Tic Pa Lukwena 23

1Paulo ociko wange ikom lumemba me Otkot mucoke ci owaco ni, “Utmego, an abedo ma cwinya leng inyim Lubanga nio wa ikare man.” 2Ka owaco man, Anania, Ajwaka madit, ociko jo ma gucung ka nget Paulo ni gudong doge. 31 Paulo owaco bote ni, “Lubanga bene bidongi, in kor ot ma kipuyu matari! In ibedo ka ngola kop ite Cik, dok bene iciko ni kidonga labongo lubu Cik?” 4Jo ma gucung ka ngete guwaco ni, “In iyeto Ajwaka madit pa Lubanga?” 52 Paulo ogamo ni, “Utmego, pe onongo angeyo ni en Ajwaka madit; pien kicoyo ni, ‘Pe ilok marac ikom ladit maloyo lwak.’” 63

Ento ka Paulo oniang ni dul acel ikin gi Lucadukayo ki dul mukene ikin gi Luparicayo, ci odange i Otkot ni, “Utmego, an Laparicayo, wod pa Luparicayo. Lok opoto ikoma pi geno lok me nicer pa jo ma oto.” 7Ka owaco lok man, pyem opoto ikin Luparicayo ki Lucadukayo, nio ka Otkot iye opoke woko. 84 Pien Lucadukayo gin waco ni cer pa jo ma oto pe, kadi lamalaika, kadi cwiny mo peke; ento Luparicayo giye ducu. 9Ka pyem omede matek, Lupwonycik ma i dul pa Luparicayo gutware malo ka guwaco ni, “Pe wanongo kop mo ma danoni obalo. Ka ce cwiny onyo lamalaika aye oloko kwede, ci timo ango?” 10Ka pyem otede magwa, kapten olworo ni gin biyeco Paulo woko atata, ka dok ociko lumony ni gulor piny gin gukwanye woko ki ikin gi ki tek, ci gukete i gogo.

11Orwone i dyewor, Rwot ocung ka nget Paulo, ci owace ni, “Di cwinyi. Macalo ibedo katito lok ikoma i Jerucalem, kitmeno bene myero ibed cadena wa i Roma.”

Kiyubu lok me neko Paulo

12Ka piny oru, Lujudaya mogo gutudo dogi kacel kun gukwongo ni pe gibicamo cam kadi wa mato pii nio ka kineko Paulo. 13Jo ma gukwonge kitmeno onongo welgi kato pyere angwen. 14Ka gucito bot ajwaki madito ki ludongo guwaco ni, “Wan watyeko kwonge matek ma watweyo ni pe wabibilo cam mo nio ka waneko Paulo. 15Pimeno wun ki lumemba me Otkot wucwal lok kombedi bot kapten wek okele piny botwu macalo wubicito ka ngiyo kop ikome kore ki kore. Nongo wan wayube me neke ma peya oo botwu.”

16Ento okeyo Paulo owinyo kit ma kitye kapiro lok kwede ikome, ci ocito odonyo i gogo otito ki Paulo. 17Ka Paulo olwongo ladit mony acel ma lalo dano miya, ci owace ni, “Ter awobi man bot kapten. En tye ki lok mo ma mito tito bote.” 18Otere bot kapten ci owace ni, “Paulo ma lamabuci olwonga ci olega ni akel awobi man boti, pien tye ki lok mo ma mito tito boti.” 19Kapten omako cinge, otere cen i mung ka openye ni, “Gin ango ma onongo i mito tito bota?” 20Ogamo ni, “Lujudaya guyube me penyi wek iter Paulo botgi i Otkot diki, wek onen calo gimito ni gimed penyo lok ikome wek giniang iye maber. 21Ento pe iye legagi, pien dano makato pyere angwen gubutu ka kiye. Gukwonge ni pe gibicamo gin mo kadi mato pii nio ka gineko Paulo. Kombedi dong guyube, gikuru cik ma a ki boti.” 22Kapten ocwalo awobinu kun cike ni, “Pe dok itit bot ngat mo ni itito lok man bota.”

Kicwalo Paulo bot Pwelici ma laloyo

23Ci olwongo lumony aryo ma lulo dano miya ki miya, owaco botgi ni, “Wuyube ikin cawa adek me dyewor ki acikari miya aryo, ki wegi aguragura pyere abiro, ki wegi tong miya aryo wek gucit Cecaria. 24Dok inong aguragura bene pi Paulo wek oring kwede wek itere ki kuc bot Pwelici laloyo.” 25Ci ocoyo waraga ma kwane kit man:

26“An Kalaudio Licia amoto in Laloyo Maber Pwelici. 27Laco man Lujudaya aye gumako, onongo dong gicok neke woko, ka acito botgi ki lumony ci alare ki i cinggi, pien onongo aniang ni en Laroma. 28Pi mito niang ikom lok ma kidote iye ci atere i Otkot ma meggi. 29Ci anongo ni kidote ki adot ma dok ikom cikgi, pe onongo tye lok mo ma kiromo ngolo kop me to iye ikome, kadi bene me tweye ibuc. 30Ka kikwila lok ni ki tye ka kiyo laco man, ci acwale woko oyot kun aciko ludote ni gutit adotgi ma ikome inyimi.”

31Lumony gulubu twero ma kimiyogi ci gutero Paulo kit ma kicikogi kwede. Gukwanye ki i dyewor gutere wa i Antipatric. 32Orwone gudwogo i gogo, kun giweko wegi aguragura gumede ki wot kwede. 33Ka guo Cecaria gumiyo waraga bot laloyo, ci gutero Paulo bene inyime. 34Ikare ma laloyo dong okwano waraga, openye ni en oa i lobo mene. Ka oniang ni oa i lobo Cilicia, 35ci owaco ni, “Abiwinyo loki ka ludoti guo.” Ociko ni kigwoke i ot madit pa Kerode.