange matek, ma gitengo bongigi, gidunyo apwa malo. 24Kapten ociko ni kiter Paulo i gogo, ci gupenye kun gipwode ki del wek guniang gin ma omiyo kidange ikome kitmeno. 25Ento ka dong kityeko tweye ki del, Paulo oloko ki ladit maloyo dano miya ma ocung ka ngete ni, “Cik ye ni kipwod dano ma Laroma ma peya kingolo kop oloye bo?” 26Ka ladit meno owinyo, ci ocito bot kapten, owace ni, “Man ibitimo ningning? Dano man Laroma.” 27Ci kapten obino bot Paulo openye ni, “In Laroma?” En ogamo ni, “Eyo.” 28Kapten owaco ni, “An awilo dit man ki lwak lim mabup.” Paulo owaco ni, “Ento an kinywala kwede anywala.” 29Jo ma gubedo kapenyeni gugware gucito woko cut. Kapten bene obedo ki lworo, pien oniang ni Paulo bene Laroma ma onongo etweyoni.

Paulo inyim lumemba me Otkot madit pa Lujudaya

30Orwone ka kapten omito ni eniang tyen lok kikome ma Lujudaya gudoto iye Pauloni, ci ogonye woko, ka ociko ni ajwaki madito ki lumemba me Otkot ducu myero gugure kacel. Ka otero Paulo oketo inyimgi.